Þjófar stela músík

  Á sjötta áratug síðustu aldar áttu fáir plötuspilara.  Samt alltaf einhver í hverri sveit.  Í sumum sveitum jafnvel tveir.  Plötueign var af skornum skammti.  Framboð var rýrt og platan dýr.  75 snúninga plasthnullungur.  Þó að hún innihéldi aðeins tvö lög þá þótti fyrirbærið göldrum líkast.  Nágrannarnir fjölmenntu í heimsókn til eiganda plötuspilarans og fengu að hlusta.  

  Í hvert sinn sem þeir hlustuðu þá fengu höfundar söngvanna engan pening.  Ekki flytjandinn heldur.  Hlustendur hlustuðu ókeypis.  Þetta var þjófnaður á höfundarvörðu efni.  Ég hafði áhyggjur af þessu.  Það var ekki gripið í taumana og ennþá eru Soffía og Anna Sigga rændar.  Ég man ekki hvers vegna ég braut plötuna með Soffíu og Önnu Siggu.  Mig minnir að ég hafi notað hana eins og frisby disk.  

  Í sveitum þar sem plötuspilari var á tveimur bæjum var gengið enn frekar á höfundarréttinn.  Plötueigendur skiptust á að lána hver öðrum plötur.  Þeir hlustuðu dögum saman á plötur sem þeir áttu ekki sjálfir.  Alveg ókeypis.  Tónlistarmennirnir á plötunum fengu ekki krónu í sinn vasa þegar menn hlustuðu á lánsplötur.  Þetta var þjófnaður.

  Hægt og bítandi fjölgaði plötuspilurum.  Plötuúrval batnaði.  Til viðbótar við 75 snúninga hnullunginn komu á markað þunnar,  léttar og mjúkar vinylplötur.  Minni gerðin var 45 snúninga.  Stærri gerðin var 33ja snúninga og gat geymt marga söngva.  Jafnframt fjölgaði þjófunum sem hlustuðu ókeypis á plötur sem þeir höfðu ekki sjálfir keypt.

  Ástandið súrnaði þegar menn komust yfir segulbandstæki.  Þau voru kölluð Real-to-Real.  Stór og klunnaleg tæki með stórum spólum.  Segulbönd voru notuð til að afrita músík af plötum.  Segulbandseigendur borguðu tónlistarmönnunum aldrei neitt.  Þetta var þjófnaður.  

  Þegar leið á sjöunda áratuginn flæddu lítil og nett ferðasegulbönd yfir markaðinn.  Þau voru með litlum kassettum.  Kassettutæki voru nánast á hverju heimili.  Flestir notuðu tækin til að hljóðrita lög úr útvarpinu.  Svo voru þessi lög spiluð í tíma og ótíma.  Þetta var þjófnaður á höfundarvörðu efni.  Gríðarmikill og grófur þjófnaður.   

  Á níunda áratugnum kom geisladiskurinn á markað.  Nokkru síðar var hægt að kaupa svokallaða skrifara.  Það var tæki sem gat afritað tónlist af plötum og diskum yfir á "tóma" diska.  Fáir fjárfestu í skrifara.  Kúvending varð þegar tölvan flæddi inn á öll heimili.  Tölvan var með skrifara.  Næstum því allir eiga skrifara í dag.  Upp til hópa er það fólk ósvífnir þjófar.  Þeir afrita heilu plöturnar og skrifa þær á diska.  Þeir ósvífnustu gefa öðrum skrifaða diska.  Tónlistarmennirnir fá ekkert fyrir sinn snúð þegar höfundarvörðu efni er rænt á þennan hátt.

  Á ensku heitir þetta "burn".  Plötubrennur eins og tíðkuðust með Bítlaplötur í Bandaríkjunum fengu nýja merkingu.  

