Skrítnar og spaugilegar merkingar

  Texti á sumum aðvörunarskiltum og öðrum merkingum virðast stundum vera saminn af bjánum.  Það þarf þó ekki að vera raunin.  Til að mynda í Bandaríkjum Norður-Ameríku þurfa ýmsir að tryggja sig í bak og fyrir gegn málaferlum og himinháum skaðabótakröfum.  Þar í landi er heill herskari lögfræðiteyma sérhæfður í að sækja stjarnfræðilega háar skaðabætur til allt frá McDonalds - sem seldi heitt kaffi án viðvörunartexta - til borgaryfirvalda sem sýna kæruleysi við að hafa allar gangstéttarhellur jafnar og sléttar.  Fólk getur dottið um ójafnar gangstéttarhellur og uppskorið í kjölfarið kvíðaköst og þunglyndi. 

  Fataframleiðendur vara við því að ekki skuli strauja flíkur þegar fólk klæðist þeim. 

  Jafn áríðandi er að fólk gleypi ekki herðatré.  Það getur fests í hálsinum.  Var þetta útbreitt vandamál áður en viðvörun var sett á miðann?

 

  Sömuleiðis er áríðandi að fólk andi ekki þegar það er undir yfirborði vatns.  Mörgum gæti svelgst á af minna tilefn. 

 

  Snerting við rafmagnsvír veldur bráðadauða.  Ekki nóg með það.  Slíkt uppátæki kostar jafnframt sekt upp á 200 bandaríska dali.  Það er óskemmtileg staða að vera bæði steindauður og fá á sig 200 dala sekt í ofanálag.  Við erum að tala um 23 þúsund ísl. kr.

    

   Á Tælandi er ósyndum víða bannað að synda.  Geta ósyndir synt?

  Til gamans má geta að Færeyingum þykir broslegt að heyra Íslendinga tala um að synda;  ætla að fara að synda eða hafi verið að synda.  Á færeysku þýðir það að drýgja synd.  Og er í hugrenningum tengt við að drýgja hór. 

  Einhverra hluta vegna hefur hér verið talin þörf á að taka fram að hárþurrkuna á hótelinu megi einungis nota á höfuðhár.  Hér hlaðast upp spurningarmerki. 

  Sterkur grunur leikur á að skilti hafi ruglast.  Þetta hafi átt að vera fyrir ofan vaskinn.  Hér er boðað að áður en vatnið sé drukkið skuli það fá að renna í hálfa mínútu.  Spurning hvað stendur á miðanum fyrir ofan vaskinn.    

  Annað mál er hvort að einhver tekur mark á fyrirmælum. Á þessu skilti segir að ekki megi klifra á skólplögninni,  leika sér á henni né í námunda við hana. 

Athugasemdir

[Ásthildur Cesil Þórðardóttir, 30.6.2014 kl. 11:29]

Hahaha frábær færsla hjá þér Jens. Það er margt skrýtið í kýrhausnum.

[Ómar Ragnarsson, 30.6.2014 kl. 14:49]

Ég lenti í atviki 1998 þar sem sendiferðabíl var ekið löturhægt áfram ú austurátt með fram þáverandi Sjónvarpshúsi, og gaf stefnuljós til hægri og ég ætlaði að fara fram úr honum á Toyota jöklajeppa. Morgunsólin skein beint í augun á mér og þegar sendibíllnn beygir heyrast heljar skruðningar og báðir bílarnir stöðvast.

Í ljós kom að sendibílliinn var með afturhlerann niðri og frá bílstjórasæti mínu var ómögulegt að sjá hlerann, því að brún hans er örþunn og þegar sendibíllinn beygði, sveiflaðist hlerinn til vinstri út í götuna og risti hlið míns bíls upp eins og niðursuðudós.

Tryggingarfélögin dæmdu 50/50 sök í atvikinu þótt það sé harðbannað að aka með afturhlerana niðri enda jafngildir slíkt því að sveifla risastóru sverði í allar áttir í föstudagsumferðinni.

Í heild græddu bæði tryggingarfélögin á dómnum, því að báðir bíleigendurnir misstu bónusinn. Hinn ökumaðurinn slapp hins vegar, því að það var stöndugt fyrirtæki sem átti sendibílinn.

