Skúbb! Færeysk stórhátíð á Stokkseyri

  Dagana 31.  júlí,  1.  ágúst og 2.  ágúst næstkomandi verður haldin færeysk stórhátíð í Draugasetrinu á Stokkseyri.  Þar verður boðið upp á feitan pakka af fjölbreyttri færeyskri tónlist og færeyskum dönsum.  Fjörið hefst með dansleik klukkan 22.00 föstudaginn 31.  júlí.  Jens Marni  og félagar leika fyrir dansi.  Dansleikurinn verður brotinn upp með færeyskum dansi,  harmónikuspili og innslagi frá  Simme  og hljómsveit.  

  Þetta er í annað sinn á hálfri öld sem Simme skemmtir á Íslandi.  Í fyrra skiptið kom hann hingað 1959.  Þá naut hann gífurlegra vinsælda hérlendis með lögum sem margir muna vel eftir,  svo sem  Kenna tit Rasmus  og  Sunnukvöld í plantasjuni.

  Laugardaginn 1.  ágúst hefst dagskrá með fótboltakeppni Færeyjar-Ísland klukkan 15.00.  Klukkan 19.00 flytja fiðlusnillingurinn gullfallega  Agelika Nielsen,  píanóleikarinn Kristian Blak og hljómsveit dagskrána  Heygar og dreygar.  Klukkan 20.00 tekur Simme við.  21.00 flytja Hilmar Joesen,  Angelika og Kristian Blak dagskrána  Álvastakkur.  Hálftíma síðar hefst færeyskur dans þar sem kyrjaður verður söngurinn um  Ólaf Riddararós.  Klukkan 23.00 blása Eyðun & Terji til dansleiks.  Ég sá þá spila í Færeyjum fyrir nokkrum vikum.  Þá spilaði James Olsen með þeim á trommur og söng.  Meðal laga á dagskrá þeirra var   Talað við gluggann  eftir Bubba Morthens.     

  Dansleikur Eyðuns & Terjis verður brotinn upp með innslagi frá Simme,  harmónikuspili og færeyskum dönsum.  

  Dagskrá sunnudagsins 2.  ágúst hefst með helgistund í umsjón  Matine  klukkan 11.30.  Um tónlist sjá Angelika & Kristian Blak ásamt hljómsveit.  Klukkan 15.00 er söngdagskrá í höndum - eða raddböndum öllu heldur - Jens Marni,  Kims Hansen,  Terjis & Eyðuns og Simme.  Klukkan 16.00 er það færeyski dansinn  Dvörgamöy.  Við tekur klukkan 22.00 dansleikur með Kim Hansen og hljómsveit.  Eins og fyrri kvöld verður hann brotinn upp með innslögum frá Simme,  harmónikuspili og færeyskum dansi.

  Þetta er spennandi og vönduð dagskrá.  Ég hvet alla sem geta valdið vettlingi að láta þessa glæsilegu stórhátíð ekki framhjá sér fara.

  Ljósmyndin efst til vinstri er af Kristian Blak (www.kristianblak.com).  Honum til hægri handar er fiðlusnillingurinn Angelika Nielsen (http://www.facebook.com/people/Angelika-Nielsen/590996554).  Þriðja myndin er af Jens Marni (http://www.myspace.com/jensmarni). 

  Kíkið líka á:  http://www.simme-musikkhus.fo/main.html

  Mynd númer 4 er af Eyðunni & Terji.  Mynd númer 6 er af plötuumslagi hljómsveitar Angeliku,   Kvönn.  Mynd númer 7 er af plötuumslagi Kristian Blak og Eivarar,  Yggdrasil.

Athugasemdir

[Reynir Már Sigurvinsson (IP-tala skráð) 21.7.2009 kl. 00:22]

Sæll Jens flott umfjöllun hjá þér.... dagskráin er að þéttast. stal svona smá frá þér vona að mér verði fyrirgefið...

 sjá á www.stokkseyri.is  eða á Facebook http://www.facebook.com/event.php?eid=103948382681#/event.php?eid=103948382681&ref=mf

bestu kveðjur Reynir og sjáumst um Versló

[Jens Guð, 21.7.2009 kl. 00:36]

  Reynir,  steldu endilega frá mér eins og þú mest mátt.  Þegar nær dregur ætla ég að kynna í sérstökum bloggfærslum flesta sem þarna koma fram.  Ég hef fylgst með þessu fólki árum saman,  séð þau spila í Færeyjum og víðar.  Hlakka virkilega til að upplifa fjörið á Stokkseyri.  Og bara endilega pikkaðu upp eins og þú getur um það sem ég hef til mála að leggja.  Þarna er um að ræða rjóma rjómans í færeyskri tónlist.