Prófið þennan spennandi sjávarrétt um helgina - ódýr og einfaldur

  Fyrir daga kvótakerfisins voru fiskur og önnur sjávar- og vatnadýr fátækramatur.  Þau voru á borðum landsmanna alla daga nema sunnudaga.  Þá var annað hvort lambahryggur snæddur eða lambalæri með grænum baunum.  Eftir að Halldór Ásgrímsson hannaði kvótakerfið í samráði við aðra kvótakónga eru sjávarréttir orðnir lúxusfæði ríka fólksins.  Það er helst að almenningur leyfi sér að laumast til að sjóða fiskbita á mánudögum með því að herða sultarólina aðra daga vikunnar.

  Það er mér mikil ánægja að bjóða hér upp á uppskrift að ódýrum og virkilega bragðgóðum sjávarrétti.  Í hann þarf eftirtalið hráefni:

   
35 g smjörlíki
125 g strásykur
5 msk kakó
1 egg og perlusulta (Pearl Jam) þarf að vera innan seilingar.  Eða einhver önnur sulta.  Þó ekki sviðasulta.  En til að mynda rabbabara-,  jarðaberja- eða bláberjasulta.
90 g hveiti
1/2 tsk matarsódi
1/4 tsk salt
1/2 bolli mjólk
1/2 tsk vanilludropar og lítil dós af hákarlsbitum (fæst í Nóatúni)

  Smjörlíki og strásykri er sullað saman og hrært kröftuglega í.  Skyndilega og óvænt er egginu bætt út í.
Hveiti, matarsódi, kakó og salti er sigtað saman og laumað út í svo lítið ber á ásamt mjólkinni og vanillu.  Hræra þetta kæruleysislega saman undir spilun á laginu "Á sjó"  með Hljómsveit Ingimars Eydal (má vera "Sigurður var sjómaður"  með Utangarðsmönnum).  Þetta er sett í lausbotna tertuform (eða svampbotnaform ef botninn er fastur í tertuforminu).  Bakað við 174°C í 46 og hálfa mín.  Eftir það er botninn skorin í sundur,  sultan sett á milli og súkkulaðikrem - sem er til á hverju heimili - ofan á.

  Þetta er snætt með bestu lyst og gott er að sötra nokkur glös af írsku kaffi (Irish Coffie) eða Bailys með.  Þegar tertan er búin skal stinga upp í sig einum bita af hákarli,  skipta yfir í óblandað viský með klaka,  hækka í sjómannalögunum og syngja með.  Þegar hungur sverfur að á ný má stinga upp í sig öðrum hákarlsbita en geyma síðan restina í ísskáp.

Athugasemdir

[Pétur Magnússon (IP-tala skráð) 7.3.2008 kl. 14:58]

Sæll Jens

Maður fær bara vatn í munninn. Faðir minn kunni vel að meta sögurnar af afa þínum, ég ætla að gera slíkt hið sama með sögurnar af frænku þinni. Ég rakst á þennan mikla meistara á youtube. Þekkir þú nokkuð þennan snilling http://www.youtube.com/watch?v=tlv_kgOgLwo Kíktu á þetta þú hefur gaman að trúi ég.

Kveðja

PTR

[Magnús Geir Guðmundsson, 7.3.2008 kl. 15:42]

Hehehe, þú sem eldar aldrei heima, spreðar núna frá þér uppskriftunum og hollusturáðunum, sem sjóaður sérfræðingur værir! En sveitapiltur, þó ódæll væri, hefur nú lært eitthvað af sinni vísu og góðu móður, það er ég nú viss um auk þess sem rúm 20 ár í hjónabandi með tvo stráka, hefur nú kennt þér sitthvað!

En allt of mikill óþarfa sykur í þessu!

