Góð úrslit í Söngkeppni framhaldsskólanna

  Ég var svo heppinn að sjá fyrir tilviljun í Stöð 2 síðasta hluta Söngkeppni framhaldsskólanna.  Ég er ekki með áskrift að Stöð 2 og vissi ekki af keppninni.  Ennþá síður vissi ég að hún væri send út í opinni dagskrá.  Ég hef ekki lagt mig eftir að fylgjast með Söngkeppni framhaldsskólanna undanfarin ár.  Það er eins og mig minni að vinningslögin séu yfirleitt einhverjir væmnir vellusöngvar.  Kannski er það rangminni.  Hvort sem er þá er ég ánægður með vinningshafann í ár.  Sá heitir því flotta nafni Dagur Sigurðsson og keppti fyrir hönd Tækniskólans með uppáhalds Bítlalaginu mínu,  Helter Skelter.

  Samkvæmt reglum keppninnar eru einungis söngtextar á íslensku gjaldgengir.  Það er góð regla.  Hana mætti endilega taka upp í Músíktilraunum.  Íslenski textinn hans Dags kallast  Vitskert vera.  Með Degi er kominn fram á sjónarsvið þróttmikill rokksöngvari sem er til alls vís.  Hljómsveitin að baki honum var hinsvegar full session-leg.  En fín út af fyrir sig.  Vantaði bara smá greddu í rokkið hjá þeim. 

http://www.visir.is/section/MEDIA99&fileid=CLP3381

Dagur vann Söngkeppnina

Athugasemdir

[Sigurður I B Guðmundsson, 11.4.2011 kl. 20:42]

Er hægt að hlusta á Dag einhversstaðar og hefði hann unnið ef hann hefði tekið eitthvað lag með ABBA?

[Jens Guð, 11.4.2011 kl. 23:01]

  Sigurður I.B.,  smelltu á hlekkinn fyrir ofan myndbandið með Bítlunum.  Ef Dagur hefði tekið ABBA-lag í útsetningu Ham er næsta víst að sigurinn hefði verið í höfn.

[Sigurður I B Guðmundsson, 12.4.2011 kl. 10:03]

Strákurinn er þæl góður.

[Freyr (IP-tala skráð) 12.4.2011 kl. 13:20]

Vann ekki Eyþór Ingi með When a blind man cries hér um árið. Eitthvað Purple lag var það alla vega þannig að ekki er það bara væmið rusl sem vinnur þetta

[Kaja (IP-tala skráð) 12.4.2011 kl. 13:52]

Hey þú bloggaðir nú um keppnina í fyrra. Þú fylgist augljóslega alltaf með þessu.

[Jens Guð, 13.4.2011 kl. 01:08]

  Freyr,  það er eins og mig hálf rámi eitthvað í þetta Deep Purple dæmi.

[Jens Guð, 13.4.2011 kl. 01:10]

  Kaja,  ég man eftir að hafa bloggað um vinningslagið í fyrra.  Ákall söngvarans til föður síns.  Ég man þó ekki hvort ég fylgdist sérstaklega með allri keppninni.  Kannski hef ég fylgst meira með keppninni en mig minnir.