  Nú er internetið helsti vettvangur glæps.  Fólk getur flett upp á allskonar tónlist á netinu og hlustað á hana ókeypis.  Það er hægt að hala tónlist niður og geyma hana.  Það gerir fólk sér til hagræðis.  Þá þarf ekki að leita aftur að laginu.  Eftir situr tónlistarmaðurinn slippur og snauður með grátstaf í kverkunum.  Hann fær ekki aur.  Hann er svangur.   Hann er svekktur og sár,  fúllyndur spældur.  Í hvert sinn sem hlustað er á lag hans þá er hann rændur.  Líka þó að hann hafi áður stolið laginu frá öðrum höfundi.  

  Heiðarlegast er að hlusta á tónlist í útvarpinu.  Því lengur og ákafar sem hlustað er þeim mun heiðarlegra.    

  Næst besti kostur tónlistarmannsins er að helga líf sitt baráttu við að verja bankaræningja.  Brauðmolarnir sem hrökkva af borði bankaræningja geta vegið upp á móti aurunum sem tapast þegar hlustað er ólöglega á stolin lög.  

Færeyskt lag í 1. sæti á bandaríska vinsældalistanum

  Það er ekki á hverjum degi sem færeyskt lag er í toppsætinu á bandaríska internetvinsældalistanum og þriðja sæti á bandaríska almenna vinsældalistanum.  Þetta gerist ekki einu sinni annan hvern dag.  En þetta var nú bara að gerast.  Og gæti gerst aftur.  

  Þannig er að á dögunum kom út plata með bandarísku söng- og leikkonunni Cher.  Platan heitir Closer to the Truth.  Öflugasta lag plötunnar heitir My Love.  Það er eftir færeysku söngkonuna og söngvahöfundinn Gretu Svabo Bech.  

  Closer to the Truth er 26. plata Cher.  Jafnframt hennar fyrsta plata í 12 ár.  Gríðarlegur spenningur var fyrir plötunni.  Hún flaug í toppsæti bandaríska internetvinsældalistans,  3ja sæti digitalvinsældalistans (plötur seldar í stafrænu formi) og 3ja sæti almenna bandaríska vinsældalistans (plötur seldar í föstu formi).  

  Platan hefur verið ofarlega á sölulistum víðar um heim.  Til að mynda er hún í 11. sæti kanadíska vinsældalistans,  13. sæti ástralska digitalvinsældalistans, 17. sæti ástralska almenna vinsældalistans,  19. sæti ítalska almenna vinsældalistans og 20. sæti ungverska almenna vinsældalistans.   

  Stelpan í Miðvági í Færeyjum er í góðum málum. 

  Meira má lesa um Gretu með því að smella á þennan hlekk:  http://jensgud.blog.is/blog/jensgud/entry/1311692/

  Greta er miklu betri söng- og tónlistarkona en Cher.

  

Plötuumsögn

 

  - Plata:  Bárujárn

 - Flytjandi:  Hljómsveitin Bárujárn

 - Útgefandi:  Melur Records

 - Einkunn: ****

 .

  Á níunda áratugnum töluðu Íslendingar iðulega um þungarokk sem bárujárn.  Ég er ekki viss en mér finnst eins og andstæðingar hafi uppnefnt þungarokkið bárujárnsgarg.  Þungarokksunnendur gripu nafnið á lofti og notuðu það í jákvæðri merkingu.  

  Hvort sem ég man þetta rétt eða rangt þá er bárujárn ennþá notað í umræðu um þungarokk.  Sennilega þó einkum af okkur sem erum komnir á eða yfir miðjan aldur.

  Fyrir okkur er hljómsveitarnafnið Bárujárn villandi.  Bárujárn er ekki þungarokkshljómsveit.  Músíkstíllinn er brimbrettarokk (sörf).  Nafnið er orðaleikur;  tilbrigði við leikinn á bárum hafsins.

