Bráðskemmtilegar uppfinningar sem markaðurinn hafnaði

  Á hverju einasta ári finna snjallir menn (yfirleitt letingjar) upp tæki, tól og aðferðir til að létta sér og öðrum lífið.  Bestu hugmyndirnar eru iðulega keyptar af framsýnum fyrirtækjum og settar á markað.  Þá kemur stundum í ljós það sem lætur mörgum bregða illilega í brún:  Enginn kaupir nýju vöruna og hún dettur út af markaðnum með skömm.

  Hér eru nokkrar frábærar hugmyndir sem markaðurinn hafnaði:

  Konur - jafnt sem karlar - eru alltaf í vandræðum með að lita á sér varirnar.  Liturinn fer út um allt;  út á kinnar og upp að nefi.  Oftar en ekki er alltof mikið af lit öðru megin en of lítið hinu megin.  Japanskt fyrirtæki setti á markað þetta ódýra og þægilega varalitaskapalón.  En fólk vildi heldur klessumála varirnar út um allt,  illa og kjánalega.

  Hver kannast ekki við það að tárfella þegar laukur er skorinn í smátt?  Er það út af slæmum minningum tengdum lauk?  Það veit enginn.  Kannski eru það bældar minningar.  En útlendur gleraugnaframleiðandi hóf framleiðslu á sérhönnuðum augnhlífum fyrir þá sem skera lauk.  Þær liggja svo þétt að húðinni að uppgufun frá lauknum nær ekki að erta augun.  Enginn keypti þessar augnhlífar.  Hinsvegar jókst sala á sundgleraugum.

  Þegar kókoshnetur falla af trjám (kókoshnetutrjám,  vel að merkja) lenda þær á jörðinni.  Þá þarf að beygja sig til að tína þær upp.  Það reynir óþægilega á bakið.  Þess vegna var þetta kókoshnetunet búið til.  Maður spennir það á sig,  gengur að næsta hnetutré,  hristir það og hneturnar falla í netið.  Kaupendur skortir.

  Gallinn við regnhlífar er margþættur.  Í fyrsta lagi er maður sjaldnast með regnhlífina á sér þegar byrjar óvænt að rigna.  Í öðru lagi hættir fólki til að bera regnhlífarnar fyrir sig þegar gengið er á móti regni.  Það skapar hættu.  Útsýni er lítið sem ekkert.  Hugvitssamur regnhlífaframleiðandi leysti málið með því að bæta útsýnisglugga á regnhlífina.  Þetta er svo flott að það þarf ekki að rigna til að fólk geti borið regnhlífina með stolti.  Enginn vill aftur á móti kaupa þessa regnhlíf.  Illar tungur kenna um að það vanti rúðuþurrkur á glæra hlutann.  Regnið birgir útsýnið.

  Síðhært fólk á við það vandamál að stríða að hárið flækist stöðugt í mat og drykk,  hvort sem er á matmálstíma eða ekki.  Það er assgoti þreytandi að vera sífellt að sjúga mat úr hárinu á sér.  Á hippaárunum komust síðhærðir prestar upp á lag með að færa aftari hluta prestkragans fram á enni á matmálstímum.  Þannig vörðu þeir matinn fyrir hári.  Fyrirtæki nokkurt sá sér leik á borði og hóf framleiðslu á krögum fyrir síðhærða í þessum tilgangi.  Bleika kraga fyrir konur og bláa fyrir karla.  Enginn keypti kragana.

  Í hraða nútímaþjóðfélags fylgja því ýmis vandamál að borða spaghettí.  Aðal vandamálið er að það er enginn tími aflögu til að bíða eftir því að nýsoðið spaghettí kólni.  Japanskur framleiðandi hóf framleiðslu á nettri kæliviftu sem fest er á prjón eða gaffal.  Viftan kælir spaghettíið á meðan það er tekið upp af matarskálinni og lyft upp í munn.  Enginn sýndi tækinu áhuga.

