Tónlist skiptir sköpum

  Tónlist er manninum nauðsynleg.  Tónlist kemur næst á eftir þörfinni fyrir mat og svefn.  Tónlistin deilir röðinni með þörfinni fyrir að ávaxta kyn sitt.  Tónlistin sefar,  linar þjáningar,  léttir geð,  lyftir andanum,  nærir sálina,  veitir ómælda gleði,  styttir stundir og það sem skiptir mestu máli:  Er gott hjálpartæki þegar löngun til að dansa kviknar.  

  Allar manneskjur hafa unun af tónlist.  Margir eru tónlistarfíklar.  Tilvera þeirra snýst að meira eða minna leyti um tónlist.  Margir iðka tónlist.  Spila á hljóðfæri og syngja.  

  Tónlistariðkun er bráðholl.  Hún eflir hæfileika viðkomandi á mörgum sviðum:  Ýtir undir skapandi hugsun,  samvinnu,  hæfni til að hlusta á aðra,  taka nýjum hugmyndum fagnandi,  deila upplifun með öðrum,  taka tillit til annarra,  skerpir skilning á gildi fortíðarinnar,  njóta augnabliksins og horfa til framtíðar.

  Vegna þessa hafa tónlistariðkendur forskot á aðra þegar kemur að öðrum hlutum.  Gott dæmi um það er framboð Besta flokksins.  Þetta var framboð vinahóps tónlistarmanna.  Hann tók önnur framboð í nefið.  Kosningabaráttan var snilldin ein.  Kosningalag Besta flokksins gerði kosningalög allra annarra framboða - í gegnum söguna - að hallærislegu prumpi.  Frambjóðendur Besta flokksins voru á heimavelli og tóku slaginn með óverjandi trompi.

  Fremstur í flokki fór bassaleikarinn úr pönksveitinni Nefrennsli,  Jón Gnarr.  Þegar ég hlustaði á Nefrennsli spila á pönkhljómleikum Útideildar fyrir röskum þremur áratugum þá vissi ég strax að þarna væri á sviði borgarstjóraefni Reykjavíkur.  Nei,  reyndar ekki.  Það blasti ekki við.  Ég hugsaði ekkert út í það.  Ekki frekar en þegar ég hlustaði á hljómsveitina Ske og þar var hljómborðsleikari,  Guðmundur Steingrímsson,  sem í dag leiðir Bjarta framtíð.  Þingflokk sem nú tekur við kefli Besta flokksins í Reykjavík.  

  Farsæll miðborgarstjóri Reykjavíkur er stuðmaðurinn,  hljómborðsleikarinn og djassgeggjarinn Jakob Magnússon.  Forstjóri Höfuðborgarstofu,  Einar Bárðarson,  er gamalreyndur gítarleikari og  lagahöfundur.  

  Jón Gnarr er ekki eini tónlistarmaðurinn sem hefur orðið borgarstjóri Reykjavíkur.  Ólafur F. Magnússon er gítarleikari og söngvari.  Birgir Ísleifur er djassgeggjari og píanóleikari.  Árni Sigfússon er gítarleikari,  lagahöfundur og söngvari.  Ingibjörg Sólrún hefur sungið inn á plötu.  Davíð Oddsson samdi dægurlagatexta og söng á hljómleikum með Gunnari Þórðarsyni.  

  Það voru svo tíð borgarstjóraskipti í Reykjavík um tíma að ég man í fljótu bragði ekki hverjir komu þar við sögu.  Borgarstjórnarfulltrúinn Oddný Sturludóttir var hljómborðsleikari hinnar ágætu rokksveitar Enzími.  

  Tónlistarmenn eru í forystu í hinum ýmsu sveitastjórnum um allt land.  Söngvari og selló-leikari Todmobile,  Eyþór Arnalds,  er í Árborg.  Matti Matt var í Dalvíkurbyggð.  Guðmundur í Sé Ellen og söngvari (ég man ekki nafn hans) sem var í hljómsveit á Laugarvatni og síðar í hljómsveitinni Bumbunum eru í Fjarðarbyggð.  

