Hvaða þjóðir eru heiðarlegastar?

  Bandaríska tímaritið Reader´s Digest gerði áhugaverða rannsókn á dögunum.  Það dreifði 12 seðlaveskjum í sitthverri höfuðborg helstu ferðamannalanda heims (ég reikna með að þetta séu þau lönd sem íbúar Obamalands ferðast mest til - án þess að bomba upp íbúa þeirra).  Seðlaveskin voru skilin eftir á göngustígum og á bílastæðum við verslunarkjarna.  Í hverju veski voru peningar sem svara til um það bil 6000 íslenskum krónum,  ásamt persónuskilríkjum,  fjölskylduljósmyndum,  afsláttarmiðum og nafnspjöldum eigandans með símanúmeri og öðrum upplýsingum.  Síðan var beðið eftir því að vegfarandi rækist á veskið og kæmi því til eigandans.  Því miður reyndust sumir þannig innréttaðir að þeir skiluðu veskinu ekki til eiganda.     

Niðurstaðan varð þessi:

1. Helsinki, Finnlandi (veskjum skilað: 11 af 12)

2. Mumbai, Indlandi (veskjum skilað: 9 af 12)

3-4. Budapest, Ungvejaland (veskjum skilað: 8 af 12)

3-4. New York, Obamalandi (veskjum skilað: 8 af 12)

5-6. Moskva, Rússland (veskjum skilað: 7 af 12)

5-6. Amsterdam, Hollandi (veskjum skilað: 7 af 12)

7-8. Berlin, Þýskalandi (veskjum skilað: 6 af 12)

7-8. Ljubljana, Sloveniu (veskjum skilað: 6 af 12)

9-10. London, Englandi (veskjum skilað: 5 af 12)

9-10. Warsaw, Pólandi (veskjum skilað: 5 af 12)

11-13.  Bucharest, Rúmenia (veskjum skilað: 4 af 12)

11-13.  Rio de Janeiro, Brazilíu (veskjum skilað: 4 af 12)

11-13. Zurich, Swiss (veskjum skilað: 4 af 12)

14. Prag, Tékklandi (veskjum skilað: 3 af 12)

15. Madrid, Spáni (veskjum skilað: 2 af 12)

16. Lisbon, Portúgal (veskjum skilað: 1 af 12)

  Finnar eru heiðarlegir upp til hópa.  Þeir fara ekki einu sinni yfir á rauðu ljósi.  Veski voru skilin eftir í þremur öðrum löndum án þess að nokkru veski væri skilað.  Einhverra hluta vegna er ekki upplýst hvaða lönd það voru.  

Athugasemdir

[Sigurður Kristján Hjaltested (IP-tala skráð) 1.10.2013 kl. 17:30]

Góður

Gaman væri að vita hvernig Ísland kæmi út..???

[Anna Sigríður Guðmundsdóttir, 1.10.2013 kl. 18:34]

Já Jens minn, Finnar koma vel út í þessari könnun, og kemur mér ekki á óvart. Finnar eru að mínu mati almennt með samfélagsþroska, sem við Íslendingar almennt gætum tekið okkur til fyrirmyndar.

Við Íslendingar getum reyndar lært gífurlega mikið af öllum þjóðum heims. Líka Færeyingum :).

M.b.kv.

[Jens Guð, 1.10.2013 kl. 23:18]

  Sigurður,  ég hef sterkan grun um að Íslendingar kæmu vel út.  Þegar ég var ungur og fátækur námsmaður í Myndlista- og handíðaskóla Íslands tók ég sem oftar Strætó.  Þá blasti við mér seðlaveski í aftasta sæti.  Ég viðurkenni fúslega að í mér bærðist löngun að kíkja í veskið og taka úr því pening.  En samviska mín leyfði það ekki.  Ég þorði ekki að kíkja í veskið til að láta (ekki) freistast.  Ég var mjög blankur en hafði rænu á að meta dæmið þannig að manneskja sem ferðaðist með Strætó væri klárlega ekki rík.  Þetta var innri barátta í nokkrar mínútur.  Blessunarlega fór ég með veskið til bílstjóra strætisvagnsins og bað hann um að tilkynna fund veskisins.  Farþegi fyrr um kvöldið reyndist hafa tilkynnt um hvarf á veski sínu.  Lýsing á veskinu kom heim og saman við veskið sem ég fann.  Það komst því til skila.  

  Bílstjóri strætisvagnsins skráði niður nafn mitt og símanúmer.  Það voru vonbrigði að ég heyrði aldrei neitt frá eiganda veskisins.   

