"Hún getur ekkert!"

  Það var rosalega gaman að taka þátt í atkvæðatalningu í Ráðhúsinu í borgarstjórnarkosningunum um helgina.  Ég var svokallaður "Umboðsmaður framboða".  Nokkru munaði að þarna var nóg og gott að bíta og drekka:  Lambalæri,  smurbrauð af öllu tagi,  úrval gosdrykkja,  kökur,  súkkulaðikex,  hnetumix,  kaffi,  te,  bjór,  Breezer,  koníak,  viský...  Æ,  þarna tók óskhyggjan völd.  Síðasttöldu drykkirnir voru ekki í boði.

  Því miður varð ég ekki var við eina einustu vísu.  Gamalreyndir talningamenn undruðust vísnaleysið.  Þess í stað var áhugavert að skoða ógilda atkvæðaseðla.  Ýmsir höfðu merkt ákveðið við tiltekinn flokk en strikað yfir nafn eða nöfn hjá öðrum flokki.  Það má ekki.  Það má einungis eiga við þann lista sem viðkomandi kýs.  

  Skemmtilegasti ógildi seðillinn sem ég sá var þannig að kyrfilega var merkt við H-listann en við nafn Hönnu Birnu á D-lista hafði verið skrifað skýrum stöfum:  "Hún getur ekkert!"

  

  

Besti og Samfylking ræða saman

Athugasemdir

[Brjánn Guðjónsson, 31.5.2010 kl. 21:28]

það hefur verið seðill Ólafs Eff.

[Hannes, 31.5.2010 kl. 21:40]

Hahahaha. Ég er viss um að þetta hefur verið fífl sem skrifaði þetta.

[alla (IP-tala skráð) 1.6.2010 kl. 07:07]

Fyrirgefðu, en mátt þú þetta? Enginn túnaður? Hélt að yfrikjörstjón væri ein um að tjá sig um seðla og talningu? 

[Ásthildur Cesil Þórðardóttir, 1.6.2010 kl. 09:13]

Þöggunin allstaðar ekki satt?  Hvar er málfrelsið?  Geymt ofan í skúffu og læst með þremur lyklum?  Já sennilega.

[Tobbi (IP-tala skráð) 1.6.2010 kl. 09:40]

„Þöggunin allstaðar ekki satt? Hvar er málfrelsið? Geymt ofan í skúffu og læst með þremur lyklum? Já sennilega.“ !!!

Þetta er dálítið merkilegt viðhorf.  Um sumt ríkir trúnaður.  Ekki síst um hvernig fólk kýs í leynilegum kosningum.  Ættu menn ekki að virða  trúnað?  Er það skortur á málfrelsi að geta ekki gasprað um leyndarmál?  Ég þakka fyrir að eiga ekki leyndarmál undir hinni annars vafalaust ágætu Ásthildi.

[Jens Guð, 1.6.2010 kl. 11:04]

  Brjánn,  þú er stríðinn

[Ásthildur Cesil Þórðardóttir, 1.6.2010 kl. 11:04]

Ég get alveg þagað yfir leyndarmálum, prívat.  Þetta aftur á móti er eitthvað sem mér finnst ekki teljast til slíks.  Enda sagði Jens aðeins frá setningu sem skrifuð var á kjörseðil.  En af því að enginn má tala nema yfirkjörstjórn, þá var þetta óviðurkvæmilegt.  Alveg eins og öll hin leyndarmálin sem ekki má segja frá af því að einhvernir aðrir mega bara segja frá. 

Þetta er því að mínu mati að bera saman epli og appelsínur.

[Jens Guð, 1.6.2010 kl. 11:04]

  Hannes,  viðkomandi klúðraði að minnsta kosti atkvæði sínu.  Ógilti seðilinn.

[Jens Guð, 1.6.2010 kl. 20:04]

  Alla,  ég hef ekki skrifað undir neina skilmála um þagmælsku eða fengið fyrirmæli um slíkt.  Þegar talning var að hefjast framkvæmdi lögreglan líkamsleit;  símar voru fjarlægðir og eitthvað svoleiðis.  Við vorum innsigluð fram að því er fyrstu tölur voru gefnar upp.  Fólk fékk ekki einu sinni að fara á klósett nema í lögreglufylgd.

  Þegar fyrstu tölur voru gefnar upp slaknaði á öllu.  Frambjóðendur mættu á svæðið ásamt fjölmiðlafólki og nokkrir nýir talningamenn höfðu vaktaskipti við aðra sem fóru þá heim.  

[Jens Guð, 1.6.2010 kl. 20:16]

  Ásthildur,  ég sé ekkert athugavert við að brosa yfir ógildum atkvæðaseðlum.  Það er bara gaman.  Alveg eins og vísur sem oft hafa verið krotaðar á atkvæðaseðla og einstaka talningamenn safnað í áranna rás.

