Þetta vissir þú ekki!

  Geitur eru merkilegri skepnur en margur heldur í fljótu bragði.  Til að mynda hafa í aldir geitaspörð verið notuð til að lina þjáningar gigtveikra.  Það þarf aðeins að taka inn fimm geitaspörð á fastandi maga í átta daga.  Spörðunum er skolað niður með hvítu víni.  Við magakveisu hefur öldum saman gefist vel að þamba geitahland.  Það slær einnig á eyrnaverk.  Geitalifur heldur draugum og öðrum framliðnum ófreskjum í skefjum.  Ekki má gleyma því að þurrkað og mulið geitareista (af hafri) tekið inn með nægu vínmagni er kröftugasta meðal sem til er gegn ófrjósemi kvenna.

  Þessi lyf og þessar aðferðir eru mörg hundruð árum eldri en nútímakukl lækna sem dæla í sjúklinga hættulegum pillum framleiddum af fégráðugum og glæpsamlegum auðhringum.  Nútímalækningar eru svo ungar að þær eru í raun óhefðbundnar á meðan aldagamlar aðferðir með geitaafurðir eru hefðbundnar lækningar.  

  Geitur éta allt.  Þær éta gaddavír,  girðingastaura,  niðursuðudósir,  smásteina og hvað sem er.  Þær vilja ekki vera skilgreindar grænmetisætur og vera þar með settar í flokk með Hitler.  Geitur éta grasamat aðeins eins og meðlæti.  Á sama hátt og annað fólk en Hitler nartar í grænmeti með kjöti, fiski og þess háttar.  

  Geitur eru húmoristar.  Þeim þykir fátt skemmtilegra en að hræða fólk og hrella.  Þá hlæja geiturnar inn í sér.   

Athugasemdir

[Ásthildur Cesil Þórðardóttir, 2.7.2013 kl. 23:23]

Jens síðan þú settir inn mynd af kvikindi sem lifir í augabrúm okkar, hefur mig klæjað endalaust í augabrúnunum.  Pleas hugaðu áður en þú kemur með svona hryllingssögur

[Jens Guð, 3.7.2013 kl. 23:27]

  Ásthildur Cesil,  ég skal gæta varúðar gagnvart svona upplýsingum. 

[Ásthildur Cesil Þórðardóttir, 4.7.2013 kl. 13:29]

Já endilega

[Tobbi (IP-tala skráð) 5.7.2013 kl. 17:48]

Hvaða áhrif hefur þá geitareista úr huðnu ef eista úr hafri virkar gegn ófrjósemi kvenna?  Getuleysi kannski?

[Jens Guð, 5.7.2013 kl. 22:16]

  Tobbi,  nú varð mér á að skella upp úr