Má því segja að sá aðili þessa máls sem sveiflaði morðvopni í umferðinni hafi sloppið við refsingu, en hinn, sem varð fyrir vopninu fékk refsingu.  

Þegar ég fór að kanna þennan furðulega dóm heyrði ég fleiri dæmi um fleiri svona atvik og að það væri regla að þeir sem lentu á afturhlerunum yrðu að taka á sig hálfa sök.  

Ein röksemdin var sú, að enda þótt harðbannað væri að aka með afturhlerana niðri yrðu aðrir ökumenn að gera ráð fyrir því að þetta bann væri ekki virt og þeir gætu hvenær sem væri orðið fyrir barðinu á þessu skæða morðvopni ! 

Það jafngildir því að ef maður gengur á gangstétt í þéttri gangandi umferð á maður að vera viðbúinn því að einhver sem maður strýkst hjá sé sveiflandi sverði í allar áttir og beri því hinn slasaði hálfa sök ef sverðið lendir á honum. 

Ég skrifaði tryggingarfélaginu bréf og sagðist vera spældur yfir því að hafa verið á svona háum bíl akandi meðfram sendibílnum í sömu átt og hann.

Ef ég hefði verið á lágum bíl og komið á móti sendibílnum hefði hlerinn hann skorið af mér hausinn og ekki verið hægt að ná bónusnum af hauslausum ökumanni!  

[Jens Guð, 1.7.2014 kl. 00:20]

Ásthildur Cesil, takk fyrir það.

[Jens Guð, 1.7.2014 kl. 00:20]

Ómar, takk fyrir að deila þessari áhugaverðu sögu með okkur.

[Hjóla-Hrönn, 7.7.2014 kl. 13:14]

Varðandi hárþurrkuna get ég sagt þér sögu úr kvennaklefa sundlaugar nokkurrar. Ung stúlka með sítt og fallegt hár var óratíma að þurrka og greiða hárið. Stóð svo við spegilinn og málaði sig þegar virðuleg eldri kona greip hárblásarann og eftir að hafa þurrkað höfuðhárið, þurrkaði hún sér undir höndunum og svo glennti hún fæturna og þurrkaði píkuhárin. Þau ná alveg aftur í rass, og þess vegna hvarf hárþurrkan úr augnsýn á köflum...

Upplitið á ungu stúlkunni var óborganlegt. En já, það er komið skilti í kvennaklefann á spegilinn við þurrkuna. Aðeins til notkunar á höfuðhár.

Ég er það heppin að hafa fæðst með sjálfþornandi hár.

[Ásthildur Cesil Þórðardóttir, 7.7.2014 kl. 19:32]

Hahahahaha

[Jens Guð, 7.7.2014 kl. 23:54]

Hjóla-Hrönn, bestu þakkir fyrir skemmtilega sögu. Karlkyns sundlaugarvörður sagði mér að það séu heilmikil vandræði með bandaríska sundlaugargesti. Þeir fá áfall þegar þeim er gert að þvo sér áður en farið er í sundlaugina. Þeir eiga svo erfitt með að þvo sér naktir fyrir framan aðra. Sumir hætta meira að segja við þegar þeir standa frammi fyrir þeim skyldum.

[Jens Guð, 7.7.2014 kl. 23:56]

Ásthildur Cesil, takk fyrir innlitið. Ég heyrðí á Útvarpi Sögu í dag í þætti Rúnars Þórs á þig minnst. Hljómsveit Ásgeirs eða Geira Keilu (eða hvað hann var kallaður) kom við sögu. Þar sagðist Rúnar Þór hafa sungið flest lög ásamt þér.

[Ásthildur Cesil Þórðardóttir, 8.7.2014 kl. 01:30]

Já við vorum saman í hljómsveit Ásgeirs Sigurðssonar, hann var rauna mjög ungur, en svolítið út á lífinu, svo ég tók hann að mér hann og Örn Jónsson bassaleikara. Hann var lyklabarnið mitt, því ég passaði upp á að koma honum heim og inn til pabba og mömmu. Og við sungum mikið saman. Rúnar er yndislegur drengur.

[Jens Guð, 8.7.2014 kl. 22:15]

Gaman að rifja þetta upp :)

[Ásthildur Cesil Þórðardóttir, 8.7.2014 kl. 23:41]

Já það er svo sannarlega gaman að rifja það upp.