Kvikmyndarumsögn

 - Titill:  Bjarnfreðarson

 - Leikstjóri:  Ragnar Bragason

 - Handrit:  Ragnar Bragason,  Jón Gnarr,  Pétur Jóhann Sigfússon,  Jörundur Ragnarsson og Jóhann Ævar Grímsson

 - Einkunn:  ****1/2 (af 5)

  Flestir kannast við sjónvarpsþættina  Næturvaktina,  Dagvaktina og Fangavaktina.  Þetta eru einhverjir albestu gamanþættir sem framleiddir hafa verið og sýndir í íslensku sjónvarpi (öfugt við  Martein  sem er versta "gaman"myndasería í íslensku sjónvarpi).  Kvikmyndin  Bjarnfreðarson  er einskonar lokapunktur aftan við sjónvarpsþættina.  Afskaplega vel heppnaður lokapunktur. 

  Kvikmyndin kemur á óvart.  Það er mun meiri dýpt í henni en sjónvarpsþáttunum,  meira drama og hún er vandaðri í alla staði;  meira í hana lagt.  Framvindan tekur nokkra óvænta vinkla,  sagan gengur vel upp og fær farsælan endi. 

  Eins og nafn myndarinnar gefur til kynna er sjónum einkum beint að Georgi Bjarnfreðarsyni.  Við fáum að kynnast æsku hans,  mömmu hans,  afa og ömmu.  Hægt og bítandi fær áhorfandinn skilning á því hvers vegna Georg hefur orðið þessi brenglaði maður sem hann er.  Áður en myndin er á enda örlar jafnvel á því að maður vorkenni Georg pínulítið.

  Góðkunningjar Georgs,  Ólafur Ragnar og Daníel,  úr vaktaseríunum eru í stórum hlutverkum sem fyrr.  Það er ekki sanngjarnt að segja að neinn steli senunni en Ólafur Ragnar á fyndnustu senurnar.  Já,  þetta er gamanmynd.  Mynd sem ég mæli með fyrir alla aldurshópa sem virkilega góðri skemmtun.  Hún á eftir að verða klassík.

Athugasemdir

[Billi bilaði, 1.1.2010 kl. 02:39]

Sammála. Hún náði mun betur til mín en Avatar.

[Siggi Lee Lewis, 1.1.2010 kl. 04:43]

Já og það besta er að myndin endra með því að George Bjarnfreðarsson flyst til Bandaríkjanna hehehe....

[Jens Guð, 8.1.2010 kl. 02:36]

  Billi,  um hvað er þessi Avatar barnateiknimynd?