Vegir ástarinnar eru (ó)rekjanlegir

 

 

 

 

 

 

 

 

 

  Stundum er því haldið fram að engir sölumenn komist með tærnar þar sem bílasölumenn á góðu flugi eru með hælana.  Enda nauðsynlegt.  Svo oft þarf að selja bílhræ sem engin heilvita manneskja svo mikið sem lítur á.  En snjöllu sölumönnunum tekst að selja hverja einustu bíldruslu.

  Víkur þá sögu að breskum hjónum á fimmtugsaldri,  herra og frú Bayford,  2ja barna foreldrum.  Þau unnu 148 milljónir sterlingspunda (x 188 ísl. kr.) í Lottó.  Í fjölmiðlum sögðust hjónin vera staðráðin í því að láta aurinn ekki breyta sér og fjölskyldulífi þeirra á neinn hátt.  Þau leyfðu sér samt að kaupa eitt og annað smálegt án þess að fara á eyðslufyllerí.  Þar á meðal fór frúin á bílasölu.  Bílasalinn gaf sér góðan tíma í að kynna fyrir kellu þá kosti sem voru í boði.  Það var engin ástæða til að rasa um ráð fram þegar velja á heppilegasta bíla sem eiga að endast í marga mánuði.  Áður en yfir lauk hafði salinn selt frúnni 5 Audi bíla:  Sitthvorn bílinn handa foreldrum hennar,  einn handa bróðir hennar,  annan handa mágkonu hennar og einn handa frúnni sjálfri.

  Herra Bayford skipti sér ekkert af þessu og kom hvergi nærri.  Hann hefur engan huga á bílum.  Er ekki einu sinni með bílpróf.   

  Um það leyti sem frú Bayford staðgreiddi bílana var hún komin upp í rúm til bílasalans.  Það var ekki aftur snúið.  Hún skildi í snatri við herra Bayford.  Bílasalinn flutti inn til hennar.  Hann sagði þegar í stað upp í vinnunni og hvílir sig.  

„Fólk gleymir að rækta ástina“

Athugasemdir

[Ásthildur Cesil Þórðardóttir, 22.2.2014 kl. 15:10]

Ja hérna hér, hvort þeirra átti vinninginn?

[Jens Guð, 22.2.2014 kl. 22:18]

  Ásthildur Cesil,  það var karlinn sem keypti miðann.  Vegna þess að þau voru gift þá var vinningsmiðinn sameiginleg eign þrátt fyrir það.  Vinningurinn varð sameiginleg eign þeirra hjóna um leið og vinningsnúmerin voru dregin. 

  Við skilnaðinn urðu helmingaskipti á öllum eigum.  Hvort um sig fékk um 14 milljarða.  Hvorugt þeirra hefur viljað tjá sig í fjölmiðlum um skilnaðinn.  Kunnugir segja að sá glaðasti í hópnum yfir þróun mála sé bílasalinn.  Eða réttara sagt fyrrverandi bílasalinn því að núna hvílir hann sig.  Sestur á helgan stein rétt rúmlega fertugur.   

[Ásthildur Cesil Þórðardóttir, 23.2.2014 kl. 00:12]

Sumir fá vinning, en aðrir hreinlega detta í lukkupottinn hahaha

[Jens Guð, 23.2.2014 kl. 22:49]

  Svo sannarlega!