Örvhentir eru frumkvöðlar og sigurvegarar

  Ótrúlega fáar samanburðarrannsóknir eru til um mun á svokölluðum "rétthentum" og örfhentum.   Fyrir liggur að um 10% fólks er örvhent.  Rannsóknir hafa frekar beinst að því hvers vegna sumir eru örvhentir fremur en hvernig örvhentum vegnar í lífinu til samanburðar við "rétthenta".  

  Ég hef kennt um 30 þúsund manns skrautskrift á 35 árum.  Fljótlega varð ég var við að örvhentir eiga erfiðar með að ná tökum á skrautskrift á fyrstu stigum.  Nánast undantekningalaust ná þeir betri tökum á skrautskrift þegar líður á námskeiðið.  Þegar ég rifja upp ferilinn þá eru næstum allir bestu nemendur örvhentir.  Sumir hafa dúxað svo glæsilega að þeir hafa á miðju námskeiði farið fram úr mér.  Samt er ég mjög góður skrautskrifari.  Mun hærra hlutfall örvhentra nær framúrskarandi árangri í skapandi greinum en þau 10% sem þeir eru af samfélaginu.  

  Nærtækt er að skima tónlistarmenn.  Helmingur stærstu og merkustu hljómsveitar rokksögunnar,  Bítla, var örvhentur.  Bassaleikarinn frábæri Paul McCartney og trommarinn flotti Ringo Starr.  

 

  Til að nefna aðeins örfáa örvhenta í hópi annarra merkustu tónlistarmanna rokksins nægir að vísa til gítarhetjunnar Jimi Hendrix (sem bylti hugmyndum um gítarleik til frambúðar) og Kurt Cobain (sem skóp svokallaða gruggbylgju).  

 

  Ein kenning - sem ekki hefur verið sönnuð - er að örvhentir þurfi svo oft að kljást við tæki og tól hönnuð fyrir rétthenta að þeir þurfi að stöðugt að virkja ímyndunarafl til að finna lausn fyrir örvhenta.  Þetta örvi sköpunargleðina.  Sá hluti heila örvhentra sem vinnur með sköpunargleði sé virkari en hjá "rétthentum".   

 

10 staðreyndir um örvhenta

Athugasemdir

[Jósef Smári Ásmundsson, 15.8.2014 kl. 19:34]

Þórhallur bróðir er örvfættur og örvhentur og það hefur aðeins hjálpað honum í boltanum.Hann er reyndar líka hjólbeinóttur í meira lagi og utanfótarspyrnur hans hafa þar af leiðandi þann eiginleika að boltinn fer í ævintýralegum boga. Ég held hann eigi metið að skora beint úr hornspyrnum í þriðju deildinni. Hann var hins vegar vonlaus í vítaspyrnunum vegna kjæks sem hann hafði að skjóta tungunni út um munnvikið þeim megin sem hann ætlaði að skjóta. Markmennirnir vissu þessvegna alltaf í hvort hornið boltinn myndi fara. Og svo má skjóta því að að Kiddi bróðir er eini rétthenti gítarleikarinn á landinu( að ég held) sem spilar öfugt á gítarinn vegna þess að hann er með staurfingur á vinstri hendi. Öll önnur börn í þessari fj0lskyldu eru mestmegins eðlileg, en ég er reyndar þónokkuð tæpur.

[Jens Guð, 16.8.2014 kl. 13:06]

Jósef Smári, takk fyrir þetta skemmtilega innlegg. Ég man að Kiddi var eitthvað að pikka upp Jethro Tull "riff" og Santana. En ekki mundi ég eftir því hvernig gítarinn snéri í höndunum á honum.

[Elvar Másson (IP-tala skráð) 21.8.2014 kl. 02:07]

Ég er rétthentur, þ.e.a.s. geri flest með vinstri (O:þ

[Jens Guð, 21.8.2014 kl. 11:12]

Elvar, þetta er túlkunaratriði.