[Jens Guð, 1.10.2013 kl. 23:24]

  Einnig á mínum námsárum fann ég úti á götu seðlaveski.  Í því voru persónuskilríki en engir peningar.  Ég fór með veskið á lögreglustöðina á Hverfisgötu.  Nokkrum dögum síðar hringdi í mig eigandi veskisins.  Erindið var að hann vildi kvitta fyrir þakklæti sitt fyrir að hafa endurheimt veskið með skilríkjum.  Þetta var seint á áttunda áratugnum.  Hann verðlaunaði mig með 25 þúsund kalli.  Ég kann ekki að umreikna það.  En mig munaði töluvert um þann pening á sínum tíma. 

[Jens Guð, 1.10.2013 kl. 23:33]

  Anna Sigríður,  Færeyingar eru ofur heiðarlegir.  Eitt sinn sem oftar skrapp ég til Færeyja.  Í flugvélinni á leið út kynntist ég Íslendingi sem var að fara í sína fyrstu heimsókn til Færeyja.  Þetta var vikuferð hjá okkur báðum.

  Á heimleiðinni sagði hann mér eftirfarandi sögu:  Hann fór á dansleik í Þórshöfn og týndi peningaveski sínu.  Mig minnir að í því hafi verið upphæð að verðgildi 60 þúsund ísl. kr.

  Náunginn bjó hjá vinafólki á eyju fjarri Þórshöfn.  Áður en kom að heimferð bankaði upp hjá honum tveir drengir með seðlaveski hans.  Þeir sögðu að það hafi verið meiriháttar vandræði að finna út hvar eigandinn var staddur.  Veskið hefði dögum saman gengið á milli manna í leit að eigandanum.

  Þegar eigandinn kíkti í veskið voru peningarnir þar óhreyfðir.  Honum varð á að nefna einhver undrunarorð yfir að enginn hefði stolið peningunum.  Gestirnir spurðu á móti hvort að hann héldi virkilega að einhver tæki peninga sem hann ætti ekki.  

[Jack (IP-tala skráð) 2.10.2013 kl. 04:24]

Nei, þetta eru ekki þau lönd sem Bandaríkjamenn ferðast mest til. Það vantar Frakkland og Írland sem dæmi, og þú ert ekki venjulegur Kani sem ferðast ef þú hefur ekki komið til þessara landa. Enginn venjulegur Kani fer til Finnlands, Slóveníu eða Rúmeníu heldur. Venjulegi Kaninn er reyndar að fara að verða óvenjulegur. En meirihluti nýtísku-Kana fer frekar til Mexíkó eða Puerto Rico og ætlar sér aldrei á æfinni til Finnlands, frekar en Idaho.

[Jack (IP-tala skráð) 2.10.2013 kl. 04:26]

Marakó, Túnísía og sérstaklega Egyptaland, og reyndar enn fleiri islömsk lönd eru líka milljónsinnum vinsælli áfangastaður venjulegra Kana en Finnland verður nokkurn tíman, hvað þá Rúmenía. Alla vega meðal þess konar fólks sem ég þekki. Það sama gildir á Englandi, Frakklandi eða hvar sem er. Það ferðast ótrúlega margir til þessara landa en þú ert eitthvað mikið furðulegur ef þú hefur farið til Finnlands. Slóvenía er álitin drepleiðinlegt land sem enginn veit neitt um nema sérvitringar.

[Anna Sigríður Guðmundsdóttir, 2.10.2013 kl. 13:50]

Takk fyrir þessa sögu Jens.

Það er ekkert vafamál að Færeyingar eru heiðursfólk. Ég hef einu sinni verið rænd peningaveskinu, og það var í sirkussýningu í Noregi. Ég hafði ekki vit á að passa uppá töskuna mína, sem ég setti við hliðina á stólnum sem ég sat á.

Ég spurði um veskið á lögreglustöðinni tveimur dögum seinna, og þar var veskið með öllum skilríkjunum. En 500 krónur í norskum krónum voru horfnar. Ég var þakklát fyrir heiðarleika persónunnar sem fann veskið við strætisvagnabiðstöð, og kom því til lögreglunnar.

Já, heiðarleikinn er ómetanlega dýrmætur í samfélögunum, þegar upp er staðið.

M.b.kv.

[Jens Guð, 2.10.2013 kl. 20:54]

  Jack,  takk fyrir fróðleikinn.  Ég átta mig þá ekki á því hvers vegna þessar borgir urðu fyrir valinu.  Ég fann lista yfir þær 10 borgir sem Bandaríkjamenn heimsækja stífast:

1  Cancun,  Mexíkó

2  London,  Englandi

3  San Juan,  Puerto Rico

4  París,  Frakklandi

5  Toronto,  Kanada

6  Róm,  Ítalíu

7  Monteco Bay,  Jamaíka

8  Barcelona,  Spáni

9  Punta Cana,  Dóminíska lýðveldið

10 Nassau,  Bahama

[Jens Guð, 2.10.2013 kl. 20:55]

  Anna Sigríður,  takk fyrir söguna.