Var Ringo hæfileikaminnsti bítillinn?

  Bítlarnir eru merkasta hljómsveit tónlistarsögunnar.  Framverðir hennar,  John Lennon og Paul McCartney, voru frábærir söngvahöfundar.  Báðir í fremstu röð lagahöfunda og Lennon næsti bær við Bob Dylan í hópi bestu textahöfunda rokksins.  Báðir frábærir söngvarar.  Þeir afgreiddu léttilega hömlulausan öskursöngstíl,  fyrstir bleiknefja á eftir Elvis Presley.  Þeir afgreiddu líka léttilega allskonar aðra söngstíla.  Rödduðu að auki glæsilega ásamt Geroge Harrison.  Hann varð - þegar á leið - afburðagóður lagahöfundur.  

  John, Paul og George hófu snemma kapphlaup í að framþróa tónlist hljómsveitarinnar.  Róttæk og djörf nýsköpun Bítlanna gekk langt og trompaði flest sem var í gangi á þeim tíma.  

  Í tilraunastarfsemi Bítlanna reyndi einna minnst á trommuleik.  Ringo fór að upplifa sig sem utanveltu.  Í hljóðveri var hann meira og minna verkefnalaus.  Spilaði meira á spil við starfsmenn hljóðversins en á trommur. 

  Chuck Simms í Nýfundnalandi er Bítlafræðingur, söngvari, söngvaskáld og jafnvígur á hin ólíkustu hljóðfæri;  allt frá munnhörpu til banjós;  og allt frá orgeli til gítars.  Hann hefur sent frá sér fjölda platna og tekið þátt í árlegri vikulangri hátíð International Beatle Week í Liverpool.  Bæði þar og á hljómleikaferðum um heiminn hefur hann spilað fjölda Bítlalaga.  Á kanadíska netmiðlinum Quora skrifar hann áhugaverða grein um þetta allt saman.  Í styttu máli segir hann eitthvað á þessa leið:

  Ringo er ekki söngvaskáld.  Hann er lélegur söngvari.  Takmarkaður,  sérstaklega í samanburði við hina bítlana.  En á upphafsárum Bítlanna var hann eini góði hljóðfæraleikari hljómsveitarinnar.  Trommuleikur hans var öruggari, afgerandi og gerði meira fyrir tónlistina en flestir trommuleikarar þess tíma.     

  Gítarsóló George voru iðulega klaufaleg.  Paul spilaði tilþrifalausan hefðbundinn bassaleik.  Ringo bauð upp á miklu meira og hljómsveitin þurfti á því að halda.  Eins frábærir og miklir áhrifavaldar Bítlarnir voru þá var það ekki fyrr en 1965, frá og með plötunum Help og Rubber Soul sem hinir bítlarnir náðu Ringo sem góðir hljóðfæraleikarar.  Þeir hefðu þó aldrei orðið merkasta hljómsveit heims með lélegum trommara.

  Ég er að mestu sammála Chuck.  Kvitta samt ekki undir að gítarsóló George hafi verið klaufsk.  Frekar að þau hafi verið einföld og stundum smá stirðleg.  Það er töff.  Eins og heyra má glöggt í meðfylgjandi lagi - spilað "life" í beinni útsendingu í breska útvarpinu 1963 - er það trommuleikur Ringos sem keyrir upp kraftinn í laginu.  "Gerir það", eins og sagt er um einstakt hljóðfæri sem skiptir öllu máli í að fullkomna lag. 

    

Athugasemdir

[Jósef Smári Ásmundsson (IP-tala skráð) 3.4.2019 kl. 10:39]

Hljóðfæraleikur var nú ekki mjög merkilegur á þessum árum. Það þótti töff að spila sömu 64. parts nótuna í röð á hraðanum 150 pm. og spila helst með tönnum og táneglum. Og svo skilaði hinn undarlegi hljómur hljóðfærisins sínu. Alvöru spilamennska kom fyrst með DEEP PURPLE 1969 og með þeim hljómsveitum sem eftir komu.Þó Chris Scuire hafi verið yfirlýsingaglaður þá er mikið til í ummælum hans um gítarleik Jimi Hendrix. Það voru jú eingöngu hassistar sem hlustuðu á þetta á sínum tíma. Mér hefur aldrei fundist vera nein gæði í hljóðfæraleik bítlanna og stones og Trommuleikurinn var þar engin undantekning. Taktfestan hjá Ringo var það eina sem skilaði einhverju. En hann var hálfgæðingur við Bruford, Lake og svo ég tali nú ekki um okkar Pétur Östlund. 

[Jósef Smári Ásmundsson (IP-tala skráð) 3.4.2019 kl. 11:19]

Átti að vera Palmer en ekki Lake.