  Brimbrettarokk var létt og fjörugt rokk í Suður-Kaliforníu í Bandaríkjunum á fyrri hluta sjöunda áratugarins.  Gítarleikarinn Dick Dale fann upp brimbrettarokkið þegar hann kryddaði gítarrokk með arabískum tónum frá Mið-Austurlöndum.  The Beach Boys spiluðu léttpoppaða útgáfu af brimbrettarokki.  Eiginlega var meira "surf" í lagaheitum The Beach Boys en í músíkinni. 

  Brimbrettarokk Bárujárns er hart og allt að því pönkað.  Sver sig mjög í ætt við margt sem gítarleikarinn Link Wray gerði.  Hann var ekki brimbrettarokkari.  Hinsvegar hafði hann mótandi áhrif á brimbrettarokk Dicks Dale og fleiri.  Link var pönkaður og hávær (faðir þvergripsins og gítarriffsins). 

  Styrkur Bárujárns liggur í því hvað músíkin er hrjúf, rokkuð, pönkuð og "lifandi".  Spilagleði geislar af hverjum tóni og kröftugum söng.   

  Fyrir minn smekk er söngurinn hljóðblandaður aðeins of aftarlega.  Hann er öflugur og það er svo sem ekki skaði af því að hafa hann á sama styrk og hljóðfæraleikinn.  Þetta er smekksatriði.

  Þeramín-spil Heklu Magnúsdóttur setur sterkan og skemmtilegan "speis-rokk" svip á músíkáferðina.  Aðrir hljóðfæraleikarar eru trommarinn Leifur Ýmir Eyjólfsson,  bassaleikarinn Oddur S. Lárusson og gítarleikarinn Sindri Freyr Steinsson.  Sindri Freyr syngur jafnframt og á ættir að rekja til Hjaltadals í Skagafirði.  Það er kostur.  Hann er sonur tónlistarmannsins Steins Kárasonar.

  Þeramín er þetta einkennilega rafhljóðfæri þar sem stöng stendur upp úr kassa.  Hendur snerta ekki hljóðfærið heldur nálgast stöngina og spila á hana þannig.

  Daníel Sigurðsson blæs í trompet í laginu  Cha, Cha, Cha.  Blástur hans setur ljúfan blæ á þetta eitt mest grípandi lag plötunnar.  Reyndar eru öll lögin fljóttekin og aðlaðandi.  

  Það mæðir töluvert á hljóðfæraleikurum Bárujárns í þessari músík.  Sindri Freyr þarf að hræra snögghentur í gítarstrengjunum.  Leifur Ýmir (Ýmir er afskaplega flott nafn) keyrir hamaganginn áfram með hröðum og þróttmiklum trommuleik.  Oddur S. Lárusson styður við botninn af öryggi eins og klettur.    

  Upplýsingar á stórbrotnum (í bókstaflegri merkingu) umbúðum eru dálítið "lókal".  Gefið er upp að lagið Út sé kráka (cover song) eftir Pál Ísólfsson.  Það bendir til þess að aðrir söngvar á plötunni séu frumsamdir.  Engar upplýsingar eru þó um það.

  Upptökur eru sagðar hafa farið fram hjá Frikka og Jóa í Hafnarfirði.  Frikki er upptökustjórinn Friðrik Helgason.  En aðeins þeir sem til þekkja vita hver Jói er.

  Upptökur eru sagðar hafa einnig farið fram heima hjá ömmu Steinunnar.  Meira fáum við ekki að vita um það hverjar amman og Steinunn eru.  

  Vegna þess hvað söngur er hljóðblandaður aftarlega er eins og textar skipti litlu máli.  Þeir eru samt ljóðrænir og ágætir.  Orðalag er ekki ungæðislegt.  Það sver sig meira í ætt við þá sem hafa lesið Hávamál eða önnur gömul kvæði.  Dæmi úr söngnum um Vígspá:

  Hún fyllti fleira og fleira

Heimsmynd falla tók.

