Plötuumsögn

Titill:  The Blue Ridge Rangers Rides Again

Flytandi:  John Fogerty

Einkunn:  *** (af 5)

  John Fogerty var forsprakki bandarísku blúsrokksveitarinnar Creedence Clearwater Revival:  Höfundur söngvanna,  útsetjari,  söngvari og gítarleikari.  CCR naut ofurvinsælda 1968 - ´72.  Raðaði lögum og plötum í efstu sæti vinsældalista þvers og kruss um heiminn.  Lögin og plöturnar teljast til klassískra verka rokksins.  Ótal þekktar poppstjörnur hafa gert það gott með lögum úr smiðju CCR.  Má þar nefna Presley og Tínu Turner (Proud Mary) og The Ramones (Have You Ever Seen The Rain).  Íslenska hljómsveitin Gildrumezz gerði alfarið út á CCR lög.

  John Fogerty er magnaður lagahöfundur.  Lög hans eru einföld, auðlærð og grípandi en ekki leiðigjörn.  Þar munar um öflugar útsetningar.  Hráar og það sem kallast "americana":  Ópoppuð bandarísk (og kanadísk) rótarmúsík (back to the basic);  Blúsað rokk með kántrý-keim.  Það má einnig kalla þetta suðurríkjarokk.

  Söngur Johns er einn sá flottasti í rokkinu:  Rifinn og þróttmikill.  Kallinn hefur ekkert fyrir því að öskra út í eitt.  Til viðbótar er John dúndurgóður gítarleikari og liðtækur á ýmis önnur hljóðfæri. 

  John hefur áberandi sérkenni á öllum sviðum:  Söng,  gítarleik,  útsetningum og lagasmíðum.  Plötufyrirtæki dró hann eitt sinn fyrir dóm.  Kærði hann fyrir að stela lagi frá sjálfum sér.  Hann vann málið.  Sannað þótti að höfundareinkennin væru svo sterk að í fljótu bragði gæti fólk ranglega ályktað sem um sama lag væri að ræða.  Höfundareinkenni Johns skína alltaf í gegn.  Líka þó til að mynda Status Quo hafi náð að gera  Rockin´ All Over the World  að sínu.  Lag sem er einnig baráttulag fótboltaliðs á Akranesi.

  Síðasta plata CCR,  Mardi Grass,  var bastarður.  Aðrir liðsmenn hljómsveitarinnar voru ósáttir við að vera eins og "session" menn.  Þeim þótti CCR starfa eins og sólóverkefni Johns.  Þeir vildu fá að koma sínum lögum að.  John féllst á það með semingi.  Lög hinna drógu plötuna verulega niður.

  Þetta óheillaskref olli leiðindum og John yfirgaf CCR 1972.  Síðan hefur lítið til þeirra hinna spurst.  Þeir hafa haldið úti hljómsveit sem spilar gömul CCR lög.  Með lítilli reisn.

  Fyrsta sólóplata Johns var gefin út undir hljómsveitarnafninu The Blue Ride Rangers.  Þar krákaði (cover) hann þekkta kántrý-slagara og spilaði á öll hljóðfæri.  Þetta hafði eitthvað að gera með að hann var samningsbundinn öðru plötufyrirtæki.  Hann mátti ekki gefa út plötu hjá öðru plötufyrirtæki undir eigin nafni með frumsömdu efni.

 

  Blue Ridge Rangers  kom út 1973.  Tveimur árum síðar hóf John að senda frá sér sólóplötur með frumsömdu efni.  Flestar góðar.  Nú hefur hann aftur snúið sér krákunum.  The Blue Ridge Rangers Rides Again  inniheldur gamla kántrý-slagara eftir John Denever,  Rick Nelson,  Buck Owens og fleiri.  Eitt lag,  Change in the Weather,  er frumsamið.  Það ber af.  Það kom áður út á hans sístu sólóplötu,  Eye of the Zombie. 

