Hagfræðingar ljúga

 

  Hagfræðingar eru óáreiðanleg heimild um ástandið.  Það vantaði ekki kokhrausta hagfræðinga til að vísa á bug viðvörunarljósum sem blikkuðu út um allt korteri fyrir bankahrun.  Hagfræðingar skrifuðu og gjömmuðu hver í kapp við annan (á háum launum) um að engin hætta væri á bankahruni eða neinu slíku.  Þvert á móti þá væri ástandið tær snilld og bankarnir ættu að gefa í með Icesave og alla þessa hamingju sem þeir væru að útdeila.

  Eflaust má finna árinu 1976 sitthvað til ágætis.  Bæði í Bretlandi og víðar.  Breska pönkið byrjaði 1976.  Það var frábært.  Hófst um sumarið sem einskonar neðanjarðarhreyfing Sex Pistols, The Clash,  The Damned,  The Buzzcocks og Siouxie & The Banshees.  Hreyfingin vatt hratt upp á sig.  Um haustið var haldið 2ja daga pönk-festival í 100 Club við Oxford stræti.  Fyrir árslok var pönkið orðið umtalað og komið á forsíður dagblaðanna. 

   Næstu ár á eftir fór pönkið með völd.  Það ól af sér ótal músíkstíla sem kölluðust samheitinu nýbylgja.  Það opnaði dyr fyrir reggí og ska.  Það skóp hártísku og fatatísku.  Það stillti rokkbransanum í heilu lagi upp við vegg.  Flest sem rokkarar höfðu verið að gera og voru að gera var borið saman við pönkið.  Breska pönkið fór eins og stormsveipur um heiminn.  Upp spruttu öflugar pönkbylgjur þvers og kruss að hætti þeirrar bresku.  Hérlendis hefur pönkbylgjan verið kennd við kvikmyndina Rokk í Reykjavík.

  Til að breska pönkið næði upp á yfirborðið og yrði sú bylting sem það varð þá þurfti sérstakan farveg.  Sá farvegur samanstóð af vondu efnahagsástandi í Bretlandi 1976,  vonleysi og reiði.  Einnig þreytu og leiða á risaeðlunni sem rokkmarkaðurinn var orðinn.

  Atvinnuleysi í Bretlandi var mikið,  heilu fjölskyldurnar og íbúar heilu bæjarhlutanna voru fastir í fátækragildru.  Það logaði allt í verkföllum,  kynþáttaóeirðum,  lögregluofbeldi,  pirringi.  Stærsti nasistaflokkurinn í Bretlandi,  National Front,  naut stuðnings 130 þúsund kjósenda.  Hatur og reiði út í allt og alla kraumaði og leitaði útrásar. 

  Ástandið,  eins og ungir lágstéttarmenn upplifðu það,  var súmmerað upp á næst fyrstu smáskífu Sex Pistols,  God Save The Queen.  Það getur að heyra í myndbandinu efst.  Textinn hefst á þessum orðum: 

God save the queen
The fascist regime
They made you a moron
Potential H-bomb

God save the queen
She ain't no human being
There is no future
In England's dreaming

  Í niðurlaginu er margendurtekið að það sé engin framtíð.  Svipuð viðhorf voru áberandi í öðrum breskum pönksöngvum.  Það var sungið um fasisma og anarkisma,  atvinnuleysi og vonleysi.  Á fyrstu smáskífu Sex Pistols,  Anarchy In U.K.,  er stjórnleysi boðað.

  Í fyrsta smáskífulagi The Clash,  White Riot,  var sungið um óeirðir og uppþot.  Myndbandið var skreytt klippum af lögreglu og mótmælendum.  Upplifun bresku pönkaranna á ástandinu 1976 er ólík lýsingu hagfræðinganna á besta og hamingjuríkasta ári Bretlands.  Söngvar bresku pönkaranna eru marktæk sagnfræði að einhverju leyti.

  Tom Robinson lýsir ástandinu skýrar og ljóðrænna í Up Against The Wall.  Þar segir m.a. 

Darkhaired dangerous schoolkids
Vicious, suspicious sixteen
Jet-black blazers at the bus stop
Sullen, unhealthy and mean
Teenage guerillas on the tarmac
Fighting in the middle of the road
Supercharged FS1Es on the asphalt
The kids are coming in from the cold

Look out, listen can you hear it
Panic in the County Hall
Look out, listen can you hear it
Whitehall (got us) up against a wall
Up against the wall...