  Gott ef Magnús Stefánsson í Upplyftingu og fyrrverandi þingmaður er ekki sveitastjóri í Garði.  

  Geir Haaarde söng inn á plötu með South River Band.  

  Menntamálaráðherrann,  Illugi Gunnarsson,  er píanóleikari og hefur sent frá sér plötu. 

  Bill Clinton,  fyrrverandi forseti Bandaríkja Norður-Ameríku,  er saxafónleikari.  George eldri Bush er blúsgeggjari og gítarleikari.  Tony Blair,  fyrrverandi forsætisráðherra Bretlands,  er rokkgítarleikari.  

  Upptalningin er endalaus.

  Fæstir tónlistarmenn eru "bara" tónlistarmenn.  Flestir koma víðar við.  Margir eru í leiklist.  Margir eru listmálarar.  Margir fást við ritstörf.  Um síðustu aldamót gerðu margir fjölmiðlar upp við tuttugustu öldina.  Völdu mann aldarinnar.  Eða tónlistarmann aldarinnar.  Flestir helstu fjölmiðlar heims enduðu á því að velja á milli Johns Lennons og Bobs Dylans.  Jafnan með þeirri niðurstöðu að Lennon hefði vinning.  Hljómsveit hans,  Bítlarnir,  vóg það þungt.  Lennon og Dylan voru ekki aðeins tónlistarmenn heldur einni myndlistamenn og rithöfundar.  

Jón Gnarr hættir í vor

Athugasemdir

[Stefán (IP-tala skráð) 31.10.2013 kl. 08:42]

Meistari Ludwig van Beethoven sagði eitthvað á þá leið að tónlist væri æðst allra listgreina og ég er sammála því, enda tilheyri ég þeim 5 % mannkyns sem sagt er vera með tónlistarástríðu á háu stigi. Það er margsannað að tónlist getur haft andlegan lækningarmátt og jafnvel getur tónlist haft góð áhrif á dýr. Smekkur manna á tónlist er sem betur fer misjafn og líka mat manna á tónlist og tónlistaráhrifum, t.d. valdi bandaríska tónlistartímaritið Rolling Stone fyrir nokkrum árum hinn nýlátna meistara Lou Reed, sem áhrifamesta tónlistarmann síðustu aldar. Núverandi ríkisstjórn Íslands hefur hins vegar eitthvað mikið á móti tónlist, kvikmyndum og öðrum listgreinum. Ríkisstjórnin kýs að hundsa framsókn íslenskra tónlistarmanna og kvikmyndargerðarmanna erlendis í stað þess að styrkja þessar listgreinar ennfremur og uppskera ríkulega í staðinn eins og svíar gera. Þessar ákvarðanir og skoðanir núverandi ríkisstjórnar  kalla ég því þröngsýni á háu stigi og lágu plani.      

[hilmar jónsson, 31.10.2013 kl. 15:08]

Mikið til í þessu Jens og ég vil meira að segja ganga það langt að segja að tónlist ( í öllum myndum - góð eða slæm ) sé ákveðinn grunntaktur í lífi okkar.

[hilmar jónsson, 31.10.2013 kl. 15:10]

Og auðvita var lag Besta tær snilld. Eitthvað annað en ámátlegt vælið han Guðmundar Steingrímssonar og co í denn..

[Jens Guð, 31.10.2013 kl. 23:39]

  Stefán,  ég tek undir orð þín.

[Jens Guð, 31.10.2013 kl. 23:40]

  Hilmar,  þetta er vel að orði komist með grunntaktinn. 

[Jens Guð, 31.10.2013 kl. 23:47]

  Hilmar (#3),  íslensk stjórnmálaöfl eru einstaklega þegar kemur að því að semja og flytja kosningalög.  Lögin sjálf eru jafnan í ruslflokki,  textarnir aulalegir og flutningurinn afskaplega "amatörlegur". 

  "Við erum best " með Besta flokknum var algjörlega öðruvísi.  Lagið sjálft gott (þó að mér leiðist það í flutningi Tínu Turner).  Grípandi,  söngrænt og með rísandi viðlagi.  Textinn bráðfyndinn.  Flutningurinn frábær.