  Og hljóðmynd frá eyra

Og mun að lokum foldu fylla dreyra.

  Niðurstaða:  Þessi plata er vel heppnuð í flesta staði.  Hún er skemmtileg.  Það skiptir mestu máli. 

        

     

Fjórða lagið á færeysku frá Högna. Magnað lag. Eivör gestasöngvari!

  Færeyski tónlistarmaðurinn Högni Lisberg hefur sent frá sér fjórða og síðasta lag á nýrri Ep-plötu.  Platan er sú fyrsta á farsælum ferli Högna sungin á færeysku.  Þetta er dúndur flott plata.  Verulega mögnuð.  Eins og reyndar fyrri sólóplötur Högna.  Þessi toppar samt dæmið.

  Eivör syngur með Högna í laginu,  Minnið.   Knut Háberg spilar á hljómborð.  Svo skemmtilega vill til að þau þrjú;  Eivör, Högni og Knut, voru saman í þungarokkshljómsveitinni Reverb í Götu fyrir næstum tveimur áratugum.  Þá voru þau 12 ára og spreyttu sig meðal annars á Led Zeppelin og Bob Dylan. 

  Ep-plötu Högna má kaupa á www.hogni.com.  

  Önnur lög af Ep-plötu Högna:   http://jensgud.blog.is/blog/jensgud/entry/1313951/

Sorglegustu söngvar sögunnar

  Þegar ég var krakki,  kannski 4ra til sex ára,  naut lagið "Söngur villiandarinnar" mikilla vinsælda (jú,  ég var einu sinni krakki.  Ég sver það).  Söngvarinn syngur í orðastað villiandar sem lendir í hremmingum vegna grófs ofbeldis byssuóðs veiðimanns.  Textinn er sorglegur.  Ég fór ætíð að skæla þegar lagið var spilað í útvarpinu.  Eldri bróður mínum þótti það verulega fyndið.  Hann vaktaði alla dægurlagaþætti í útvarpinu.  Þegar "Söngur villiandarinnar" var hljómaði kom bróðir minn hlaupandi með útvarp til mín.  Og ég grét með það sama af vorkunn yfir dapurlegum örlögum villiandarinnar.

  Útbreiddasta tónlistarblað heims,  hið bandaríska Rolling Stone,  var fyrir nokkrum mínútum að opinbera val lesenda sinna á sorglegustu söngvum allra tíma.  Niðurstaðan er þessi:

1  Tears In Heaven með Eric Clapton

  Tilefni þessa sönglags er verulega dapurlegt.  Fjögurra ára sonur Erics féll út um glugga á 53. hæð í blokkaríbúð og lést.  Eric tókst á við sorgina með því semja þennan kveðjuóð til sonar síns.  Það hvarflaði ekki að Eric að lagið yrði ofursmellur sem toppaði vinsældalista víða um heim,  sem varð í reynd.  Þetta var aðeins kveðja sem hann varð að koma frá sér og hrópa út í loftið.  Honum þykir gott að syngja lagið.  Það er honum "heilun".   

   

2  Hurt með Nine Inch Nails

  Textinn fjallar um þunglyndi, heróínfíkn söngvarans og sjálfsvígshugsanir.  Johnny Cash krákaði (cover song) lagið síðar og túlkaði frábærlega.  Gerði það að sínu.  Enda þekkti hann yrkisefnið að eigin raun. 

3  Everybody Hurts með REM

  Eins og með fleiri REM söngva er textinn óljós.  Margir túlka hann sem frásögn af ástarsorg.  Einkum unglingar þegar hvolpaást steitir á skeri.  