[Ía Jóhannsdóttir, 7.3.2008 kl. 15:43]

Hehehehe Jens okkur bráðvantar yfirkokk á Restaurant Reykjavík   Þú færð jobbið en aðins ef þú lumar á fleiri svona frábærum uppskriftum

[Ía Jóhannsdóttir, 7.3.2008 kl. 15:44]

átti að vera engöngu og aðeins.  Góða helgi

[Brjánn Guðjónsson, 7.3.2008 kl. 15:47]

'maður' hefur vitanlega alltaf soðna ýsu, með hamsatólg, á mánudögum

[Steini Briem (IP-tala skráð) 7.3.2008 kl. 15:59]

Þegar Þorsteinn Pálsson var sjávarútvegsráðherra átti hann eitt sinn að halda ræðu á Hótel KEA en kveldið áður vorum við mættir á svæðið, ég, þá blaðamaður á Mogganum, og aðstoðarmaður Þorsteins, góður vinur minn, og ræddum landsins gagn og nauðsynjar á barnum. Þá segir aðstoðarmaðurinn si svona: "Ég er alveg dauðþreyttur, nýkominn frá Mexíkó, en á eftir að semja ræðuna fyrir Þorstein." Ég sagði aðstoðarmanninum að leggja sig, því ég myndi bara redda þessu fyrir hann. Morguninn eftir lét ég hann fá þessa fínu ræðu og þóttist mjög áhugasamur þegar Þorsteinn flutti hana, hátt og snjallt.

Á þessum fundi var líka Jón Sigurðsson, sem síðar varð formaður Framsóknarflokksins, og ég tilkynnti honum um kveldið að hann væri bjáni, en eitthvað var hann nú ósáttur við það, kallinn. Sumir eru alltaf í fýlu. Það er bara þannig. Halldór Ásgríms gaf mér hins vegar einu sinni pönnsur með rjóma og sultu niðri á Alþingi, þannig að  ég hef nú fyrirgefið honum hans part í Framsóknarþunglyndinu að sumu leyti, enda hlógum við stundum saman að Steingrími Hermannssyni.

Forseti vor talaði nýlega um að tryggja þyrfti "fæðuöryggi þjóðarinnar" með íslenskum landbúnaðarvörum.  Nú er það svo að við Íslendingar eru ein mesta matvælaframleiðsluþjóð í gervallri veröldinni, og þótt víðar væri leitað, þar sem við erum 13. mesta fiskveiðiþjóð í heimi og veiðum 1-2 milljónir tonna á ári. Við björguðum Tjallanum frá hungurdauða í Seinni heimsstyrjöldinni með því að flytja þangað svo mikinn úldinn fisk að jafnvel allt meginland Evrópu varð að halda fyrir nefið, Hitler meðtalinn. Og tapaði hann þar með hernaðinum, því enginn getur unnið styrjöld með annarri hendinni.

En vegna þessara björgunaraðgerða létu fleiri Íslendingar lífið í styrjöldinni, miðað við höfðatölu, en soldátar í öllum ameríska hernum samanlagt. Tjallinn þakkaði hins vegar pent fyrir sig með þorskastríðunum.

[Guðrún Magnea Helgadóttir, 7.3.2008 kl. 17:21]

Bloggvinur, ennþá...Verði þér að góðu....

[Anna M (IP-tala skráð) 7.3.2008 kl. 19:07]

hehe skiptir máli með tíman ef að maður hefur stillt á blástur ????

[Sigrún Jóna (IP-tala skráð) 7.3.2008 kl. 20:04]

Alveg satt þetta með fiskinn og verðið á honum.

Langar að prófa uppskriftina, en ekki með hákarli.... ja allavega mundi ég þá bjóða mági mínum honum Inga Viðari í mat.

Hann mundi bjarga matnum frá ruslatunnunni. 

Annars sakna ég lambakjötsins meira en fisks í matinn. Veit bara ekki hvað er hægt að kaupa í matinn núorðið. Jú, aka eins og vitleysingur milli verslana, á föstudögum og kaupa það sem er á tilboði þá vikuna .

Hugleiðing; Ég mundi ekki stilla ofninn á blástur. 

