Poppstjörnur sem vilja ekki verðlaun og titla

  Flestu fólki þykir gott að fá viðurkenningu.  Eiginlega sama fyrir hvað.  Klapp á kinn í formi orðu,  titils eða sigurs í vali eða útnefningu fyrir eitthvað.  Það þykir heldur betur fínt að vera handhafi Grammy-verðlauna,  Eddu-verðlauna,  MTV-verðlauna og hvað þau heita öll þessi verðlaun sem fjölmiðlar gera svo mikið úr.

   Svo eru það hinir sem gagnrýna allt svona pjátur og prjál.  Hæðast að handhöfum fálkaorðu og "sir" titilsins breska.  Þegar söngvari Rolling Stones var aðlaður með "sir" titlinum fussaði gítarleikarinn Keith Richards og hæddi Mick Jagger fyrir að taka við titlinum.  Keith þótti þetta vera algjörlega á skjön við allt sem rokk stendur fyrir.  Mick svaraði gagnrýni Keiths á þá leið að það væri auðvelt fyrir þá að gelta sem aldrei kæmi til greina að aðla.

 

   Þegar betur er að gáð þá má finna poppstjörnur sem boðist hafa titlar, orður, verðlaun og annað slíkt en neitað að veita því viðtöku.  Eða skila prjálinu.  Það gerði til að mynda bítillinn John Lennon.  Hann á afmæli á morgun.  Fyrir mörgum áratugum fengu Bítlarnir MBE orður úr hendi Bretadrottningar.  Nokkrum árum síðar skilaði John Lennon sinni orðu í mótmælaskyni við hernað Bretlands í Biafra (að mig minnir) og því að lag hans,  Cold Turky,  var að lækka á breska vinsældalistanum.  Frábær Lennon-blús. 

  Færri vita að David Bowie hefur í tvígang hafnað öðlun og orðu úr hendi Bretadrottningar.  Í annað skiptið átti hann að fá CBE orðuna.  Í hitt skiptið átti að slá hann til riddara og veita honum "sir" titil.  Í hvorugt skiptið vildi Bowie að fjölmiðlar gerðu sér mat úr tíðindunum.  Það yrði túlkað sem hann væri að slá sér upp á því að vera í uppreisn.  Sem hann er ekki (þrátt fyrir flott lag,  Rebel, Rebel).  Hann veit einfaldlega ekkert fyrir hvað orðan og "sir" titillinn standa.  Hann langar ekki að vita það.  Þetta er fyrir utan hans áhugasvið.  Hans áhugamál er tónlist en ekki titlatog.  Hann lætur slíkt eftir Sir Paul McCartney,  Sir Elton John,  Sir Cliff Richard og Sir Mick Jagger  Það "böggar" hann ekkert að þeim þyki þetta fínt.  Hann er tónlistarmaður á öðrum forsendum.  

  1996 átti að veita Nick Cave MTV-verðlaun sem besti karlkyns tónlistarmaðurinn.  Plata hans,  Murder Ballads,  hafði slegið rækilega í gegn.  Þegar Nick barst boð um að mæta til að veita verðlaununum móttöku skrifaði hann stjórnendum MTV langt bréf.  Hann þakkaði heiðurinn en afþakkaði hann jafnframt.  Sagðist ekki vera í keppni við einn né neinn.  Hann gæti ekki orðið sigurvegari í keppni án sinnar þátttöku.    

  Í fyrra stóð til að vígja Guns N´ Roses formlega inn í Frægðarhöll rokksins með tilheyrandi lúðrablæstri, ræðuhöldum og öðru slíku.  Söngvarinn,  Axl Rose,  brást hinn versti við og settist við skriftir.  Í harðorðu bréfi til stjórnenda Frægðarhallarinnar frábað hann sér að vera vígður þangað inn og harðbannaði að nokkur maður myndi samþykkja innvígslu fyrir sína hönd eða mæla fyrir sinn munn.  Bannið gilti jafnt um starfsmenn útgáfufyrirtækis hans,  starfsmenn Frægðarhallarinnar og aðra liðsmenn Guns N´ Roses.    

  Breska pönksveitin Sex Pistols brást við á líkan hátt þegar vígja átti hljómsveitina inn í Frægðarhöllina.  Í bréfi til stjórnenda hallarinnar sagði:  "Ykkar safn.  Piss í víni.  Við mætum ekki.  Við erum ekki apakettirnir ykkar eða hvað?"

Athugasemdir

[Stefán (IP-tala skráð) 9.10.2013 kl. 08:26]

Meistari David Bowie alltaf flottastur og já gítarleikur hans í ofan nefndu lagi Rebel Rebel er kraftmikill og hrár sem hæfir textanum ,, You love bands when they're pleying hard, you want more and you want it fast  ".

[Sigurður I B Guðmundsson, 9.10.2013 kl. 19:23]

Svo vantar Mbl. blogg orðunna fyrir skemmtilegasta bloggarann og ég veit um einn sem kemur sterkur inn. En hápunkturinn ætti svo að vera Davíðs blogg orðan fyrir þann bloggara sem hyglar Davíð og LíÚ mest og þar átt þú ekki sjens Jens!!!

[Jens Guð, 10.10.2013 kl. 21:15]

  Stefán,  hann er töff.

[Jens Guð, 10.10.2013 kl. 21:29]

  Sigurður I.B.,  fyrsta árið sem ég bloggaði þá var ég kosinn bloggari ársins 2007.  Ég fékk merktan verðlaunagrip og allt.  Glæsilegan leirskúlptúr.  Síðan hefur leið mín legið niður á við.  Árið eftir var ég í 2. sæti.  Svo lagðist kosningin af.  

[Morgunstjarnan (IP-tala skráð) 10.10.2013 kl. 23:29]

David bowie ; "Hans áhugamál er tónlist en ekki titlatog.

Það "böggar" hann ekkert að þeim þyki þetta fínt. "

Ef glögglega er lesið milli línanna herra Jens þá sjáum við hverju þú ert að ýja að :)