4  Cat´s In The Craddle með Harry Chapin

5  Something In The Way með Nirvana

6  He Stoped Loving Her með George Jones

7  Black með Pearl Jam

8  Sam Stone með John Prine

9  Nutshell með Alice in Chains

10  I´m So Lonesome I Could Cry með Hank Williams

  Þessi niðurstaða kemur mér að sumu leyti á óvart.  Til að mynda kemst "Seasons In The Sun" með Terry Jacks ekki á blað.  Sá söngur hefur oft verið kallaður sorglegasta sönglag sögunnar.  Reyndar án þess að vísað sé í neitt því til staðfestingar.  Slúðursögur voru í gangi á sínum tíma um að í Bretlandi og í Bandaríkjum Norður-Ameríku hafi verið gripið til ráðstafana svo að dauðvona fólk á sjúkrahúsum og elliheimilum yrði ekki vart við þetta sorglega sönglag.   

Týr fer mikinn á heimsmarkaði

  Í ársbyrjun 2002 höfðu Íslendingar ekki hugmynd um að í Færeyjum væri blómlegt tónlistarlíf.  Það breyttist snarlega þegar Guðni Már Henningsson spilaði lagið  Ormurin langi  með færeysku hljómsveitinni Tý á Rás 2 snemma árs 2002.  Lagið sló svo rækilega í gegn að í árslok var það mest spilaða lag í íslensku útvarpi.  Lagið vakti upp öfluga færeyska tónlistarbylgja,  kölluð færeyska byljan,  hérlendis.  Það sér hvergi fyrir enda á vinsældum færeyskrar tónlistar á Íslandi.

  Fyrir tveimur árum náði færeyska hljómsveitin Týr óvænt 1. sæti á ameríska vinsældalistanum CMJ.  Hann mælir spilun hjá svokölluðum háskólaútvarpsstöðvum í Bandaríkjum Norður-Ameríku og Kanada.  Útvarpsstöðvarnar eru reyndar ekki alfarið bundnar við háskóla heldur einnig aðrar framhaldsskólaútvarpsstöðvar.

  Á dögunum kom út platan  Valkyrja  með Tý.  Hún fer mikinn á heimsmarkaði.

  Hér eru nokkur dæmi um það:

  -  #15 á vinsældalista Billboard,  bandarísks tímarits sem tekur saman hina ýmsu vinsældalista.  Vinsældalistinn með þessari niðurstöðu kallast Heatseeker´s. 

  - #22 á vinsældalista Billboard sem kallast Current Hard Music.

  - #39 á vinsældalsita Billboard sem kallast Overall Hard Music.

  - #70 á vinsældalista Billboard sem kallast "Óháði vinsældalistinn".

  - #4 á alþjóða þungarokksvinsældalista iTunes (metal chart). 

  - #2 á kanadíska iTunes þungarokksvinsældalistanum. 

  - #9 á kanadíska rokkvinsældalistanum. 

  - #72 á almenna kanadíska vinsældalistanum. 

  - #45 á almenna þýska vinsældalistanum. 

  - #76 á almenna svissneska vinsældalistanum. 

  - #26 á kanadíska þungarokksvinsældalistanum. 

Eivör fær dönsk tónskáldaverðlaun

 

 

 

 

 

  Danska tónskáldafélagið heitir DJBFA.  Það er dálítið einkennilegt nafn.  Skýringin á því er sú að þetta er skammstöfun á miklu lengra nafni,  Danske Jazz, Beat og  Folkemusik Autorer.  Félagar í danska tónskáldafélaginu eru nálægt 1500.  Árlega heiðrar félagið þrjú dönsk tónskáld sem hafa skarað fram úr árið áður.  

  Í fyrradag voru heiðursverðlaun veitt tónskáldunum sem stóðu upp úr 2012.  Eitt þeirra þriggja var færeyska álfadrottingin Eivör.  Verðlaunin voru veitt við hátíðlega athöfn fyrir framan 600 gesti.  