[Gunnar Helgi Eysteinsson, 7.3.2008 kl. 21:54]

[Linda Linnet Hilmarsdóttir, 7.3.2008 kl. 22:23]

Innlitskvitt og kveðjur

[Jens Guð, 8.3.2008 kl. 00:15]

  Pétur,  ég þekki ekki þennan snilling.  Hinsvegar kann ég vel við að rifja upp sögur af Stefáni afa og Önnu frænku á Hesteyri. 

  Maggi,  ég hef aldrei á ævi minni notað mataruppskrift. Þannig lagað.  Ég hef þó oft grillað mat og ennþá oftar keypt tilbúinn mat.  Þar fyrir utan er ég sólginn í hákarlsbita.  Borða hann næstum því á hverjum degi.

  Ingibjörg,  því miður kann ég engar mataruppskriftir.  Af mínum 5 systkinum og mörgu mágfólki hafa flestir lært matreiðslu og/eða unnið sem kokkar.  Ég kaupi frekar mat á Múlakaffi eða BSÍ.

  Brjánn,  soðninguna með hamsatólg fæ ég á Múlakaffi á föstudögum.   

  Steini, alveg vissi ég að Þorsteinn semdi ekki ræður sínar sjálfur.  Hann lendir það oft í því að stama sig fram úr þeim.  Þar fyrir utan eru þær yfirleitt gáfulegri en það sem hann skrifar í leiðara Fréttablaðsins.

  Guðrún Magnea,  ekki gera lítið úr góðri tillögu um lystugan sjávarrétt.

  Anna M,  ég veit ekki hvað blástur er.  En það er áreiðanlega eitthvað sem gerir góðan mat betri. 

  Sigrún,  þetta með blásturinn er kannski eitthvað sem betra er að forðast.  Ég veit ekkert hvað það er.

  Gunnar Helgi og Linda,  takk fyrir innlitið.

[Steingrímur Helgason, 8.3.2008 kl. 00:45]

"Þar sem að tveir Þorsteinar koma saman, þar er blaður, á blaði & í blaði..."

Myndu einhverjir Guðnar vilja sagt hafa, í lýsíngarhætti Brímararlegrar þátíðar...

[Ía Jóhannsdóttir, 9.3.2008 kl. 01:33]

Jens ég bara trúi því ekki að þú sért að versla hjá Jóa ,,undrakokki"  ojæja hann er vinur okkar og auminginn þarf nú að safna fyrir næsta skyttiríi í Afríku. Seinast var hann næstum dauður úr vosbúð. 

[Jens Guð, 9.3.2008 kl. 01:57]

  Ingibjörg,  ég veit ekki hver Jói "undrakokkur" er.  En mig grunar að hann vinni annað hvort í BSÍ eða Múlakaffi.  Ég þekki ekki nöfnin á kokkunum.  Á ég að hætta að versla á öðrum hvorum staðnum?

[Ía Jóhannsdóttir, 9.3.2008 kl. 02:58]

Jens, for your info Jói er sá sem á og rekur Múlakaffi með sinni heiðurskonu Guðnýju svo næst þegar þú rekur nefið þar inn þá skilar þú kveðju frá Prag og ekkert múður.  Þér á eftir að líka við gaurinn ef þú hittir hann, ekkert smá spes kallinn sá. Athyglisjúkur vinnualki. Algjör perla enda mikill vinur minn.

[Ía Jóhannsdóttir, 10.3.2008 kl. 13:07]

Takk fyrir Jens að láta mig vita.  Ég fékk þessa sömu færslu í morgun frá Sigurði.  Við erum nú bara að vinna okkar verk hér og þar sem minn elskulegi er ræðismaður  þá eru svona mál daglegt brauð.  En samt gaman að fá klapp á bakið einstaka sinnum. Ertu búinn að hitta Jóa undrakokk? 

[Jens Guð, 10.3.2008 kl. 13:32]

  Nei,  ég verð ekkert var við kokkana á þessum matsölustöðum.  Þeir halda sig í eldhúsinu.