Kvikmyndaumsögn

 - Titill:  The Hangover ("Hundasýkin" á færeysku,  "Þynnkan" á íslensku)

 - Sýningarstaður:  Sambíón

 - Einkunn: **1/2 (af 5)

  The Hangover er bandarísk gamanmynd sem gerist í borg syndanna,  Las Vegas.  Leikstjórinn,  Todd Phillips,  á að baki myndir á borð við  Road Trip,  Old School  og Starsky & Hutch.

  Að uppistöðu til gengur myndin út á að þrír kunningjar vakna upp eftir næturslark í borginni og reyna að átta sig á atburðum næturinnar.  Þeir muna ekki eftir neinu.  Hægt og bítandi tekst þeim að fylla upp í eyðurnar. 

  Söguþráðurinn er byggður á raunverulegum atburði.  Jafnvel má ætla að eitthvað þessu líkt hafi gerst mörgum sinnum víða um heim.  Þar fyrir utan er söguþráðurinn ekki upp á marga fiska og skiptir litlu máli.  Það eru samskipti félaganna innbyrðis og við annað fólk sem afgreiða brandarana.  Brandararnir eru þokkalega margir og margir þokkalega fyndnir.  Sumir nokkuð ferskir.  Þar ber einn félaganna hita og þunga.  Sá er Zach Galifianakis í hlutverki Alans.  Hann er í miðið á ljósmyndinni hér fyrir ofan.  Án hans hlutverks væri myndin ansi þunn. 

  Einstaka brandari er mjólkaður um of.  Dæmi um það er hversu mikið og ítrekað er gert út á að einn félaganna missir framtönn á næturslarkinu.  Til gamans má geta að viðkomandi leikari hefur frá barnsaldri verið án þessarar tannar í raunveruleikanum.

  Myndin er auglýst sem "ein albesta grínmynd sumarsins".  Hún stendur undir þeirri fullyrðingu.  Í og með vegna þess að framboð á góðum grínmyndum er takmarkað.   Töluvert er um ofleik í myndinni.  Einnig er hún dálítið klisjukennd og þess vegna oft fyrirsjáanleg.  Sem er allt í lagi.  Þetta er fyrst og fremst létt grínmynd og reynir ekki að vera neitt meira.  Hún heldur jöfnu flugi til enda.  Ágæt skemmtun fyrir fólk á öllum aldri.  Það eru mörg fín rokklög í myndinni í bland við nokkur leiðinleg popplög.

Athugasemdir

[Guðmundur St Ragnarsson, 15.6.2009 kl. 17:57]

Ertu að grínast Jens, tvær og hálf? Þetta er langbesta mynd Todd Philips og á hann þó nokkrar góðar. Lágmark **** af 5 mögulegum!!!! Mjög fersk mynd með skemmtilegum karekterum og geysilega vel skrifað handrit. Frábærir leikarar og óþekktir sem ég held að sé betra og hef ég séð gagnrýnanda taka undir það.

[doddyjones (IP-tala skráð) 15.6.2009 kl. 22:41]

mér fannst nú auglýsingin alveg nóg til að horfa á. kv d

[Jens Guð, 15.6.2009 kl. 23:52]

  Guðmundur,  það þarf ekki mikið til að gleðja þig í kvikmyndasal.  Hehehe!  Nei,  ég segi nú bara si svona í léttum dúr.  Að 4 stjörnur séu lágmark fyrir myndina þýðir að hún jaðri við að vera óaðfinnanleg.  Það vanti bara herslumun.

  Ég gæti fallist á að 3 stjörnur séu nærri lagi.  Það vó salt hjá mér hvort niðurstaðan væri 2 og hálf eða 3 stjarna.  Að lokum réði úrslitum hve það veikir mjög mynd með ýmsum ferskum bröndurum hvað margt í framvindu og niðurstöðu er fyrirsjáanlegar klisjur.  Nokkur dæmi:

  - Að fíni Bensinn,  fjölskyldugullið,  endi sem brak.

  - Að tengdafaðirinn hafi lúmskan skilning á að borg syndanna sé eins og hún er.

  - Að tannlæknirinn geri uppreisn gegn kærustunni sem kúgar hann.

  - Að konan sem tannlæknirinn giftist á næturslarkinu reynist vera vændiskona.

  - Að týndi maðurinn hafi bar gleymst uppi á þaki.

  - Að maðurinn með hauspokann reynist vera annar maður.

  - Að allt endi vel.  Brúðkaupið gengur upp.

  Þannig mætti áfram telja.  Á móti koma brandararnir.  En miðað við hvað þeir eru margir góðir ollu klisjurnar vonbrigðum.  En það er rétt að undirstrika og ítreka að brandararnir framkalla góðar hláturgusur.

  Ég er sammála því að það er kostur að leikararnir eru lítt þekktir.  Af fjórmenningunum í ferðinni til Las Vegas er þó bara þessi eini,  Zach í hlutverki Alans,  virkilega skemmtilegur karakter.  Kínverjinn sem þeir hitta er líka skemmtilegur karakter.

  Ég hef ekki séð fyrri myndir Todds Phillips.  Mér skilst að þær séu frekar þunnar.  Í dag heyrði ég frá manni sem sagði að þessi mynd hafi komið skemmtilega á óvart miðað við hvað  Old School sé slöpp.

  Það er ástæða til að taka lofsöng gagnrýnenda um kvikmyndir með fyrirvara.  Almennt séð.  Atvinnugagnrýnendur fjölmiðla fá boðsmiða á myndir,  oft á forsýningar með tilheyrandi veitingum og jafnvel glingri tengdum myndunum.  Fjölmiðlarnir eru margir háðir kvikmyndaauglýsendum.  Jafnvel tengdir þeim.  Og svo framvegis.

  Ég var sjálfur um nokkurra ára skeið kvikmyndagagnrýnandi dagblaðs sem hét Tíminn.  Og þekki þannig dálítið stöðuna frá þeirri hlið.

  Samt sem áður:  Bestu þakkir fyrir þitt innlegg.  Þitt viðhorf til myndarinnar er kærkomið sem mótvægi við mína skoðun.  Ég endurtek sömuleiðis að þessi mynd er hin ágætasta skemmtun.        

[Jens Guð, 15.6.2009 kl. 23:56]

  Doddý,  þér er alveg óhætt að kíkja á myndina til að upplifa ágæta skemmtun.  Ef umsögn mín um myndina virkar neikvæð þá er það röng túlkun á gagnrýni minni.  Þrátt fyrir galla myndarinnar mæli ég með henni fyrir þá sem vilja eiga góða kvöldstund í kvikmyndasal.