Bráðnauðsynlegt að leiðrétta

  Ég er að hlusta á  Færibandið  með Bubba á rás 2.  Hann er að spjalla við Ragnar Bjarnason.  Þetta er framhald af síðasta þætti.  Þeir félagar fara á kostum sem fyrr.  Enda Raggi Bjarna bæði skemmtilegur og einstaklega skemmtilegur sögumaður.  Það fær allt ævintýraljóma í frásögn hans.  Þar fyrir utan hefur hann átt langan og farsælan feril sem tónlistarmaður.  Það er gleðiefni að Bubbi boðar þriðja þátt  Færibandsins  með Ragga.

  Eitt af því skemmtilega við frásagnir Ragga af sjálfum sér er að fer frjálslega með staðreyndir.  Misminnir margt og ruglar saman ártölum og persónum.  Þegar Eðvarð Ingólfsson skráði ævisögu Ragga fyrir margt löngu fór mikil vinna í að leiðrétta þessar sögur með því að bera þær undir sögupersónur. 

  Rétt í þessu var Raggi að nefna lagið  Hvert er farið blómið blátt?  Hann sagði það vera eftir Bob Dylan.  Ég veit ekki til að Bob Dylan hafi sungið þetta lag.  Það er eftir Pete Seeger og er þekktast í flutningi Kingston tríó.  Einnig með Mosa frænda.  Líka með Savanna tríói undir nafninu  Veistu um blóm sem voru hér?  Hér er það Marlene Dietrich sem syngur lagið,  Sag mir wo die blumen sind?

Athugasemdir

[Magnús Geir Guðmundsson, 11.1.2010 kl. 23:32]

Það gengur bara á með tíðum leiðréttingum núna hjá þér Jens gamli! En gleymdi að opna og nenni því ekki úr þessu.

[Jens Guð, 11.1.2010 kl. 23:48]

  Magnús Geir,  það gengur á með gusum hjá mér þessa dagana að leiðrétta rangfeðruð lög.  Nema um daginn.  Þá sá ég á einhverri heimasíðu að birtur er texti  Þorraþrælsins.  Þar er skráð að lagið sé eftir Gleðisveitina Alsælu.  Hehehe!  Samt var gefinn upp hljómagangur hljómagangur gamla þorrablótslagsins.  Þetta leirétti ég ekki.

  Til gamans langar mig til að rifja upp að á degi íslenskrar tungu,  kannski 1998 eða 1999,  reyndi sjónvarpið að finna Gleðisveitina Alsælu til að flytja  Þorraþrælinn  í Kastljósi.  Leitina bar að Rottweiler-hundum.  Erpur vinur minn vissi hvaða fyrirbæri Gleðisveitin Alsæla var og að ég var ekki tilbúinn að afhjúpa það.  Niðurstaðan varð sú að Erpur og Sesar A fluttu í sjónvarpinu Alsælu-útgáfuna af  Þorraþrælnum.  Næsta laugardag tók Spaugstofan þá útfærslu í sínum stíl.  Síðan hef ég alltaf farið jákvæðum orðum um Spaugstofuna.

[Jón Steinar Ragnarsson, 12.1.2010 kl. 00:00]

Dylan var 14 ára þegar þetta var samið. Gott að þú standir bullvaktina.

[Jens Guð, 12.1.2010 kl. 00:18]

  Jón Steinar,  takk fyrir þennan fróðleik.  Ég hélt að lagið væri ennþá eldra.  Ég veit að Pete Seeger er á tíræðisaldri og sló fyrst í gegn með laginu  Goodnight Irene  1950 með hljómsveitinni The Weavers.  Það er eftir Leadbelly sem dó 1949.  Þann hinn sama og samdi  Í kartöflugörðunum heima  með Árna Johnsen.  Þeir Leadbelly eiga það sameiginlegt að hafa setið í fangelsi.  Leadbelly fyrir ítrekuð morð og Árni fyrir að stela öllu steini léttara en kantsteinum.   

[Jens Guð, 12.1.2010 kl. 00:20]

  En er þetta ekki yndislegt með Marlene?  Jafnvel þó stengjasúpan fari offari er á líður.

[Jón Steinar Ragnarsson, 12.1.2010 kl. 00:39]

Ég googlaði þetta nú bara. Það er heil síða um lagið. Maelene er alltaf sjarmerandi. Syngur eins og manneskja sem er alveg að sofna útaf og virkar alltaf svo róandi og exotísk. Hann samdi þetta í flugvél og eitthvað var textinn öðruvísi í upphafi.

[Jens Guð, 12.1.2010 kl. 00:43]

  Jón Steinar,  hver er slóðin?  Ég kann ekkert á leitarsíður.

[Jens Guð, 12.1.2010 kl. 00:46]

  Fyrirgefðu, ég var of fljótur á mér. Tók ekki eftir að þú varst með hlekk á þetta.  Takk fyrir.

[Jón Steinar Ragnarsson, 12.1.2010 kl. 01:17]

Ég þarf að kíkja til þín í kaffi í næstu bæjarferð og kenna þér beisikkin í tölvunotkun.  Þetta er raunar bara spurning um að setja upp toolbar á leitarvélina þína, þar sem þú hefur þetta allt fyrir framan þig.  Hér er Leadbelly með goodnight Irene.

[Yngvi Högnason, 12.1.2010 kl. 14:03]

Ég held að Jón Steinar þurfi ekki að koma suður í þetta. Við höfum þetta allt hérna: http://www.isoft.is/?m=namskeid&f=showScheduleItem&id=885