Hrútur heimsótti prest

  Á þessum árstíma eru hrútar hafðir í húsi.  Oftast svokölluðum hrútakofa.  Þar eru þeir í góðu yfirlæti.  Fengitími kinda nýafstaðinn og hrútarnir nokkuð sáttir.  Þeim er fært á silfurfati gott hey og una hag sínum vel.  Á sumum bæjum er hrútunum hleypt út daglega til að drekka íslenskt ferskvatn í nálægum læk.  Það kunna þeir vel að meta.  Þeir vita fátt betra og hollara en íslenskt ferskvatn.  Enda vita þeir ekki að bjór er ennþá betri og hollari svaladrykkur.

  Í héraðsblaðinu Skessuhorni á Vesturlandi segir frá hrúti sem brá sér óvænt í bæjarferð.  Hann heimsótti prestinn á Grundarfirði.  Ekki fer sögum af því hvað þeim,  hrútnum og presti,  fór á milli.  Né heldur hvort hrúturinn taldi sig eiga einhverja harma að hefna hjá presti eða hvort um sakleysislega kurteisisheimsókn var að ræða.  Ekki fylgdi heldur sögu hvort hrúturinn og presturinn stönguðust á.  Hrútum þykir fátt skemmtilegra en stangast á.  Ég veit ekki með presta.

  Hitt veit ég;  að á færeysku kallast hrútur veðrur.  Það er framborið vegrur.  Síðar í vikunni læt ég húðflúra á vinstri framhandlegg merkið hér fyrir ofan.  Það mun "harmónera" vel við hægri handlegginn sem skartar húðflúruðu landakorti af Færeyjum.

Athugasemdir

[Helga Kristjánsdóttir, 2.2.2010 kl. 02:26]

  Ég borðaði um helgina hrút
  og hellt í mig rauðvíni af stút,
  ég vissi að ég væri
  vandlát á læri,
  en þetta sló öllu út.
  
                                    Ef til vill undaneldi þessarar myndar skepnu.
 

[Kama Sutra, 2.2.2010 kl. 05:05]

Þökkum fyrir á meðan hrútarnir (og prestarnir) detta ekki í mjólkurþambið.

[Jens Guð, 2.2.2010 kl. 11:44]

  Helga,  takk fyrir limruna.

[Jens Guð, 2.2.2010 kl. 11:46]

  Kama Sutra,  ég hef lengi vitað að mjólk er varasöm. 

[Helga Kristjánsdóttir, 2.2.2010 kl. 16:48]

Þetta minnir mig á snillinginn Dave Allen. Ef guð hefði skapað konuna fyrst,þá byrjaði frenjan að heimta  já og svo 3 svona.

[Jens Guð, 2.2.2010 kl. 17:21]

  Helga,  takk fyrir það!