Besta hádegisverðartilboðið

  Nýverið tók Daði á sportbarnum Classic Rock (eða hvort staðurinn heitir í dag bara Classic?) í Ármúla 5 upp á því að bjóða spennandi hádegisverðartilboð.  Hægt er að velja á milli ostborgara,  steiktrar samloku eða pizzu á 1000 kall.  Innifalið í máltíðinni er gos eða ferskur ávaxtasafi.  Með ostborgaranum og samlokunni fylgja alvöru franskar kartöflur og kokteilsósa.  Ég hef prófað ostborgarann.  Hann er kjötmikill (120 gr) og allt eins og best er á kosið.

  Nú hefur Daði bætt um betur:  Hann býður upp á glæsilegan enskan morgunmat (Full English Breakfast) ásamt gosi eða ferskum ávaxtasafa á þessu þægilega tilboðsverði,  1000 kalli.  Þeirri máltíð gef ég hæstu einkunn.  Þetta er rífleg máltíð með pönnusteiktum kartöflum,  tveimur spældum eggjum,  ristuðu brauði og öðru tilheyrandi (beikoni, pylsum, bökuðum baunum...).  Ég er sérlega ánægður með ristaða brauðið.  Víða - þar sem boðið er upp á English Breakfast - klikka menn á því að hita brauðsneiðar aðeins á pönnunni án þess að þær brúnist.  Á Classic ristar listakokkurinn Kent Jensen brauðið þannig að það fær skarpan brúnan lit,  er stökkt en mjúkt.  Með fylgir smjör (sem vantar á mörgum veitingastöðum er bjóða upp á English Breakfast).

  Enski morgunverðurinn á Classic er besta hádegistilboð á markaðnum í dag,  þegar miðað er við verð og gæði.

  Til gamans má geta að Daði var í gamla daga gítarleikari hljómsveitarinnar Dáta.  Glettilega góður gítarleikari og hefur síðan spilað í einhverjum blúshljómsveitum minna frægum en Dátum.  Hann er blúsgeggjari.  Það er gaman að spjalla við hann um blús og rokk.  Rétt eins og við dætur hans og eiginkonu,  sem vinna á Classic.  Viktoría, dóttir þeirra hjóna, er vel heima í klassíska blúsrokkinu og spilar jafnan áhugaverða músík á barnum.  Líka með yngri rokkhljómsveitum og gömlum blúsjöfrum.  Það er góð skemmtun að kíkja á Classic í Ármúla 5.   

 

Athugasemdir

[Sigurður I B Guðmundsson, 26.11.2012 kl. 18:29]

En kannski ekki það hollasta!!

[Jens Guð, 26.11.2012 kl. 20:59]

  Sigurður I.B.,  þetta gefur góða orku fyrir eril dagsins.  Þetta hefur haldið lífinu í Bretum. 

[J. Einar Valur Bjarnason Maack , 26.11.2012 kl. 22:15]

Ég held að það sé besta auglýsingartrikk í barrekstrarbransanum að bjóða þér í mat Jens. Núna langar mig að kíkja í Ármúla, þó ég sé í Danmörku!

[Jens Guð, 26.11.2012 kl. 23:07]

  Einar Loki,  ég kann vel við þessa uppástungu þína.

[Sverrir (IP-tala skráð) 12.12.2012 kl. 03:38]

Get tekið undir það Jens að þetta er staðgóður morgunverður sem heldur manni gangandi yfir daginn. Hef þó aldrei kunnað að meta volgu tómatana sem ég fæ stundum með í Beturíki!