Einmitt námskeiðið sem vantaði

  Kunningjakona mín er voðalega spennt fyrir námskeiði sem lítið hefur farið fyrir í fjölmiðlum - að ég held.  Það er útlendingur sem heldur námskeiðið.  Hann er búinn að fatta upp á aðferð fyrir fólk til að losna við verki.  Allt frá sinadrætti og hausverk til botnlangakasts og tannpínu.  Aðferðin er frekar einföld.  Að sögn eru verkir huglægir.  Fólk þarf bara að setja sig í spor verksins og ræða við hann.  Bjóða honum góðan dag og fara vel að honum.  Spyrja hann síðan lúmskra spurningu og veiða upp úr honum hvað sé í gangi.  Af hverju hann sé mættur.

  Á þennan hátt er hægt að komast til botns í vandamálinu.  Næsta skref er að semja í góðu við verkinn um að láta sig í friði.  Á námskeiðinu er þátttakendum kennt hvernig best er að standa að spjallinu við verkinn.  Ef vel tekst til hverfur verkurinn á 7 mínútum eða í síðasta lagi á innan við 12 árum.  Hafi verkurinn ekki horfið eftir 12 ár mun námskeiðsstjórnandinn endurgreiða námskeiðsgjaldið.  Það er rétt rúmur 10 þúsund kall,  eða 19.999 kr.

  Þeir sem komast ekki á námskeiðið geta í staðinn keypt plástra,  armbönd,  lukkusteina,  pendúla og annað slíkt sem einnig lætur verki hverfa.  Eða farið í heilun eða höfuðbeina- og spjaldhryggshnykk.  Jafnvel DNA heilun.  Eða horft á Fangavaktina.

  Á ljósmyndinni eru þátttakendur á námskeiði að koma sér í stuð og smá vímu með því að sniffa stæka svitalykt,  lím og bensín.  Það skerpir á liðsandanum og hristir þátttakendum saman.

Athugasemdir

[Hannes, 29.9.2009 kl. 20:32]

Skráðu þig Jens.

[Gjagg (IP-tala skráð) 29.9.2009 kl. 20:58]

Heilun á háu stigi. 

[doddý, 29.9.2009 kl. 22:57]

mér langar í lukkustein kv d

[Jens Guð, 29.9.2009 kl. 23:25]

  Hannes,  ég hef um áratugi fylgst með öllum bullnámskeiðunum sem fólk flykkist á til að afhjúpa eigin heimsku. Ég gleymdi að nefna toppinn:  Að svitaþvo sálina í svokölluðu svitatjaldi (myrkvuðu).  Það var góð traffík í það á sínum tíma og hámarki náði þegar þátttakendur voru orðnir ruglaðir af myrkri,  reyk og loftleysi og áttu að sjá fyrir sér buffalóhjörð.  Svitatjaldið skilaði heimsku fólki enn heimskara og færri peningum eftir í buddunni.

[Jens Guð, 29.9.2009 kl. 23:48]

  Gjagg,  ég veit ekki hvar á að staðsetja þetta rugl.  Mér skilst að þetta furðulega dæmi sé skilgreint sem sjálfsdáleiðsla.  Ég skilgreini það sem heimsku.  Yfirmáta heimsku.

[Jens Guð, 30.9.2009 kl. 19:57]

  Doddý,  þú finnur hann í Gróttufjörunni.