[Jens Guð, 1.6.2010 kl. 20:26]

  Tobbi,  leynilegar kosningar þýða fyrst og fremst að kjósandinn,  sem einstaklingur,  fái að eiga það við sig einan hvernig og hvað hann kýs.  Sú leynd er óskert þó lesin sé opinberlega upp vísa sem kjósandinn hefur skrifað á kjörseðilinn eða hvort einhver - sem enginn veit hver er - ógildi atkvæðaseðil sinn á annan hátt.  Né heldur hvað margir skiluðu auðu eða hvað margir strikuðu út nöfn tiltekinna frambjóðenda.  Það má skilgreina sem opið lýðræði að upplýst sé eins og best er hægt hvernig kjósendur umgangast atkvæðaseðla sína hverju sinni. 

[Ben.Ax. (Benedikt Jóhannes Axelsson), 1.6.2010 kl. 21:03]

Sæll. Þetta er hluti af stefnu Besta flokksins.

Besti Flokkurinn er frjálslyndur og heiðarlegur lýðræðisflokkur sem vinnur að stöðugum umbótum á samfélaginu og lausn sameiginlegra viðfangsefna þjóðfélagsins á jafnréttisgrundvelli, með víðsýni að leiðarljósi.

Við lofum að stöðva spillingu. Við munum gera það með því að stunda hana fyrir opnum tjöldum. Við viljum opna Kvennastofu þar sem konur geta komið og fengið sér allskonar kaffi með bragðefnum eins og vanillu og kanil. Og svo mega þær tala eins og þær vilja og það verður allt tekið upp og geymt. Við ætlum að skipuleggja óvissuferðir fyrir gamalmenni. Í rauninni erum við samt ekki með neina stefnu en við þykjumst vera með hana. Við hlustum á þjóðina og gerum eins og hún vill því þjóðin veit best hvað er sér fyrir bestu. Við getum boðið meira af ókeypis en allir aðrir flokkar því við ætlum ekki að standa við það. Við gætum haft þetta hvað sem er, til dæmis ókeypis flug fyrir konur eða ókeypis bílar fyrir fólk sem býr útá landi. Það skiptir ekki máli.

Besti Flokkurinn er besti vettvangurinn undir lýðræðislega umræðu, Besti flokkurinn er bestur fyrir þig!

Ég stofnaði Besta flokkinn af því að mig langar að fá vel launað starf og að komast í áhrifastöðu þar sem ég get hjálpað vinum og vandamönnum með ýmislegt. Mig langar líka að vera með aðstoðarmann.

 Er þetta það sem við viljum?

[Jens Guð, 1.6.2010 kl. 22:07]

  Ben Ax,  þetta hljómar ekkert verr en:  "Spilling í reykfylltum bakherbergjum",  "Ég veit ekkert hverjir mútuðu mér.  Það voru aðrir sem sáu um það fyrir mig".

[Tobbi (IP-tala skráð) 5.6.2010 kl. 00:29]

„Tobbi, leynilegar kosningar þýða fyrst og fremst að kjósandinn, sem einstaklingur, fái að eiga það við sig einan hvernig og hvað hann kýs.“

Þetta er að sönnu rétt, en þó ekki allur sannleikurinn.  Tilgangurinn með leynilegum kosningum er að enginn nema kjósandinn viti hvað hann kaus.  Þannig verður að tryggja það að ekki sé hægt að merkja atkvæði þannig að unnt sé að vita hvernig tiltekinn kjósandi greiddi atkvæði.  Þannig gæti einhver lofað, gegn peningagreiðslu eða loforði um að verða ekki rekinn úr vinnu (og slíkt var fullkomlega aktúelt vandamál í árdaga leynilegra kosninga) að gera atkvæði sitt ógilt með því að letra tiltekna vísu, eða umsögn um borgarstjórann, á atkvæðaseðilinn. -Meira vað segja var þetta svo strangt í upphafi að ef krossinn fyllti ekki nákvæmlega upp í ferninginn á seðlinum var atkvæðið ógilt.-  Komist slík vísa, eða umsögn, á flot liggur ljóst fyrir hvernig tiltekinn einstaklingur greiddi atkvæði.  Skiptir ekki máli í þessu sambandi þótt aðeins fáir viti af meintu loforði.  Vísur sem eru letraðar á lausa miða og settar inn í atkvæðaseðil, og gera hann því ekki ógildan, eru hins vegar sumar skemmtilegar og ekkert athugavert við að halda þeim uppi

[Jens Guð, 5.6.2010 kl. 23:56]

  Tobbi,  ég veit ekkert um þessar reglur.  Hef ekkert kynnt mér þær.  Þegar kom að vafaatkvæðum var okkur sagt að mestu skipti að vilji kjósandans væri skýr fremur en hvort x fyllti út í reitinn,  færi örlítið út fyrir reitinn eða merkt væri við með V eða broskalli eða hjarta...  Ég varð ekki var við að ágreiningsmál kæmu upp varðandi þetta.  Fremur en í þeim tilfellum þar sem atkvæðaseðlar voru augljóslega ógildir.  Þetta gekk allt ljúft fyrir sig.