Umdeildir kleinuhringir, sleiktir og ósleiktir

 

1100 mann hafa "lækað" frétt mbl.is af væntanlegri opnun kleinuhringjastaðarins Dunkin´Donuts á Laugavegi 3.  Formleg opnun verður um mánaðarmótin júlí/ágúst.  Eða því sem næst verslunarmannahelginni.  Flest "lækin" eru komin frá lögregluþjónum.  Þeir eru spenntir fyrir kleinuhringjunum.  Einkum þeim sem hafa mikið af glassúr.  Jafnframt hefur myndast mikill þrýstingur frá lögregluþjónum á landsbyggðinni um að fá í sitt þorp útibú frá DD kleinuhringjum.  

  Ekki fagna allir innrás DD.  Tónlistarmaðurinn frábæri Oddur Hrafn Björgvinsson - þekktastur sem rokkstjarnan Krummi í Mínus - hefur stigið fram og lýst yfir vanþóknun á þessu ullabjakki.  Og uppskorið á Fésbók hátt í sex hundruð "læk" á það.  Ekkert frá lögregluþjónum.  Krummi veit hvað hann syngur.  Einn besti söngvari landsins,  flottur lagahöfundur og túlkandi í hljómsveitum á borð við Esju og Legend.  

  Það er alltaf gott þegar poppstjörnur láta sig varða samfélagsmál.   

  Ég veit ekki hvernig á að túlka viðhorf bandarísku söngkonunnar Ariana Grande til kleinuhringja.  Hún hefur viðbjóð á þeim og merkir þá með slefi í búðum sem selja þá. Sleikir þá svo lítið ber á. Það er ekki til eftirbreytni.  Ef hún er með hundaæði,  herpes eða alnæmi þá er hætta á að hún smiti kleinuhringjaætur af þessum sjúkdómum.  Ástæða er fyrir íslenska DD staði og viðskiptavini til að vera á varðbergi gagnvart sleiktum kleinuhringjum.  

  Ég hef ekki smekk fyrir kleinuhringjum.  En þeim mun meiri smekk fyrir Legend, Esju og Mínus.  Hvort sem er harðkjarnarokki eða Kurts Weills-legri efnistökum. 

 

https://www.facebook.com/krummi.bjorgvinsson?fref=nf&pnref=story

Dunkin´Donuts fer ekki framhjá neinum

Athugasemdir

[Sverrir Einarsson, 12.7.2015 kl. 12:33]

Þektastur fyrir Mínus veru sína, rokksveit sem lagði upp laupana fyrir "100" árum eða svo, eflaust vegna vinsælda að mér skilst. Það er vani velmegandi hljómsveita að hætta á hátindinum ekki satt eða þegar áhangendur fá "leið" á bandinu. Sbr. óvinsælar hljómsveitir eins og Rolling Stones svo dæmi sé tekið.

Hvað varðar DD er það enginn mælikvarði á gæði eða ógæði þeirra vöru þó einhver Krummi sé erlendum vörumerkjakeðjum andvígur, er þá næst að taka fyrir t.d. Dominos keðjuna og hvað þær heita allar verslaninrnar sem bera "keðjunöfn" og selja fatnað (sem téður Krummi klæðist örugglega).. ég bíð spenntur hvað keðja verður aðnjótandi téðs Krumma hvað mótmæli varðar. Margar eru nú "tuskubúðirnar" sem mér "leiðast" samt fer ég ekki með myndavél og kunningja til að taka myndir þar fyrir utan.. ég bara læt duga að halda mig fyrir utan þær verslanir eða amk í hæfilegri fjarlægð, hafi þær kúnnahóp sem getur haldið þeim gangandi halda þær velli í samkeppninni, nú ef ekki þá deyja þær drottni sínum, stundum í kyrrþey stundum deyja þær með kvelli og látum auk afskrifta.. en það er önnur saga, ég held að téður Krummi sé örugglega að reyna að verja okkur frá einhverju óhollu enda er hann þektur fyrir að vera í fararbroddi heilsusamlegs lífernis ekki satt.

[Sigurður I B Guðmundsson, 12.7.2015 kl. 20:14]

Hvað segir Ásdís Rán um þetta mál??

[Jens Guð, 12.7.2015 kl. 20:15]

  Sverrir,  af hverju segir þú að Mínus hafi lagt upp laupana?  Ég kannast ekki við það.  Hljómsveitin er til að mynda virk á Fésbók.  Reyndar ekki mjög virk.  En samt.  

  Ég veit ekki hvernig þú færð út að Rolling Stones sé óvinsæl hljómsveit.  Fáar hljómsveitir hafa jafn mikið aðdráttarafl þegar kemur að hljómleikum.  

[Jens Guð, 12.7.2015 kl. 20:15]

Sigurður I B,  hver er það?