Þórður Bogason fimmtugur

  Rokksöngvarinn Þórður Bogason er fimmtugur í dag.  Eftir að hafa frá unglingsárum verið rótari hjá hljómsveitum Pétur Kristjánssonar (Pelican,  Paradís,  Póker,  Start...) stofnaði Þórður þungarokkshljómsveitina Þrek.  Ég man ekki ártalið.  Sennilega um eða upp úr 1980.  Síðan hefur Þórður sungið með fjölda hljómsveita.  Þar á meðal Foringjunum,  Rickshow,  Warning, Hljómsveitinni F,  Þukli,  DBD, Skyttunum,  Rokkhljómsveit Íslands og Mazza.  Eflaust er ég að gleyma einhverjum.

  Lagið  "Komdu í partý" með Foringjunum fór hátt á vinsældalista á níunda áratugnum.  Einnig vakti jólaplatan "Pakkaþukl" athygli.  Þar söng Þórður nokkra hressa jólaslagara í þungarokksstíl.  Rokkhljómsveit Íslands átti eitt lag sem fékk ágæta útvarpsspilun.  Ég man ekki hvað það heitir.  En það var eftir gítarleikara hljómsveitarinnar,  Friðrik Karlsson,  sem áður var í Mezzoforte. 

  Núna er Þórður að vinna sólóplötu sem kemur út á næsta ári.  Myndin hér fyrir ofan er frá því að Þórður var að skemmta með hljómsveitinni Kiss.  Þarna er hann á spjalli við Paul Stanley.

  Þórður er vinsæll ökukennari:  www.thordurbogason.com Hann rekur jafnframt hundaræktarfyrirtækið Mjölni,  www.mjolnir.123.is.  Margir kannast við Þórð frá því hann seldi hljóðfæri í verslununum Þreki og Hljóðfæraverslun Reykjavíkur. 

  Til hamingju með afmælið,  Þórður! 

Athugasemdir

[Einar Bragi Bragason., 1.12.2009 kl. 18:17]

hann er flottur

[Jens Guð, 1.12.2009 kl. 23:47]

  Þórður Bogason er frábær.

[Einar Bragi Bragason., 2.12.2009 kl. 00:26]

jamm og veit meira um tónlist en þú(en það má líka segja um flest alla á þessu landi).....tónlist er ekki bara plötualbúm........hvaða eyrna lækni ertu hjá :)

[Jens Guð, 2.12.2009 kl. 02:28]

  Einar Bragi,  ég er bara með 30% heyrn.  Það er oft kostur.  Einkum vegna þess að ég sæki helst harðkjarnarokkhljómleika.  Hávaðinn er mér þess vegna bærilegur. 

  Annað mál er með plötualbúm.  Það er mitt sérsvið.  Ég stúderaði það í 20 ár eða svo.  Lærði margt um það á fjórum árum í MHÍ (fyrirrennara LHÍ).  Hannaði í kjölfar mörg plötuumslög. Þar á meðal þau sem seldu plötur Bubba og Megasar best og hefur ekki verið leikið eftir með sama árangri.  Á að auki bækur,  líklega hátt í 100, um plötuumslög.  Og sennilega hátt í það jafn margar blaðagreinar um hönnun plötuumslaga.  Ég hef getað staðið við,  sannreynt,  ótal oft að hönnun og markaðssetning á plötuumslögum er mér létt dæmi að tryggja tiltekna sölutölu á plötum.  Og ekki bara á plötum.  Líka á hvaða vöru sem er.  Þetta er tiltölulega auðútreiknanlegt dæmi fyrir mig.  Ég kann öll "trixin".  Og ræð betur við þau en flestir aðrir.  Þess vegna gengur allt upp hjá mér sem að þessu snýr.  Ég get fyrirfram gefið upp nokkuð nákvæma tölu á dæminu.  Eins og ég er vanur að gera.   

[Jens Guð, 4.12.2009 kl. 02:09]

  Ég vil bæta þessu við:  Sá sem kann að blása í saxa er ekki endilega sá sem hefur vit á músík.  Alls ekki.  Og alls alls alls ekki í þínu tilfelli.  Maður sem heldur að Stjórnin eða skallapopp sé bitastætt dæmi hefur ekki vit á múisík.  Er óviti í músík.