Passa sig á löggunni

  Löggan í Texas er dálítið skæð.  Margar poppstjörnur hafa ekki áttað sig á því og farið flatt á samskiptum við hana.  Djassaði kántrý-boltinn Willie Nelson er í hópi fjölmargra poppara sem hafa verið "böstaðar" í Texas.  Og það tvívegis fyrir að hafa hass í fórum sínum.  Það kostaði hann dágóðar upphæðir í formi sekta.

  John Popper í Blues Traveller er annar.  Líka með hass í sínum fórum.  Síðar var hann "böstaður" með byssur í Wasington (fjóra riffla, níu skammbyssur, Taser-byssu og fleiri svoleiðis leikföng).

  Kántrý-boltinn Ray Price var "böstaður" í Texas með hass.  Það kostaði hann tæpar 90 þúsund krónur. 

  Poppstjarnan Matthew McConaughey var böstuð með maríjúana og var nakin á rölti innan um kannabisjurtir sínar þegar laganna verðir í Texas handtóku hann. 

  Kántrý-boltinn frá Alabama,  Ty Herndon,  var "böstaður" í Texas.  Hann náði að afgreiða dæmið í samfélagsþjónustu.

  Gítarleikari Puddle of Mud,  Wes Scantlin,  lenti í vondum málum þegar hann varð uppiskroppa með áfengi í flugvél í Texas.  Hann var ósáttur og endaði í handjárnum í Austin í Texas. 

  Michale Graves,  forsprakki hinnar ágætu pönksveitar Misfits,  var í Texas "böstaður" með hass.  Dálítið neyðarlegt vegna þess að hann er yfirlýstur og "aktífur"  íhaldsmaður sem fordæmir dópneyslu.  Sínum augum lítur hver á silfrið. 

  Kántrýboltinn ljúfi,  Randy Travis, hefur lent í margháttuðum vandræðum í Texas.  Hann er mikill Jesú-kall og sækir kirkjur.  Ekki alltaf án þess að gutli vín í belg.  Hann hefur lent í áflogum fyrir utan kirkjuna sína oftar en einu sinni.  Þar á meðal hefur hann átt það til að slást fyrir utan kirkjuna sína allsnakinn.  Og klessukeyra á bíl sínum fyrir utan kirkjuna.   Líka nakinn.  Svo og hótað að skjóta lögreglumenn og eitthvað svoleiðis.  Einnig nakinn.  Þess á milli lofsyngur hann Jesú.  Amen. 

  Pönkararnir Paul Wall og Baby Bash voru "böstaðir" af löggunni í Texas.  Þeir voru með hass.

  Svo eru það allar hinar poppstjörnurnar sem löggan í Texas hefur "böstað":  Snoop Doggy Dog (sem núna heldur því fram að hann sé Bob Marley endurfæddur),  You Gotti,  Lyl Whine,  Fiona Apple,  Curren$y,  Wheelchair Sport Camp... Listinn er langur. 

  Lærdómurinn sem má læra af þessu er að löggan í Texas hefur augun hjá sér og er þefvís á dóp.  Löggan í Texas gefur ekki afslátt. 

Athugasemdir

[Björn Emilsson, 23.10.2012 kl. 23:44]

Vonandi að þessu hass rugli fari að linna. Spái því að ekki liði á löngu að hass verði gefið frjálst eins og hvert annað eiturlyf, ss tóbak og áfengi. Nú þegar er hass viðurkennt og selt sem lyf víða í USA.

[Ásthildur Cesil Þórðardóttir, 23.10.2012 kl. 23:55]

Sammála þetta bann gerir bara ill verra rétt eins og vínbannið fræga  sem kom af stað amerískri mafíu.  Allt sem er bannað fer bara undir teppið og rótar upp glæpamennsku. Ekki það að ég hef aldrei neytt hass, en ég hef heyrt um margskonar sjúkdóma sem það lagar.  Ætti allavega að vera selt í apótekum. 

[Anna Sigríður Guðmundsdóttir, 24.10.2012 kl. 14:25]

Jens. Já, það er ekki öll vitleysan eins.

Það virðist vera atvinnuleysi hjá lögreglunni á höfuðborgarsvæðinu, því ég frétti að hún vakti sumar vínbúðir þegar þær opna einokunarsöluna í miðri viku, með einhverskonar blásturstækni fyrir viðskiptavini einokunar-eiturlyfjasölunnar ríkisreknu og löglegu!

Hafa þeir ekkert þarfara að gera í bankaræningja-kreppulandinu, í miðri viku?

M.b.kv.

[Jens Guð, 24.10.2012 kl. 23:14]

  Björn,  ég er sammála þér.  Eftir nokkra áratugi verður hlegið að þessu banni, alveg eins og bjórbanninu á Íslandi. 

[Jens Guð, 24.10.2012 kl. 23:17]

  Ásthildur Cesil,  ég hef prófað, ja, ég veit ekki hvort það var hass eða maríjuana.  Það var bara ekkert skemmtileg víma í samanburði við bjórinn.  Ég er sammála því að bannið ali af sér glæpamennsku. 

[Jens Guð, 24.10.2012 kl. 23:18]

  Anna Sigríður,  ég tek undir undrun þína á þessu. 

[Sigurbjörg Sigurðardóttir, 27.10.2012 kl. 15:06]

Mikið er ég sammála Ásthildi og svari þínu nr4-5.