[Sigurður I B Guðmundsson, 3.4.2019 kl. 19:53]

 John Fogerty var í raun CCR eins og Ray Davies var Kinks og þannig voru margar hljómsveitir að einn aðili sem hélt hljómsveitinni uppi. En The Beatles var skipuð fjórum snillingum!!

[Stefán (IP-tala skráð) 3.4.2019 kl. 20:40]

Bass Player Magasine - Official Site setur Paul McCartney á toppinn af popp/rokk bassaleikurum. Lesendur Rolling Stone Magazine setja Paul í 3 sæti. DigitalDreamDoor.com er með Paul í 8 sæti. Á Ranker - Official Site velja lesendur Paul í 4 sætið. Digital DreamDoor.com er einnig með Paul í 30 sæti yfir bestu hljómborðsleikara rokksins. Bítlaaðdáendir vita líka mæta vel að Paul er virkilega góður gítarleikari og trommuleikur hans á plötum er góður. Paul fékk t.d. mikið hrós frá Keith Monn fyrir trommuleikinn á plötunni Band on the Run. Oft hefur verið sagt að hljómsveit sé aldrei betri en trommuleikarinn og Ringo var vissulega talinn vera besti tromuleikarinn í Liverpool áður en hann gekk til liðs við bestu hljómsveit allra tíma. Ofur spilamennska hjá öllum hljóðfæraleikurum í rokkhljómsveit kom fram með The Cream 1966 og sem dæmi um hljómsveitir með ofur hljóðfæraleikara plús ofur söngvara eru The Who 1965, Led Zeppelin 1969 og Mark 2 útgáfa Deep Purple 1969. Ég tek svo undir með Sigurði hér að ofan ,, The Beatles var skipuð fjórum snillingum ". Sem heild voru þeir ofurmenni á öllum sviðum, sem svo sannarlega breyttu heimsmyndinni.

[Gudni Olafsson (IP-tala skráð) 4.4.2019 kl. 09:06]

Paul hefur sagt að af þeim fjórum hafi Ringo tekist best að halda utan um tekjurnar. Sem voru smáaurar í upphafi ferils, miðað við allt og allt. Paul hefur reyndar rétt úr kútnum síðustu árin, er sagt. Svo að Ringo er ýmislegt til lista lagt, og er af sumum sagður tímamóta-trommari og yfirlei fyrirtaks náungi.

[Jens Guð, 4.4.2019 kl. 12:46]

Jósef Smári,  það er ýmislegt til í þessu hjá þér.

[Jens Guð, 4.4.2019 kl. 12:46]

Sigurður I B,  ég tek undir hvert orð.

[Jens Guð, 4.4.2019 kl. 12:47]

Stefán,  Paul varð risaflottur bassaleikari þegar á leið.  Ekki spurning.

[Jens Guð, 4.4.2019 kl. 12:56]

Guðni,  ítrekað hefur komið fram að Ringo létti mjög andrúmsloftið hjá Bítlunum.  Þegar John tók sín frægu geðofsaköst þá sló Ringo hann iðulega út af laginu með einhverju fyndnu bulli.  Íslensk kona sem vinnur á kaffistofu Abbey Road hljóðversins segir að heimsóknum Ringos fylgi alltaf glaðvær stemmning.  Hann sé hress og kátur við alla.

[Wilhelm Emilsson, 4.4.2019 kl. 22:44]

Ég tek undir hvert orð hjá, Jens! Jósef Smári fílar progrokkið, greinilega, sem er hið besta mál. 

[Jens Guð, 5.4.2019 kl. 02:32]

Wilhelm,  takk fyrir það.

[Stefán (IP-tala skráð) 5.4.2019 kl. 21:38]

John var stofnandi The Beatles og þeirra mesti hugsuður og ég þakka mikilli sýrunotkun fyrir alla framsæknu sköpunina. Paul var mesti framkvæmdamaðurinn og raunar stjórnadi The Beatles eftir lát Brian Epstein. Aðal hugmyndasmiðurinn á bak við Sgt Peppers ... og Let It Be og án ákveðni hans hefði Abbey Road aldrei orðið til. George var sagður feiminn og hljóðlátur, en hann var virkilega góður og virtur lagasmiður. Ringo var þeirra mesti humoristi og þó að hann færi í fýlu og hætti um stundarsakir í hljómsveitinni 1968, þá náðu félagar hans honumm inn aftur sem betur fer, því að trommuleikur hans var alla tíð góður og já, bara alveg sérstaklega magnaður í lokin, á Abbey Road.

[Jens Guð, 6.4.2019 kl. 09:25]

Stefán,  takk fyrir þessa ágætu greiningu.