Þannig getur þú varist þjófnaði - ódýrt og pottþétt!

  Allir hafa lent í vandræðum með nestið sitt.  Maður er búinn að vakna fyrir allar aldir til að smyrja sér samloku með (niðursneiddum) agúrkum,  osti,  eggjum,  pepperoni,  þurrkuðum tómötum,  sinnepi og einhverju smálegu öðru;  svo er samlokunni komið snyrtilega fyrir í nestisboxinu.  Þar gegnir hún því hlutverki að bíða þolinmóð þangað til garnirnar byrja að gaula.  Þá er fátt betra en rífa nestisboxið upp og gæða sér á góðgætinu.

  Gallinn er sá að vinnufélagarnir eru iðulega búnir að stela samlokunni og snæða hana þegar hér er komið sögu.  Við þessu er til krókur á móti bragði.  Hann er sá að mála með svart-grænum tússpenna nokkra bletti á plastpokann utan um samlokuna.  Þjófurinn hrekkur í kút þegar hann kemur auga á blettina.  Hann heldur að þetta séu myglublettir á brauðinu. 

  Ávinningurinn er tvíþættur:  Annars vegar forðar þetta samlokunni frá því að vera étin af óvönduðum.  Hins vegar er þjófnum svo brugðið og miður sín að hann þekkist af kafrjóðu andliti,  hryllingssvip og taugaveiklaðri framkomu.  Það er líklegt að hann byrji að naga á sér neglurnar.  Það er óhollt.  Líkaminn losar sig nefnilega við kvikasilfur og allskonar óþverra í gegnum neglurnar.  Sá sem nagar þær fær þetta óþvegið upp í sig.   

  Einelti er vont og ber að fordæma.  Einn skólabróðir minn tók aldrei með sér nesti í skólann.  Þess í stað réðist hann daglega á skólasystkini og náði af þeim nestinu.  Nokkra daga í röð náði hann nesti af strák sem kom alltaf með rúgbrauðssamloku með kæfu.  Svo fór að einn daginn er sá nestislausi hafði enn einu sinni náð samlokunni eftir töluverð áflog að hann andvarpaði og spurði frekjulega:  "Getur þú ekki beðið mömmu þína um að skipta um álegg?  Ég er kominn með hundleiða á þessari helvítis kæfu."

 

Athugasemdir

[Ásthildur Cesil Þórðardóttir, 22.10.2012 kl. 21:32]

Hahahahaha 

[Steingrímur Helgason, 22.10.2012 kl. 22:02]

Gott á 'naglbíta' !

[Ómar Ingi, 22.10.2012 kl. 23:01]

Góður

[Jens Guð, 22.10.2012 kl. 23:37]

  Ásthildur,  takk fyrir innlitið.

[Jens Guð, 22.10.2012 kl. 23:38]

  Steingrímur,  þetta er gott á naglbíta.

[Jens Guð, 22.10.2012 kl. 23:38]

  Ómar Ingi,  alltaf!

[Ásdís Sigurðardóttir, 23.10.2012 kl. 10:08]

hahahahahahaha snilld :)

[Jens Guð, 23.10.2012 kl. 19:45]

  Ásdís,  þetta er gott ráð.

[Sigurbjörg Sigurðardóttir, 27.10.2012 kl. 15:10]

Þetta trix á ég sko eftir að nota á vinnustaðnum mínum