Bjargið heilsu ykkar og lífi með einfaldri aðferð

  Fram til þessa hefur sígarettureykingum verið kennt um ýmsa lungnasjúkdóma.  Nú hefur komið í ljós að sturtuhausar eru ábyrgir fyrir þessum sjúkdómum.  Sturtuhausinn er fullur af bakteríum og viðbjóði sem fólk andar ofan í lungu á meðan það er undir sturtunni.

  Sígarettureykingar eru hinsvegar frekar hollar.  Held ég.  Þær framkalla smá kitl eða áreiti á lungun.  Þau fá létta leikfimiæfingu og verða sterkari á eftir.  Það er verra með viðbjóðinn úr sturtuhausnum.  Bakteríurnar koma sér fyrir í lungunum og valda skaða.

  Með einfaldri aðferð má koma 100% í veg fyrir að bakteríurnar berist ofan í lungu á meðan fólk sturtar sig.  Það eina sem þarf að gera er að kaupa höfuðbúnað fyrir kafara og nettan súrefniskút.  Þannig eru öndunarfærin fullkomlega einangruð frá ógeðinu úr sturtuhausnum.  Illgjörnu bakteríunum til háðungar og niðurlægingar. 

  Til að skerpa á stemmningunni er gaman að setja á sig sundfit í leiðinni.

  Eftir að komið er úr sturtu er upplagt að skrúfa framan af krananum í eldhúsvaskinum.  Sá hluti er með sigti.  Sigtið skal setja í pott,  fylla hann með vatni og sjóða á hæsta styrk í 40 mínútur.  Eftir það er vatninu gusað út á hlað en sigtið skolað í 5 mínútur upp úr 96% spíra (það er gaman að fá sér nokkra sopa af spíranum í leiðinni).  Svo er þetta fest aftur framan á kranann.  Því næst er hárið og höfuðið sjampóþvegið rækilega upp úr kranavatni.  Mælt er með Aloe Vera sjampói sem fæst í Heilsubúðinni á Reykjavíkurvegi 62 í Hafnarfirði.  Til öryggis er heppilegt að taka tvær - þrjár umferðir á þetta. 

  Að lokum er andlitið þvegið vandlega með þvottapoka.  Ef ekki er vel að gætt vilja eyrun gleymast.  Þá kemur sér vel að vera með stóran miða festan í ramma fyrir ofan vaskinn þar sem minnt er á að þvo eyrun líka.  Til að draga athygli að miðanum er upplagt að skreyta hann með skærum blikkljósum og háværri sírenu.

  Í fljótu bragði getur þetta virst dálítið mál.  En þegar þetta er framkvæmt daglega verður það á örfáum árum ósjálfráð athöfn sem jafnvel er framkvæmd áður en maður vaknar.  Skiptir þá engu hvort það er fyrir eða eftir hádegi eða kvöldmat.

Athugasemdir

[Ómar Ingi, 26.10.2009 kl. 23:20]

Mundu að þú ert gervigrasalæknir.

[Jens Guð, 26.10.2009 kl. 23:58]

  Ómar Ingi,  ég reyni að muna það.  Nótera það hjá mér til öryggis.

[Hannes, 27.10.2009 kl. 00:31]

Ég fer alltaf í sturtu með súrefniskút og gasgrímu enda íslenska vatnið jafn skaðlegt og sinnepsgas og ekki bætir sturtuhausinn úr skák.

Fátt jafnast á við góðan vindil.

[Ásthildur Cesil Þórðardóttir, 27.10.2009 kl. 12:06]

Jens þú ert ótrúlegur stundum.  Smákitl og æfing, ætla að segja reykingafólkinu mínu frá þessu.  Verst er að þau eru að flýja til Noregs, þar sem pakkinn kostar um það bil 2000 kall.  Svo þau deyja frekar úr hungri en reykingum. 

[Jonni, 27.10.2009 kl. 12:41]

Það er mér mikill hugarléttir að einhver skuli hafa kjark til þess að koma út með þetta opinberlega. Er þá loksins hægt að tala um þetta? Er að fara með kútinn í fyllingu og svo vil ég benda á að þetta Aloe Vera sjampó fæst líka á bensínstöðinni á Varmá í Skagafirði. Stundum.

[Tobbi (IP-tala skráð) 27.10.2009 kl. 13:26]

Jonni, hvar er Varmá í Skagafirði?

[Ásdís Sigurðardóttir, 27.10.2009 kl. 14:42]

Heppin er ég þá, fer aldrei í sturtu og reyki ekki.

[Jens Guð, 27.10.2009 kl. 16:42]

  Hannes,  er ekkert erfitt að reykja vindilinn þegar þú ert með gasgrímu í sturtu?

[Jens Guð, 27.10.2009 kl. 16:51]

  Ásthildur,  það er reisn yfir því að borga 2000 kall fyrir sígarettupakkann.  100 kall fyrir rettuna.

[Jens Guð, 27.10.2009 kl. 16:53]

  Jonni,  já,  ég er búinn að opna umræðuna.  Núna má tala um þetta.

[Jens Guð, 27.10.2009 kl. 16:55]

  Tobbi,  hann er annað hvort að rugla Skagafirði og Mosfellsbæ saman eða nöfnunum Varmahlíð og Varmá.

[Gjagg (IP-tala skráð) 27.10.2009 kl. 16:58]

 Thakka fyrir ábendinguna, Gud.  Ég vil nota taekifaerid og vekja athygli ykkar á thví ad öldrun er stórhaettuleg.  Ef menn deyja ekki úr sturtu eda reykingasjúkdómum er allt eins líklegt ad öldrun drepi thá.

[Hannes, 27.10.2009 kl. 22:51]

Jens mér hefur aldrei dottið í hug að reykja vindill í sturtu enda mega þeir ekki blotna og ekki hægt að reykja þá á meðan maður er með kafaragrímu á hausnum.

[Jens Guð, 28.10.2009 kl. 00:46]

  Gjagg,  er það ekki flökkusaga?  Hefurðu eitthvað fyrir þér um þetta? 

[Jens Guð, 28.10.2009 kl. 00:56]

  Hannes,  fyrir 30-og-eitthvað árum vann ég í álverinu í Straumsvík.  Við tiltekin verkefni urðum við að bera rykgrímur.  Einn stórreykingamaður hafði þann hátt á að gera gat fyrir sígarettu á sína grímu.  Einhverra hluta vegna þótti okkur hinum skrýtið að sjá kallinn standa inni í rykkófi og keðjureykja með rykgrímu.