  Formaður DJBFA,  Susi Hyldgaard, fór fögrum orðum í lýsingu á færeyska tónskáldinu.  Hún sagði meðal annars eitthvað á þessa leið:  Undir söng Eivarar sitjum við bergnumin.  Við finnum fyrir rigningunni,  sjáum græna hóla og klettana.  Við heyrum í öldunið hafsins... Og mitt í því öllu skynjum við hvernig hún býður okkur velkomin í sitt hlýja hjarta.

  Heiðursverðlaun DJBFA eru gríðarmikil viðurkenning fyrir tónskáldið Eivöru.  Þar fyrir utan fylgir þeim 25 þúsund danskar krónur (525 þúsund íslenskar krónur).  Það er hægt að kaupa eitthvað sniðugt fyrir þann pening.  

   

Færeysk plata til heiðurs og til minningar um bítilinn George Harrison

  Færeyski gítarleikarinn Stanley Samuelsen er annarsvegar þekktur af sólóferli og hinsvegar sem einn þriggja gítarleikara Trio Acoustica.  Stanley hefur sent frá sér átta sólóplötur.  Hann hefur einnig spilað töluvert með ítalska fiðluleikaranum Marco Santini.  Nú hefur Stanley hljóðritað 5 lög eftir breska bítilinn George Harrison.  George spilaði á sólógítar í Bítlunum (The Beatles).  Hann var liðtækur í einstaklega fallegum röddunum Bítlanna. 

  George fór rólega af stað sem söngvahöfundur.  Ekki auðvelt hlutskipti fyrir óöruggan og leitandi söngvahöfund að vera í hljómsveit með tveimur af bestu söngvahöfundum rokksögunnar,  John Lennon og Paul McCartney.  Í hina röndina var það ögrun og stór áskorun að eiga upp á pallborð með þeim á því sviði.  Harrison þurfti að koma með virkilega bitastæða söngva sem stóðust samanburð við það besta eftir Lennon og McCartney.  Harrison stóðst prófið.  Lög hans settu iðulega sterkan og framsækinn blæ á plötur Bítlanna.  Hann fór að mörgu leyti aðra leið í útsetningum en Lennon og McCartney.

  George Harrison fór glæsilega af stað í sólóferil eftir daga Bítlanna.  Virkilega glæsilega með plötupakkanum  All Things Must Pass.  Snilldar pakki 3ja platna.  Þegar frá leið urðu plötur hans mistækari.  Alveg eins og hjá öðrum Bítlum.  Eins og gengur.  En engin samt léleg í tilfelli Harrison. Jú,  kannski Gone Troppo.  

  Á níunda áratugnum stofnaði Harrison hljómsveitina Traveling Wilburys með Byb Dylan,  Jeff Lynne,  Tom Petty og Roy Orbison. 

  Krabbamein dró Harrison til dauða 2001.  Einkasonur hans,  Dhani Harrison,  er giftur íslenskri konu.  Ég man ekki nafn hennar en hún er dóttir Kára Stefánssonar í Íslenskri erfðagreiningu.

  Færeyski gítarleikarinn Stanley Samuelson nýtur liðsinnis dóttur sinnar,  Astrid,  við gerð plötunnar til heiðurs Harrison.  Astrid syngur öll lögin og spilar á gítar.  Þau eru fimm:

  Long Long Long

  Here Comes The Sun

  So Sad

  Beware of Darkness

  Your Love Is Forever

  Hægt er að hlusta á lögin og kaupa þau til niðurhals með því að smella á þessa slóð: 

 https://itunes.apple.com/gb/album/tribute-to-george-harrison/id710444149

Söluhæstu lög allra tíma

  Söluhæsta lag allra tíma er "White Christmas" í flutningi Bings Grosbys.  Þetta lag hefur haldið forystusæti í marga áratugi.  Reyndar með þeirri undartekningu að "Candle in the Wind" með Elton John fór á tímabili fram úr.  Í dag er staðan sú að "White Cristmas" hefur selst í 50 milljónum eintaka á móti 33 milljónum eintaka sölu á "Candle in the Wind" með Elton John. 

