Litlu verður Vöggur feginn

  Ég brá mér norður í Skagafjörð.  Það var nemendamót á Steinsstöðum í Lýtingsstaðahreppi.  Endurfundir skólasystkina.  Þvílíkt gaman.  Við höfum hist á fimm ára fresti síðustu áratugi.  Þetta er svo gaman að það slær flestu við.  Núna erum við að nálgast sextugs aldurinn.  Þegar við hittumst svona dettum við rúma fjóra áratugi aftur í tímann.  Flest er eins og það var.  Það er að segja stemmningin.  Skemmtileg atvik rifjast upp.  Hellast yfir.  Á unglingsárunum áttaði maður sig ekki á því hvað við skólasystkinin vorum góðir vinir.  Þegar við hittumst núna áttar maður sig betur á því hvað vinaþelið er sterkt;  hvað manni þykir vænt um þessa góðu og skemmtilegu vini.

  Allt annað: Í gær átti ég erindi í Neinn,  bensínstöð við Hringbraut.  Þar er út við glugga borð.  Þar eru fjórir barstólar.  Þeir voru auðir þegar ég mætti á svæðið.  Ég keypti eitthvað smotterí og settist síðan á einn stólinn.  Fór að glugga í vikuritið Grapevine.  Eftir að hafa gluggað í Grapevine í nokkra stund stóð skyndilega yfir mér ábúðafullur maður merktur Landvélum.  Hann horfði brúnaþungur á mig.  Örvænting og ásökun skein úr hverjum andlitsdrætti.  Að lokum stundi hann upp:  "Ég sat hérna."  Hann var greinilega miður sín og í ójafnvægi. 

  Ég sá í hendi mér að þetta sæti var honum kært.  Ég ákvað þegar í stað að gera góðverk dagsins.  Ég færði mig yfir í næsta sæti og hélt áfram að glugga í Grapevine.  Hann tók umsvifalaust gleði sína og settist í gamla sætið sitt.  Svo sátum við þarna tveir í dágóða stund og glugguðum í Grapevine.  Það þurfti ekki meira til að gleðja hann.  Hann kumraði af ánægju og sötraði appelsín.  Litlu varð Vöggur feginn.   

  

Athugasemdir

[Pétur Örn Björnsson (IP-tala skráð) 13.6.2013 kl. 01:33]

Það var sem mig minnti, að Lýtó gerir alla að eilítið betri mönnum.

[Grrr (IP-tala skráð) 13.6.2013 kl. 07:39]

Ég mun sniðganga Landvélar þangað til að þú færð að velja þér þitt eigið sæti

[Stefán (IP-tala skráð) 13.6.2013 kl. 08:34]

Gæti líka verið fyrrverandi starfsmaður Landvéla, sem er svo vanafastur að hann mun ganga í Landvéla-gallanum á meðan hann hangir saman ... Þarna inn af Neinn stöðinni er Subway staður og þar hef ég tekið eftir gömlum furðufugli sem virðist hreiðra um sig við ákveðið borð heilu dagana.  Hann mokar blaðabunka á borðið og virðist svo dunda sér við að raða blöðunum til og frá allan daginn.  Þessi Neinn stöð er hugsanlega rekin sem einhverskonar áfanga heimili með fram öðrum rekstri, allavega virðist skrifstofan hjá Neinn vera rekin sem áfangaheimili fyrir fyrrum bankamilljónasukkara ...  

[Guðmundur Brynjólfsson, 13.6.2013 kl. 11:41]

Vóru ekki einhverjar frænkur mínar eða frændur af Sleitustaðakyni á þessu mannamóti?

[Ásthildur Cesil Þórðardóttir, 13.6.2013 kl. 13:53]

Það mættu vera fleiri eins og þú Jens minn, þá væri heimurinn betri en hann er.

[Jens Guð, 13.6.2013 kl. 20:52]

  Pétur Örn,  svo sannarlega!

[Jens Guð, 13.6.2013 kl. 20:53]

  Grrr,  takk fyrir samstöðuna.

[Jens Guð, 13.6.2013 kl. 20:57]

  Stefán,  ég held að þessi Subway náungi sé á launum við að raða blöðum til og frá.  Það skapar stemmningu.

[Jens Guð, 13.6.2013 kl. 21:02]

  Guðmundur,  nei.  Þau sóttu skóla í Hofsósi. 

[Jens Guð, 13.6.2013 kl. 21:02]

  Ásthildur Cesil,  takk fyrir það!

[sæunn guðmundsdóttir (IP-tala skráð) 14.6.2013 kl. 00:29]

hahaha óborganlegur ;)

Stefán er þetta ekki eins og á sumum veitingahusum þá er lagt bílum fyrir utan eins og eh nsé að gera ,þarna er bara plantað gömlu fólki ??

[Sigurlaug Gísladóttir (IP-tala skráð) 14.6.2013 kl. 20:22]

Ofjárinn, hefði ég vitað að þú yrðir á Steinsstöðum hefði ég örugglega mætt þar sem okkur unglingunum var nú loks gefin kostur á að mæta.  En fór því miður heim tveimur dögum fyrir mót og sé alltaf meira og meira eftir því. Læt það klárlega ekki gerast aftur.  Eru það aftur 5 ár í næsta eða var ákveðið að skemmta sér oftar?

[Jens Guð, 14.6.2013 kl. 22:21]

  Sæunn,  takk fyrir það. 

[Jens Guð, 14.6.2013 kl. 22:23]

  Sigurlaug,  þetta var klúður hjá þér.  En nemendamótið verður endurtekið eftir 5 ár.  Þetta er í 3ja skiptið sem ég mæti og það verður aðeins skemmtilegra og skemmtilegra í hvert sinn.

[Siggi Lee Lewis, 14.6.2013 kl. 23:10]

Ég lenti einu sinni í þessu sjálfur, það var reyndar á leikskóla. Þá sat einhver í sætinum mínu eftir að ég hafði brugðið mér á mígildið. Hreinasti dónaskapur. Minni meira að segja að ég hafi klórað hann!

[Siggi Lee Lewis, 14.6.2013 kl. 23:12]

Eða tosað í hárið á honum, man ekki hvort var...

[Jens Guð, 14.6.2013 kl. 23:21]

  Ziggy,  ég kunni ekki við neitt svoleiðis.  Ég kaus að gleðja kauða.