  Fatabúð er vandfundin á Íslandi.  Einhverjum datt í hug að opna sænska fatabúð í Smáralind.  Hugmyndin var dauðadæmd frá upphafi.  Það eiga allir Íslendingar föt.  Þetta er jafn fráleitt og að selja Grænlendingum frystikistur og aröbum sandpappír.  Enda hefur enginn keypt föt í sænsku fatabúðinni í Smáralind. 

(Ljósm:  Tobba Marinós)    

Athugasemdir

[Jóhann Kristjánsson (IP-tala skráð) 19.11.2011 kl. 22:28]

Man eftir einni mjög tilgangslausri uppfinningu. Það var nokkurskonar handfang sem smellt var á mjólkurfernur. Þetta var mjög vinsælt í svona 2 vikur. Eftir þann tíma fattaði fólk að það væri tilgangslaust að eyða tíma í að vesenast í að setja handfangið á fernurnar, sem oftar en ekki mistókst og mjólk flæddi um öll borð.

[Jens Guð, 19.11.2011 kl. 22:51]

  Jói,  takk fyrir að rifja upp þetta skemmtilega og algjörlega tilgangslausa handfang

[Billi bilaði, 19.11.2011 kl. 23:39]

Pabbi notaði þetta bláa mjólkurfernuhandfang í fjölda ára á sínum efri árum. Það nýttist honum afar vel.

[Jens Guð, 20.11.2011 kl. 00:28]

  Billi,  það er frábært að einhver náði að nýta sér þetta plasthangfang.

[Dagný (IP-tala skráð) 20.11.2011 kl. 00:35]

Ég gæti alveg hugsað mér að fá svona plasthandfang, ef einhver á svoleiðis liggjandi í geymslu hjá sér.

[Jóhann Kristjánsson (IP-tala skráð) 20.11.2011 kl. 00:57]

Plasthandfangið hefur þá ekki verið svo tilgangslaust eftir allt, ef marka má athugasemdirnar hér að ofan? . Meira segja eftirspurn eftir slíku apparati. Man reyndar eftir einu skemmtilegu sem mig langar að segja frá. Eitt sinn ákvað ég að taka utan af barnabílstólnum og mér til undrunar sá ég að undir áklæðinu var risa límmiði með áletruninni " ONLY FOR CHILDREN ". Fyrir utan hversu sniðug áminningin er þá var staðsetning hennar til þess að toppa snilldina!

[Jens Guð, 20.11.2011 kl. 01:59]

  Dagný,  það eru áreiðanlega til tugþúsundir svona plasthandfanga í geymslum landsmanna (ásamt fótanuddtækjum,  Soda Stream,  bumbu-bönum og svo framvegis).

[Jens Guð, 20.11.2011 kl. 02:12]

  Jói,  takk fyrir skemmtilega sögu.  Eitt sinn var keypt inn á heimilið rafmagnshárþurrka.  Á áberandi stað á umbúðum stóð "Warning!".  Undir þeim texta stóð að ekki megi taka hárþurrkuna með í sturtu.

  Eins og þú veist þá er ég með litla heildsölu á Aloe Vera vörum.  Fyrir nokkrum árum var byrjað að merkja ofan á kassana (6 flöskur í kassa) að til að opna kassana skuli rjúfa límband ofan á þeim.  Mér þóttu fyrirmælin sérkennileg og liggja í augum uppi.  Þess vegna spurði ég framleiðandann út í þetta.  Svarið sem ég fékk var að vandamál hefði komið upp varðandi verslunarkeðju sem seldi vöruna.  Þar á bæ opnaði fólk kassana með rafmagnssög.  Sneiddi ofan af kössunum með söginnni og skemmdi flöskurnar þegar rafmagnssögin rakst í þær.  Þá vildi verslunarkeðjan skila skemmdu flöskunum.  Ég man ekki hvort að þetta leiddi til málaferla.  En framleiðandinn fríaði sig frá vandræðum með umræddri merkingu.