Úrslit: Bestu íslensku smáskífurnar

  Þegar Félag íslenskra hljómplötuútgefenda,  rás 2 og www.tonlist.is  hófu í vor leit að 100 bestu íslensku plötunum þótti sumum sem merkar smáskífur væru afskiptar.  Margar af bestu hljómsveitum íslensku rokksögunnar sendu aldrei frá sér stóra plötu (Lp).  Aðeins smáskífur.

  Upp kom umræða um smáskífur sem áttu og eiga erindi í umræðu um bestu íslenskar plötur.  Í kjölfar þeirrar umræðu tók ég áskorun um að finna bestu íslensku smáskífuna.  Skilyrði voru þau að smáskífan væri sjálfstæð útgáfa.  Ekki kynning fyrir stóra plötu.  Sömuleiðis mátti aðallag smáskífunnar ekki vera útlend kráka (cover song). 

  Undirtektir voru góðar.  Um 100 smáskífur voru tilnefndar.  Þær smáskífur sem fengu flestar tilnefningar og/eða stuðning frá öðrum setti ég upp í formlega skoðanakönnun.  Sjálfur reyndi ég ekki að hafa áhrif á uppstillinguna.  Ég var einungis forvitinn að komast að almennu viðhorfi til viðfangsefnisins.  Og var reiðubúinn að sveigja reglur til samræmis við þau sjónarmið sem voru ráðandi.  Þetta var til gamans gert.

  Nú hafa vel á sjöunda hundrað atkvæða skilað sér í hús.  Röðin hefur ekkert breyst frá því atkvæði voru 100,  200,  300,  400,  500 eða 600.  Munur á milli sæta er mikill.  Það gerir útkomuna trúverðugri.  Hún er þessi:

1.  Katla kalda/Ástin sigrar með Mosa frænda 28,4%

2.  Spáðu í mig/Komdu og skoðaðu í kistuna mína  með Megasi  19%

3.  Gvendur á eyrinni  með Dátum  15,6%

4.  Dánarfregnir og jarðarfarir  með Sigur Rós  11,7%

5.  Dimmar rósir  með  Töturum  8,8%

6.  Glugginn  með Flowers  5,2%

7.  Jenny darling  með  Pelican  4,4%

8.  Tilf  með Purrki Pillnikk  3,9%

9.  Yacketty yak, Smacketty smack   með Change, 3,2%

  Ég endurtek og undirstrika að þessi úrslit hafa ekkert með minn músíksmekk að gera.  Ég er samt ekkert ósáttur við efstu sæti.  Gaman væri að heyra viðbrögð ykkar við niðurstöðunni.

Athugasemdir

[Jens Guð, 23.8.2009 kl. 01:54]

  Til gamans vil ég bæta við að Þorleifur,  sá hinn sami og vann Lennon-svítuna í Bítlaferð til Liverpool,  uppgötvaði að lagið  Komdu og skoðaðu í kistuna mína  með Megasi er sama lag og  You Ain´t got No Home  með Bruce Springsteen eftir Woody Guthrie.  Gítarleikarinn í laginu með Megasi er Óttar Felix Hauksson,  formaður Sjálfstæðisflokksins í Kópavogi.

[Lárus Gabríel Guðmundsson, 23.8.2009 kl. 10:22]

Persónulega finnast mér svona kannanir aðallega eiga heima í kunningjahópum. Þær markast um of af tíðaranda.

T.a.m er það dæmigert "hype" að setja Mosa frænda þarna í efsta sætið (ekkert slæmt um þá að segja annars. Fyrir fimm árum hefðu þeir tæplega fengið nema hluta af þessum atkvæðum.

Forvitnilegur listi annars.

[Ómar Ingi, 23.8.2009 kl. 15:06]

Settu þessa smáskífu í fyrsta sætið og málið er dautt, eðli málsins samkvæmt  

Dánarfregnir og jarðarfarir  með Sigur Rós 

[S. Lúther Gestsson, 23.8.2009 kl. 19:22]

Bara það eitt að Megas sé ekki í fyrsta sæti segir manni að þessi listi sé falsaður. Stórlega ýktur.

Ómar Ingi, það eru allir hættir að hlusta á Sigur rós. Það var bara svona 2007. 

[Ómar Ingi, 23.8.2009 kl. 20:45]

Satan Lúther ekki vera með grín þetta er sko ekki Bubba Bjarkar eða Megasar band.

[S. Lúther Gestsson, 23.8.2009 kl. 21:20]

Heldur hvað?

[Jens Guð, 23.8.2009 kl. 21:22]

  Lárus,  það var fyrst og fremst kunningjahópurinn sem greiddi atkvæði í þessari könnun.

  Vissulega setur tíðarandinn ætíð mark á svona kannanir.  Hjá því verður aldrei komist.  Þó er það þannig að fyrir 26 árum stóð ég fyrir skoðanakönnun um bestu íslensku plöturnar og birti niðurstöðuna í bók,  Poppbókinni.  18 árum síðar stóð Dr.  Gunni fyrir samskonar könnun og birti niðurstöðuna í bók,  Eru ekki allir í stuði? 