  Ég átta mig ekki á hvers vegna einn af bestu lagahöfundum rokksins er að senda frá sér krákuplötu.  Á plötum CCR kom vel út að hafa með í bland eina og eina kráku með eftir Leadbelly,  Little Richard,  Marvin Gaye og Screaming Jay Hawkins.  En heil plata með gömlum slögurum eftir aðra er ekki besti kostur þegar John Fogerty á í hlut.  Hvert og eitt lag er ágætt út af fyrir sig.  Flutningurinn er í einskonar mjúkpoppuðum gír.  Samt "americana".  Hljóðfærin eru kassagítar,  mandólín,  stálgítar og fiðla  auk trommu og bassa,  svo og rafgítar í einstaka lagi.

  Söngurinn er allt að því raul.  John beitir hvergi sínum frábæra öskursöngstíl.  Gestasöngvarar eru Don Henley (The Eagels),  Tomothy B. Schmit og Brúsi "frændi" (Bruce Springsteen). 

  Í samanburði við aðrar plötur Johns er þessi frekar flöt og "venjuleg".  Ekki beinlínis poppuð.  En samt poppuð í samanburði við aðrar plötur Johns.  Ég ráðlegg fólki að kaupa aðrar plötur Johns.  Þeir sem eiga hinar plötur Johns og kunna vel að meta ættu að bíða með að kaupa þessa þangað til hún lendir á útsölu.  Hún er ekki leiðinleg.  Flestar aðrar plötur Johns eru skemmtilegri.

Athugasemdir

[JR (IP-tala skráð) 19.5.2010 kl. 00:03]

,, Í samanburði við aðrar plötur Johns er þessi frekar flöt og "venjuleg".  Ekki beinlínis poppuð.  En samt poppuð í samanburði við aðrar plötur Johns.  Ég ráðlegg fólki að kaupa aðrar plötur Johns.  Þeir sem eiga hinar plötur Johns og kunna vel að meta ættu að bíða með að kaupa þessa þangað til hún lendir á útsölu.  Hún er ekki leiðinleg.  Flestar aðrar plötur Johns eru skemmtilegri."

Hér skrifar Ragnar Reykás !

,,frekar flöt og "venjuleg".  ,,Ekki beinlínis poppuð"  ,,En samt poppuð"  ,,Hún er ekki leiðinleg.  Flestar aðrar plötur Johns eru skemmtilegri.""

[Jens Guð, 19.5.2010 kl. 12:29]

  JR,  þú ert að teygja þig of langt í einbeittum vilja til að lesa Ragnar Reykás út úr þessu.  "Ekki beinlínis poppuð.  En samt poppuð í samanburði..."  Það er ekki mótsögn í þessu heldur útskýring á fyrirbærinu.  Þarna eru gefið upp að platan sé poppuð í samanburði við aðrar plötur Johns.  Sama er að segja um niðurlagið.  Platan er ekki leiðinleg en til samanburðar eru flestar aðrar plötur Johns skemmtilegri.

  Það á ekki að vera erfitt að ná þessu.  En lesskilningur fólks er mis vel þroskaður.  Það fer oft eftir aldri. Ung börn hafa takmarkaðri lesskilning en stálpuð börn.  Stálpuð börn hafa takmarkaðri lesskilning en fullorðnir.  Og svo framvegis.

[Siggeir (IP-tala skráð) 19.5.2010 kl. 23:52]

Ég veit alveg af hverju Fogerty er að senda frá sér cover plötu en ekki frumsamið efni. Það er ekki arða af frumleika eða skáldagáfu eftir í honum. Hann er algjörlega útbrunninn sem höfundur. Hann sprengdi sig gjörsamlega með CCR þar sem hann pumpaði út 30 slögurum á 5 árum. Svo var tankurinn bara tómur og gamli neyddist til að flytja í einhvern fjallakofa bara til þess að halda sönsum.

 Hann má nú samt eiga það að hann er ennþá flottur performer, svona miðað við aldur og fyrri störf.

[Jens Guð, 20.5.2010 kl. 00:38]

  Siggeir,  þetta er ekki rétt hjá þér.  Kallinn á ennþá auðvelt með að semja flott lög.  Sólóferill hans geymir alveg jafn mörg og jafn góð lög og ferillinn með CCR.  Nægir að nefna lag eins og  Rockin´ All Over the World  og plötuna  Centerfield  í heilu lagi.