  Hér fyrir neðan er listi yfir söluhæstu lög frá og með árinu 1958.  Þessi listi mælir ekki sölu á lögum hvers árs fyrir sig (sölu í árslok) heldur heildarsölu frá því að lagið kom út.  Það er gaman að skoða listann út frá ártalinu vegna þess að plötusala hefur vaxið gríðarlega mikið frá einum áratug til annars.  Bæði fjölgar jarðarbúum hratt og fram eftir sjöunda áratugnum voru aðeins til plötuspilarar á fínni heimilinum og eða þar sem ungt fólk var til heimilis.  Í dag eiga nánast allir einstaklingar tæki til að spila músík af plötu, disk eða iPad...

 1958 Kingston Trio 'Tom Dooley'   8.241.000 points

1959 Bobby Darin 'Mack The Knife'   6.994.000 points

  Ég lauma hér inn kráku (cover song) Marks Lonegans á "Makka hníf" úr þýsku "Túskildingsóperu" Kurts Weills.  Mark heldur hljómleika hérlendis 30. sept.  Það er fyrir löngu löngu löngu síðan uppselt á hljómleikana.  Mark er einn af helstu gruggurum Seattle (grunge).  Þekktastur sem söngvari Screaming Trees.  Hann var að senda frá sér sólóplötu.  Flottasta lagið er þessi kassagítarútfærsla af "Makka hníf":  

 

1960 Elvis Presley 'It's Now Or Never'  10.981.000 points
1961 Elvis Presley 'Surrender'  6.405.000 points
1962 Pat Boone 'Speedy Gonzales'   8.463.000 points
1963 Beatles 'I Want To Hold Your Hand'  14.435.000 points  #5
1964 Beatles 'Can't Buy Me Love'   8.063.000 points
1965 Rolling Stones 'Satisfaction'
1966 Frank Sinatra 'Strangers In The Night'
1967 Scott McKenzie 'San Francisco (Be Sure To Wear Flowers)'  10.303.000 points
1968 Beatles 'Hey Jude'  13.972.000 points  #7
1969 The Archies 'Sugar Sugar'  9.974.000 points
1970 George Harrison 'My Sweet Lord'  11.434.000 points
1971 Carly Simon 'You're So Vain'  7.815.000 points
1972 Hot Butter 'Popcorn'  7.856.000 points
1973 Rolling Stones 'Angie'  9.001.000 points
1974 Terry Jacks 'Seasons In The Sun'  10.678.000 points
1975 Queen 'Bohemian Rhapsody'  9.008.000 points
1976 Abba 'Dancing Queen'  8.739.000 points
1977 Bee Gees 'How Deep Is Your Love'  8.039.000 points
1978 John Travolta & Olivia Newton-John 'You're The One That I Want'  12.139.000 points  #10
1979 Pink Floyd 'Another Brick In The Wall (Part II)'  11.810.000 points
1980 Barbra Streisand 'Woman In Love'  11.227.000 points
1981 Kim Carnes 'Bette Davis Eyes'  10.602.000 points
1982 Culture Club 'Do You Really Want To Hurt Me'  10.543.000 points
1983 Irene Cara 'Flashdance...What A Feeling'  11.953.000 points
1984 Stevie Wonder 'I Just Called To Say I Love You' 11.667.000 points
1985 USA For Africa 'We Are The World'  14.600.000 points  #4
1986 Madonna 'Papa Don't Preach'  8.261.000 points
1987 Whitney Houston 'I Wanna Dance With Somebody'  7.897.000 points
1988 Phil Collins 'A Groovy Kind Of Love'  8.042.000 points
1989 Madonna 'Like A Prayer'  9.520.000 points
1990 Sinead O'Connor 'Nothing Compares 2 U'  10.128.000 points
1991 Bryan Adams '(Everything I Do) I Do It For You'  15.694.000 points  #3
1992 Whitney Houston 'I Will Always Love You'  16.547.000 points  #2
1993 UB 40 '(I Can't Help) Falling In Love With You'  10.353.000 points
1994 All-4-One 'I Swear'  10.872.000 points
1995 Coolio feat. L.V. 'Gangsta's Paradise'  12.942.000 points  #9
1996 Los Del Rio 'Macarena'  14.126.000 points  #6
1997 Elton John 'Candle In The Wind 1997'  21.314.000 points  #1
1998 Celine Dion 'My Heart Will Go On'  11.256.000 points
1999 Britney Spears 'Baby One More Time'  8.918.000 points
2000 Madonna 'Music'  7.414.000 points
2001 Kylie Minogue 'Can't Get You Out Of My Head'  8.123.000 points
2002 Shakira 'Whenever Wherever'  8.541.000 points
2003 Outkast 'Hey Ya!'  6.817.000 points
2004 Maroon 5 'This Love'  7.791.000 points
2005 James Blunt 'You're Beautiful'  9.469.000 points
2006 Shakira feat. Wyclef Jean 'Hips Don't Lie'  9.845.000 points
2007 Timbaland feat. OneRepublic 'Apologize'  10.912.000 points
2008 Leona Lewis 'Bleeding Love'  10.420.000 points
2009 Black Eyed Peas 'I Gotta Feeling' 13.044.000 points  #8
2010 Eminem feat. Rihanna 'Love The Way You Lie'  9.067.000 points
2011 Adele 'Rolling In The Deep' 11.969.000 points
2012 Carly Rae Jepsen 'Call Me Maybe'  11.611.000 points
2013 Robin Thicke feat. T.I. & Pharrell Williams 'Blurred Lines'