  Allar plötur í efstu sætum á lista  Poppbókarinnar  skiluðu sér á lista Dr.  Gunna.  Eini munurinn var að plötur sem komu út eftir 1983 voru einnig á listanum hjá Dr.  Gunna.

  Sagan endurtók sig núna í sumar þegar Félag íslenskra hljómplötuútgefenda,  rás 2 og tónlist.is leitaði að bestu íslensku plötunum.  Sömu gömlu góðu plöturnar af lista Poppbókarinnar og Dr.  Gunna skiluðu sér á listann í sumar.  En eðlilega bættust nýrri plötur í hópinn.

[Jens Guð, 23.8.2009 kl. 21:26]

  Ómar,  ég breyti ekki röðinni.  618 hafa kveðið upp sinn dóm.  Hinsvegar fagna ég því að  Dánarfregnir og jarðarfarir  sé í einu af efstu sætunum.  Þegar verið var að tilnefna smáskífur í skoðanakönnunina fundu einhverjir því allt til foráttu að þessi skífa yrði með.

[Lárus Gabríel Guðmundsson, 23.8.2009 kl. 21:40]

Jens: Jú, tímalaus klassík er vissulega til. Klausan mín hér að ofan átti einnig sérstaklega við smáskífur sem að mínu mati eru erfiðara viðfangsefni í "Topplistagerð", en "heilar" hljómplötur.

Ég átti ekki við að ekki mætti dæma tónlist og skipa í sæti en það hefur þó einhverra hluta vegna alltaf farið aðeins fyrir brjóstið á mér. Þetta er þó eins og alltaf viðloðandi.

Fyrir mér er svona listagerð í tónlist eins og setja upp lista yfir 10. bestu listmálara sögunnar...

Hvort er Picasso eða Dali "betri" málari ? Svarið verður alltaf hjákátlegt því spurningin sem slík er undarleg ekki satt ?

[Jens Guð, 23.8.2009 kl. 21:42]

  Sigurður Lúther,  Sigur Rós hefur aldrei verið vinsælli en einmitt í dag.  Og vinsældir þessarar mögnuðu hljómsveitarinnar fara bara vaxandi. 

  Það er vandamál með allar skoðanakannanir að þær sýna aldrei 100% rétta niðurstöðu.  Vandamálið með skoðanakannanir hér á blogginu er margþætt.  Meðal annars að úrtakið velur sig sjálft.  Einnig að uppistaðan af þeim sem kíkja á þessa bloggsíðu eru á aldrinum 30 - 60 ára. 

  Á móti vegur að ætla má að fyrst og fremst áhugasamir með skoðanir á músík hafi greitt atkvæði.  Einnig veit það á gott að röð platnanna breyttist ekkert þó atkvæðum fjölgaði.  Sömuleiðis veit á gott að töluverður styrkleikamunur er á milli hverrar plötu fyrir sig.

  Ég er mikill aðdáandi Megasar og stend í þeirri trú að ég hafi fyrstur manna titlað hann meistara Megas á prenti.  Einmitt vegna aðdáunar minnar á Megasi þekki ég mæta vel að fjöldi manns hefur óþol gagnvart honum og skilur ekki hvernig nokkur manneskja hlusti á hann sér til gamans.  Ég hefði ekki beinlínis orðið undrandi ef smáskífa hans hefði lent í toppsætinu.  En nokkuð viss var ég um að ef svo færi þá yrði mjótt á munum með efstu sætum. 

[Jens Guð, 23.8.2009 kl. 22:01]

  Lárus,  ég get alveg fallist á þitt viðhorf.  Þetta er laufléttur samkvæmisleikur en ekki hárnákvæm vísindi.  Það má ekki taka svona leik of hátíðlega.  Þetta er bara til gamans gert.  Sjálfur hef ég afskaplega gaman af svona listum.  Heimur poppmúsíkurinnar snýst mikið til um lista af öllu tagi.  Þar eru vikulegir vinsældalistar mest áberandi.  Vinsælustu poppmúsíktímaritin keppast við að bjóða upp á lista:  Árlegt vinsældaval lesenda,  áramótauppgjör gagnrýnenda,  bestu plötur þessarar aldar,  bestu plötur síðustu aldar og svo framvegis.  Mér þykir gaman að fylgjast með öllum þeim listum - með þeim tilheyrandi annmörkum sem þeir eru háðir.  

[Ómar Ingi, 25.8.2009 kl. 23:12]

S Lúther , heldur besta band sem Ísland hefur alið af sér.

[Jens Guð, 25.8.2009 kl. 23:25]

  Ómar og Sigurður Lúther,  fyrir minn smekk er Sigur Rós eitt allra flottasta fyrirbæri íslenskrar músíkur.  Og á heimsmælikvarða sem slíkt.