High wire fencing on the playground
High rise housing all around
High rise prices on the high street
High time to pull it all down
White boys kicking in a window
Straight girls watching where they gone
Never trust a copper in a crime car
Just whose side are you on?

Consternation in Brixton
Rioting in Notting Hill Gate

Fascists marching on the high street
Carving up the welfare state
Operator get me the hotline
Father can you hear me at all?
Telephone kiosk out of order
Spraycan writing on the wall

  Eitt af mörgu góðu við pönkið var að það gerði þarfa uppreisn gegn kynþáttafordómum og nasisma.  Slátraði National Front með því að spila undir yfirskrift á borð við Anti-Nazi League og Rock Against Racism,  ásamt því að gagnrýna í textum kynþáttafordóma.  Eins og að framan greinir áttu breskir nasistar sterkt fylgi þegar pönkbyltingin skall á.  The Clash lýstu stöðunni þannig að ef Adolf Hitler kæmi til Bretlands þá yrði tekið á móti honum í limmósíu á flugvellinum.

   

1976 var hamingjuríkasta árið

Athugasemdir

[hilmar jónsson, 21.7.2013 kl. 21:01]

Jens, hefurðu séð þessa mynd ?

Hef einhvern vegin á tilfinningunni að þú myndir fílir hana:

http://www.youtube.com/watch?v=G6_qjpBY2Bo

[Jens Guð, 21.7.2013 kl. 22:05]

  Hilmar,  takk fyrir ábendinguna.  Ég hef ekki séð þessa mynd.  En það lofar góðu að heyra Pretty Vacant í kynningarklippunni. 

[Fribbi (IP-tala skráð) 22.7.2013 kl. 09:19]

Asnalegur titill á fréttinni, eins og einhver gamlingi hafi skrifað þetta og misst trúnna á mannkyninu.  Gaman að fara í gegnum þetta hjá þér félagi.

[Stefán (IP-tala skráð) 22.7.2013 kl. 15:00]

Hvaða heimskulega hagfræði skyldi ráða ríkjum núna á 365 miðlum, eða ætli það sé kanski miklu frekar ,, antik-hagfræði lítilla karla " sem ræður þar ríkjum ?  Enn berast fréttir af því að gott fólk yfirgefi Fréttablaðið ( í dag Sigríður Tómasdóttir og Sunna Valgerðardóttir ). Undir stjórn Mikaels Torfasonar er Fréttablaðið ekki orðið annað en ómerkilegur og ólæsilegur pappírspési sem borinn er út í póstkassa bara til að viðtakendur geti áframsent blaðið í ruslatunnur.   

[hilmar jónsson, 22.7.2013 kl. 15:44]

það er spáð sól á morgun, hvað segið þið um það ?

[Jens Guð, 22.7.2013 kl. 19:33]

  Fribbi,  það er augljóst að fréttamaðurinn er búinn að afskrifa mannkynið.

[Jens Guð, 22.7.2013 kl. 19:33]

  Stefán,  það gengur eitthvað á þarna.

[Jens Guð, 22.7.2013 kl. 19:38]

  Hilmar,  ég rek litla heildsölu,  Aloe Vera umboðið.  Aðal vörulínan er Banana Boat sólarvörur.  Einhverra hluta vegna sýnir fólk sólvarnarkremum lítinn áhuga í rigningu.  Þetta er lélegasta sumarsala hjá mér í þrjá áratugi.  Mér virðist vera augljóst að sumarsalan sé í mínus þetta árið.  Nema sólin fari að taka sig á.

[hilmar jónsson, 22.7.2013 kl. 23:00]

Svona er þetta skin og skúrir.

Vonandi "skin" á morgun og að eitthvað detti í buddu hjá þér..

[Jens Guð, 23.7.2013 kl. 00:05]

  Hilmar,  spáin er góð fyrir næstu fjórar vikur.  Eftir það fara skólarnir í gang og þá taka skrautskriftarnámskeiðin við.  Ég hef svo ódýran lífsstíl að bjór er stærsti kostnaðarliðurinn.