Hárþvottur upp úr kúahlandi

  Í aldir hafa vel hærðar konur þvegið hár sitt upp úr kúahlandi.  Kúahlandið er í raun jurtasjampó.  Beljan lifir alfarið á grasi.  Hún er sólgin í gras.  Grasið inniheldur ýmis góð næringarefni.  Meðal annars fyrir hárið.  

  Ókosturinn við að þvo hárið upp úr kúahlandið er að beljan pissar ekki eftir klukkunni.  Fagurhærðar konur þurfa þess vegna að sitja tímum saman úti í fjósi og bíða eftir því að belju verði mál.  Þegar að því kemur er nauðsynlegt að hafa snör handtök og setja höfuðið undir bununa.  Til að hámarks árangur náist þarf kúahlandið góða stund til að koma sér fyrir í hársverðinum og næra hann.  Kannski hálftíma eða svo.

  Kostur við að næra hárið með kúahlandi er að það skilur eftir sig þægilega fjósalykt.

  Önnur hárnærandi aðferð til að þrífa hárið er að þvo það upp úr hreinu Aloe Vera geli.  Það hefur hreinsandi eiginleika og nærir hársvörðinn af 75 vítamínum og steinefnum.  Ókosturinn er að þá vantar fjósalyktina.  

 

Má bjóða þér hland í hárið?

Athugasemdir

[Tobbi (IP-tala skráð) 6.5.2015 kl. 09:43]

Það er náttúrlega ókostur að fjósalyktina vantar. Verulegur ókostur.  En ráð er við því. Einhver góður maður semur við Bananabátinn að búa til kúahlandsgel og markaðssetur það svo með tilheyrandi lykt. En þess verður vitaskuld að geta að til að hlandið virki sem skyldi verður kýrin að vera kálffull. Sé hún það ekki má prófa að hafa hana kálfulla.

En ég treysti því að menn grípi tækifærið.  Fátt er unaðslegara en ung kona ilmandi af kúahlandi.  Þar kemst alóe vera hvergi nálægt.

[Tómas Ísfeld (IP-tala skráð) 6.5.2015 kl. 15:38]

Lauga frænka á Uppsölum var mögnuð kona sem bjó í torfbæ til 2000 og eitthvað. Meðal skemmtilegra hluta, að mér fannst, var einmitt að hún þvoði hárið reglulega uppúr kúahlandi. Súper hárnæring sem lét hárið á henni glansa vel og mikið.

[Jens Guð, 7.5.2015 kl. 22:39]

Tobbi,  ég kvitta undir þetta.

[Jens Guð, 7.5.2015 kl. 22:41]

Tómas,  kúahlandið virkar.  Svo sannarlega.