Nýtt lag frá Högna Lisberg, MTV og Opna bandaríska tennismótið

 

 

 

 

 

 

 

  Fyrir nokkrum dögum skrifaði ég bloggfærslu um ný lög sem færeyska söngvaskáldið,  söngvarinn og trommuleikarinn Högni Lisberg er að senda frá sér.  Um það má lesa með því að smella á slóðina:  http://jensgud.blog.is/blog/jensgud/entry/1310157/ 

  Ég mæli með því að þið lesið þá bloggfærslu áður en lengra er haldið hér.  Svona til að allt sé í réttu samhengi. 

   Lag Högna sem þar er kynnt til sögunnar,  Fólkið í Sprekkunum,  kraumar undir Topp 30 vinsældalistanum á Rás 2.  Magnað lag.  Smellið á þessa slóð og kjósið lagið:  http://www.ruv.is/topp30?mottekid=1 

  22. ágúst sendi Högni frá sér annað flott lag,  Drukni.  Það má heyra með því að smella á:  http://www.youtube.com/watch?v=oVnJp2jPX80

  Núna var Högni að senda frá sér 3ja lagið á færeysku,  Villir hundar.  http://www.youtube.com/watch?v=__kcAJ_WlHA

  Til viðbótar þeim upplýsingum sem komu fram í bloggfærslunni er vitnað er til hér efst þá hefur bandaríska sjónvarpsstöðin MTV verið dugleg við að spila lög Högna.  Líka evrópska MTV.  Þar fyrir utan hefur bandaríska tennissambandið US Open Tennis Campaigns gert út á lög Högna bæði í ár og í fyrra.  Þetta má sjá með því að smella á:  http://vimeo.com/73317624

  Til að hnýta allt í samhengi er gott að hverfa röskan áratug aftur í tímann og rifja upp þegar Högni kom sterkur inn á markaðinn sem trommuleikari trip-hopp hljómsveitarinnar Clickhaze.  Eivör söng og þau Högni höfðu áður verið saman í hljómsveitinni Reverb þar sem Eivör öskraði Led Zeppelin lög í bland við Bob Dylan ballöður í þorpinu Götu á Austurey.