Blindraflug í bókstaflegri merkingu

  Þessi saga er ekki léttúðlegt rangsannindagrín.  Í áætlunarflugi frá borginni Seattle í Washington í Bandaríkjum Norður-Ameríku til borgarinnar San Francisco í Kaliforníu í sama landi þurfti óvænt að millilenda í höfuðborg Kaliforníu,  Sacramentó.  Í hátalarakerfi flugvélarinnar var farþegum tilkynnt um 50 mín. stopp.  Þeim var boðið og ráðlagt að nota tækifærið og teygja úr fótunum inni í flugstöðinni.  Flugstjórinn gekk frá borði á eftir farþegunum.  Aðeins ein blind eldri kona sat áfram í flugvélinni ásamt blindrahundinum sínum.

  Flugstjórinn þekkti konuna.  Hann hvatti hana til að fara inn í flugstöðina og teygja úr sér.  Nei,  sú blinda vildi bara halda kyrru fyrir í flugvélinni.  Hinsvegar taldi hún að blindrahundurinn hefði gott af því að fá að rölta um.  Hún bað flugmanninn um að viðra hann fyrir sig.  Sem var sjálfsagt mál af hans hálfu.

  Þegar flugstjórinn kom inn í farþegasal flugstöðvarinnar leiddur af auðkenndum blindrahundinum greip um sig múgæsingur meðal farþega.  Eflaust hafði sitt að segja að flugstjórinn var með sín dökku flugstjóragleraugu sem eru svipuð þeim er margir blindir nota.

  Farþegar þyrptust að miðasölunni og létu breyta flugmiðanum sínum í annað flug.  Margir létu sér það ekki nægja heldur keyptu nýjan flugmiða hjá öðru flugfélagi. 

------------------------------

  Hljótt hefur farið að hljómsveitin Of Monsters and Men gaf á dögunum Barnaspítala Hringsins 110 milljónir króna.  Eina spurningin sem uppátækið hefur vakið er hvers vegna þetta fólk getur ekki fengið sér vinnu eins og annað fólk.  

 

Athugasemdir

[Tobbi (IP-tala skráð) 2.2.2014 kl. 16:25]

Þetta er skemmtileg saga.  En er hún sönn?  Varla.  Reyndar ber hún  einkenni fyrirbærisins „urban legend.“ Og svo er vitaskuld búið að skoða hana fram og til baka, sjá þessa slkóð: http://www.snopes.com/humor/jokes/pilotdog.asp

[Tobbi (IP-tala skráð) 2.2.2014 kl. 21:45]

En vitanlega ber aldrei að láta góða sögu gjalda sannleikans.

[Marta Gunnarsdóttir, 3.2.2014 kl. 00:00]

Já, þetta er skemmtileg saga sem má fá að njóta sín hvort sem hún er sönn eða login.

[Jens Guð, 3.2.2014 kl. 20:45]

  Tobbi,  takk fyrir ábendinguna.  Það eru vonbrigði að uppgötva að útlendingar bregði fyrir sér ósannindum.  

[Jens Guð, 3.2.2014 kl. 20:45]

  Marta,  ég tek undir það.