Sprenghlægilegar merkingar

  Manneskjan sem vinnur í þessari matvörubúð virðist ekki vita hvað viðkomandi ávöxtur heitir.  Eða hvort manneskjan reiknar með að viðskiptavinirnir viti ekki hvað banani er.  Að minnsta kosti er sérkennilegt að merkja bananana sem "Bogna gula ávöxtinn á 40 cent".

  Af lögun þessa umferðarmerkis er næsta víst að um stöðvunarskyldu er að ræða.  Gárungi hefur brugðið á leik vegna snjólagsins sem hylur merkið og skrifað "Halda áfram".

  Það er ekki að undra að seljandi þessara sítróna veki athygli á að þær henti fullkomlega í að búa til appelsínusafa.  Hann veit sem er að flestir halda að appelsínur séu heppilegri þegar verið er að búa til appelsínusafa.

  Bílnúmer með blöndu af bókstöfum og tölustöfum geta oft myndað skemmtilega útgáfu.  Hér mynda bókstafirnir nafnið Guð og tölustafirnir 666.  Samkvæmt kenningum þeirra sem trúa á guð er 666 tákn djöfulsins.  

  Verðmiðinn hefur lent ofan á fremsta staf á nafni framleiðandans á þessum kattamat.  Vegna þess virðist varan heita "Endaþarms draumórar".

  Sorgmæddur rúmenskur aðdáandi Michaels Jackssonar hefur brugðið á það ráð að deila harmi sínum með viðskiptavinum.  Til að heiðra minningu Michaels Jacksonar hefur aðdáandinn slegið upp sérstöku tilboði á mið-austurlenskum kjötrétti:  Ef keyptir eru 3 skammtar fylgir sá 4ði með sem kaupauki til minningar um Michael Jackson. 

  Á spjaldinu stendur "Ósýnilegt límband".  Vissulega er ekkert límband að sjá.  Ummerki benda þó til að einhver hafi hnuplað límbandinu af spjaldinu.

  Ein þekktasta plata rokksögunnar er "Wish You Were Here" (Ég vildi óska að þú værir hér)  með Pink Floyd.  Á skyrtubolnum hefur orðinu "bjór" verið skipt inn í staðinn fyrir "hér".

  Nafn bókarinnar er "Lækningamáttur krabbameins".  Höfundurinn er kona sem útlistar í heilli sjálfshjálparbók hvernig krabbameinssjúklingar geta notað meintan lækningamátt krabbameinsins.  Það voru raddir í höfði konunnar sem laumuðu þessum fróðleik að henni.  Hún heldur því fram að sérstök ástæða liggi að baki því að fá krabbamein og því fylgi blessun.  Bókin fæst í búðum sem selja nýaldarvörur.

  Reyndar er ég ekki viss um að myndin sýni umrædda bók.  Undirtitillinn þarna er "Músík til slökunar fyrir líkama og sál" og stærðin á pakkningunni passar við geisladisksumbúðir.  Kannski er kerlingin að fylgja bókinni eftir með geisladisk?

Athugasemdir

[Ásdís Sigurðardóttir, 8.9.2009 kl. 20:58]

[Ómar Ingi, 8.9.2009 kl. 23:01]

[Hannes, 8.9.2009 kl. 23:35]

Skemmtilegar myndir hjá þér.

[Jóna Kolbrún Garðarsdóttir, 9.9.2009 kl. 00:33]

[Stefán (IP-tala skráð) 9.9.2009 kl. 08:49]

Neðsta myndin er lang hlægilegust. Þessi af manninum með kjánaglottið og öfugmæla textanum.

[hrafn (IP-tala skráð) 10.9.2009 kl. 09:18]

Bókin fjallar ekki um krabbamein. Heldur er tákn stjörnumerkisins krabbans (cancer) á kápunni.

En samt frekar heimskulegur titill.

[Guðný (IP-tala skráð) 12.9.2009 kl. 21:35]

Þetta með bananana er ekkert djók, þetta er út af reglugerð hjá ESB, bananar mega ekki vera svona bognir og þessvegna heitir þessir þessu lýsandi nafni :)