Rokkstjörnur sem vilja ekki orður og upphefðartitla

  Fyrir nokkrum mánuðum bloggaði ég um nokkrar rokkstjörnur sem hafnað hafa viðtöku á orðum,  upphefðartitlum og öðru slíku pjatti og prjáli.  Um það má lesa með því að smella á þennan hlekk:  http://jensgud.blog.is/blog/jensgud/entry/1319151/

   Rokkstjörnur með þessa afstöðu eru ekki týpurnar sem gala um þetta á torgum.  Fyrir bragðið ratar það ekki í fréttir þegar rokkstjarna hafnar glingri heldur spyrst út hægt og bítandi.  Kannski aldrei í einhverjum tilfellum.

  Það er leki víðar en hjá Hönnu Birnu.  Nú hefur lekið út að bítlinum George Harrison stóð til boða árið 2000 að vera heiðraður með OBE orðunni úr hendi Bretadrottningar.  Harrison hafnaði móttöku á glingrinu. 

  Blaðamaðurinn Ray Connolly þekkti George Harrison vel alveg síðan á sjöunda áratugnum.  Uppljóstrunin kemur Ray ekki á óvart.  Það hefði ekki verið líkt Harrison,  þá 56 ára,  að veita orðu viðtöku.  Honum þótti allt svoleiðis vera ómerkilegt snobb. 

  1965 fengu George Harrison og Bítlarnir MBE orðu úr hendi Bretadrottningar.  Það vakti gríðarmikla athygli.  Á þeim tímapunkti voru hinir ungu Bítlar upp með sér af heiðrinum.  Síðan hefur mikið vatn runnið til sjávar.  Bítillinn John Lennon skilaði sinni orðu með hávaða og látum 1970.  Það var í stíl við persónuleika Lennons.  Það var ekki í anda George að skila sinni MBE orðu.  En hann gerði ekkert með hana.  Það leikur grunur um að hann hafi einfaldlega hent orðunni í ruslið.  Að minnsta kosti urðu engir varir við hana.

  Ray bendir á að það hafi verið ósmekklegt að bjóða Harrison OBE þremur árum eftir að bítillinn Paul McCartney var aðlaður með Sir-titlinum.  Það er skilgreint meiri upphefð að fá Sir-titil en OBE orðu.  Engu að síður hefði það verið ólíkt Harrison að þiggja Sir-titil. 

  Einkasonur Harrisons,  Dhani tengdasonur Íslands,  og ekkja Harrisons,  Olivia,  neita að tjá sig um þetta mál.  Fyrst að George tjáði sig aldrei opinberlega um þetta sjá þau ekki ástæðu til að gera það heldur.

  Hér flytur Harrison lag sem fleiri en hann hafa síðar skráð sig höfund fyrir,  "Eyjan mín.  Eyjan mín fagra græna":

Athugasemdir

[Stefán (IP-tala skráð) 24.1.2014 kl. 08:42]

Ekkjur bítlanna eru miklar aurasálir og nískupúkar. Yoko Ono hefur haldið fé frá Julian Lennon og vill helst ekki af honum vita og Olivia Harrison hefur haldið fé frá systir George Harrison, en Goggi karlinn lét ákveðna upphæð renna til hennar mánaðarlega vegna þess að hún átti og á í miklum fjárhags erfiðleikum. Þessar kerlur lúra auðvitað á gífurlegum fjármálum, en samt gat Yoko Ono ekki hugsað sér að fjármagna friðarsúluna nema að hluta til og Orkuveitan splæsir. Svo kom einfætt kerlingarherfa og dró Paul á asnaeyrunum út og suður eins og smákrakka og hafði af honum gífurlegar upphæðir, líklega milljarða. Gott ef hún gengur ekki á íslenskum fæti og hermt er að barn þeirra hafi jafnvel komið undir á Íslandi.  Já, allt tengist þetta þetta bítladót nú Íslandi á einhvern hátt nema Ringo karlinn, sem hefur þó komið hingað tvisvar, fyrst fullur, svo edrú. 

[Siggi Lee Lewis, 24.1.2014 kl. 21:21]

Ég held að sterkasta og þekktasta tilfellið sé Elvis Presley. Hann var og er kallaður King Of Rock N Roll. Þegar menn nefndu þennan titil við Elvis benti hann vísifingri upp í loft og sagði "There's only one King" Og átti hann auðvitað við Guð almáttugan, enda mjög trúaður.

Hann þoldi aldrei að vera álitinn eitthvað meiri, betri eða öðruvísi en aðrir. Nokkuð sem Justin nokkur Biber mætti taka sér til fyrirmyndar, enda minnir guttinn mig oft á Elvis á sama aldri.

[Jens Guð, 24.1.2014 kl. 22:11]

  Stefán,  Ringó hefur komið a.m.k. þrívegis til Íslands.  Fyrst með Stuðmönnum í Atlavík.  Síðan var hann viðstaddur vígslu Friðarsúlunnar.  Aftur kom hann sem liðsmaður Plastic Ono Band 2011. 

[Jens Guð, 24.1.2014 kl. 22:17]

  Dæmið með Julian Lennon var þannig að í erfðaskrá Johns var kveðið á um að Julian fengi ekki arfinn fyrr en á 25 ára afmæli hans.  Í nokkur ár þar á undan sótti Julian stíft að fá arfinn fyrirframgreiddan.  Hann var á margra ára fylleríi og smá dópi.  Yoko taldi sig bundna af erfðaskránni.  Julian var verulega ósáttur.  Og hefur - að ég held - aldrei tekið Yoko í sátt.  En frá 25 ára aldri hefur Julian verið auðmaður vegna arfsins.   

[Jens Guð, 24.1.2014 kl. 22:21]

  Ziggy Lee,  fréttin sem ég sagði frá var í breska blaðinu Sunday Times.  Þar var lagt út frá stöðu breksra tónlistarmanna í Bandaríkjunum.  Mér þykir líklegt að Bandaríkjamenn þekki ekki síður til bandarískra tónlistarmanna en breskra.  Jafnvel betur. 

[Jens Guð, 24.1.2014 kl. 22:23]

  Ég kvitta ekki undir að Justin Bieber minni á Presley.  Justin er fífl og músík hans afar ómerkileg.  Viðbjóður.  Þetta er ekkert sem er sameiginlegt með Presley og hans blús eða rokk.