Foringjarnir

  Það er margt skemmtilegt og áhugavert við þútúpuna.  Þar á meðal að þar dúkka iðulega upp gömul og sjaldheyrð lög.  Lög af plötum sem ekki hafa fengist í plötubúðum eða annars staðar til fjölda ára og áratuga.  Fyrir örfáum dögum birtist á þútúpunni lagið hér fyrir ofan,  Get ekki vakað lengur.  Það er með hljómsveitinni Foringjunum.

  Foringjarnir nutu töluverðra vinsælda um og upp úr miðjum níunda áratugnum.  Til að mynda náði lagið  Komdu í partý  með Foringjunum góðri útvarpsspilun og myndband við það var margoft sýnt í sjónvarpinu. 

  Hljómsveitin þótti góð í að rífa upp stuð,  hvort sem var á dansleikjum eða á hljómleikum.  Fyrir bragðið var hún eftirsótt til að hita upp fyrir aðrar hljómsveitir.  Ein þeirra var Kiss,  svo dæmi sé nefnt.

  Foringjarnir voru Þórður Bogason (söngur),  Einar Jónsson (gítar),  Jósep Sigurðsson (hljómborð),  Oddur F. Sigurbjörnsson (trommur) og Steingrímur Erlingsson (bassi).

  Höfundar  Get ekki vakað lengur  eru Þórður og Einar.  Þórður hefur sungið með fjölda annara hljómsveita, svo sem Þreki, Skyttunum, Rickshaw, Þrymi, Warning, Þukli, DBD, Rokkhljómsveit Reykjavíkur og Mazza.

Athugasemdir

[Ásthildur Cesil Þórðardóttir, 13.8.2012 kl. 20:38]

Sammála þetta er dægilegasta stuðrokklag.

[Jens Guð, 14.8.2012 kl. 10:55]

  Ásthildur Cesil,  maður rekst á margt sér til skemmtunar á þútúpunni.  Til að mynda hef ég þar fundið 3 lög með Sokkabandinu.

[Ásthildur Cesil Þórðardóttir, 14.8.2012 kl. 10:59]

Virkilega ? Ég hef bara heyrt eitt.  En svo er ég frekar lítið á Þútúpunni. 

[Jens Guð, 14.8.2012 kl. 21:13]

  Þú hefur þá ekki séð þetta:  http://www.youtube.com/watch?v=qHndptuFPJ0&feature=relmfu

[Ásthildur Cesil Þórðardóttir, 14.8.2012 kl. 22:08]

Nei ég var ekki búin að sjá þetta, en ég man eftir þessum tónleikum í Alþýðuhúsinu á Ísafirði fyrir margt löngu takk fyrir mig