Taugaveiklun í Skotlandi vegna afskipta af átökum hryðjuverkasamtaka og Færeyinga

 

 

 

 

 

 

 

 

  Fyrir nokkrum dögum skýrði ég samviskusamlega frá nýjustu tíðindum í baráttu hryðjuverkasamtakanna Sea Shepherd gegn hvalveiðum Færeyinga. Þar kom fram að SS-sveit hraktist frá Færeyjum til Hjaltlandseyja.  Hún var á stóru skipi sem heitir Bob Barker.  Eins og önnur stór skip SS var það búið glæsilegum spíttbát.  Færeyska lögreglan skilgreinir spíttbátana sem hluta af vopnabúnaði SS.  Þeir eru notaðir í árangurslausum aðgerðum SS-liða gegn hvalveiðunum.  

  Færeyska lögreglan hafði samband við skosku lögregluna í Hjaltlandseyjum.  Hún fer með löggæslu þar.  Erindið var að biðja hana um að skjótast um borð í Bob Barker,  taka þaðan spíttbátinn og skutla honum í danskt herskip sem var þarna við bryggju.  Færeyska lögreglan myndi síðan hafa ráð til að nálgast spíttbátinn hjá danska herskipinu.

  Þetta var auðsótt mál.  Um það má lesa með því að smella á þennan hlekk:  HÉR

  Forsprakki SS,  Paul Watson,  reitir hár sitt og skegg í reiði yfir framgöngunni.  Hann segir að það hafi aldrei hvarflað að sér og sínum að armur færeysku lögreglunnar væri þetta langur;  að hann nái til Hjaltlandseyja og spili með skosku lögregluna eins og strengjabrúður.  

  Paul viðurkennir að Færeyingar hafi unnið lotuna um hvalveiðar í sumar.  Enda getur hann ekki annað. SS-liðar hafa ekki komið í veg fyrir veiðar á svo mikið sem einu marsvíni (grind) í sumar.  Þvert á móti hafa veiðar gengið vel,  fjöldi SS-liða kærður,  sakfelldur, dæmdur til hárra fésekta og rekinn úr landi.  

  Paul hótar því að sigur Færeyinga sé aðeins tímabundinn.  SS sé hvergi hætt baráttunni gegn hvalveiðum Færeyinga.  Það verði óðar bætt við nýjum setuliðum í Færeyjum í stað þeirra sem eru gerðir brottrækir.  Sömuleiðis verði nýjum spíttbátum komið til Færeyja í stað þeirra sem lögreglan leggur hald á.

  Paul hótar að gera einnig út af við laxeldi Færeyinga.  Meira um það seinna.  

  SS-liðar ætla að standa vaktina í Færeyjum fram í október.  Hvers vegna svona lengi veit ég ekki.  Það koma engar hvalvöður þegar þetta langt er liðið á haust.

  Nú hefur það gerst að umræðan hefur borist inn í skoska þingið.  Spurning hvort að Paul Watson eða aðrir SS-liðar eigi þátt í því á bak við tjöldin.  Þingmaður Græningja lagði fram formlega fyrirspurn til formanns Skoska þjóðarflokksins um þátt skosku lögreglunnar í að láta færeysku lögregluna siga skosku lögreglunni á SS.  Þingmaðurinn kveðst óttast mjög að þetta eigi eftir að hafa alvarlegar afleiðingar.  Þingmaðurinn hefur jafnframt sent skoska ríkissaksóknaranum fyrirspurn um málið.  

  Fulltrúi Skoska þjóðarflokksins segist ekki vilja tjá sig um málið að svo stöddu.  Hugsanlega sé um lögbrot og refsimál að ræða.  

 

Athugasemdir

[Ásthildur Cesil Þórðardóttir, 11.9.2015 kl. 23:38]

Fábjánar og þaðan af verra þessir SSliðar.  

[Hörður Þormar (IP-tala skráð) 12.9.2015 kl. 08:59]

Grindarspik er mengað af kvikasilfri. Ofát af því er ekki hollt fyrir heilann.

[Vilhjálmur Örn Vilhjálmsson, 12.9.2015 kl. 10:52]

Gaman væri að fá upplýsingar um tíðni krabbameins í heila, lifur, brisi og meltingarveginum á Færeyingum. Þar er ég viss að gæti orðið meiri þrándur í götu Færeyinga en SS-foringinn Watson.

Mér var einu sinni tjáð í Færeyjum að mikið af grind væri hent á haugana, og ég sá hvernig stórum pokum af grindakjöti og spiki hafði verið kastað út á sorpklettinn á Sandi. Þar var sorpinu ýtt í sjó fram 500 m. frá bænum, og svo undraði það íbúana alltaf hve mikið væri hent af skipum, m.a. meðalaglösum íbúanna á Sandi. Þannig rök koma víst gjarnan þegar menn eru fullir af þungmálmum í heila. Kannski veiða Færeyingar meira en þörf krefur?

[Jens Guð, 12.9.2015 kl. 17:34]

Ásthildur Cesil,  ég tek undir það.

[Jens Guð, 12.9.2015 kl. 17:42]

Hörður Þormar,  það er rétt hjá þér.  Færeyingar borða hvorki lifur né nýru hvalsins út af þessu.  Þetta er eins og með túnfiskinn sem Íslendingar borða ógrynni af.  Hann er uppfullur af kvikasilfri.  Kínverkst hunang er mengað þungmálmum.  Þannig mætti áfram telja.  Á meðan fólk er meðvitað um þetta passar það sig á að borða svona matvæli ekki í óhófi.

[Ásthildur Cesil Þórðardóttir, 12.9.2015 kl. 18:00]

Er þetta nokkuð hættulegra en hormónakjötið sem fólk fær í Bandaríkjunum eða pensilínmengaða dýrakjötið í Evrópu?

[Jens Guð, 12.9.2015 kl. 18:02]

  Vilhjálmur Örn,  Færeyingar eru heilsuhraustir og stálslegnir fram eftir öllum aldri.  Meðalævilengd Færeyinga er sú hæsta í danska sambandsríkinu.  Jafnframt töluvert hærri en í Evrópusambandinu eins og það leggur sig.  

  Meðalævilengd færeyskra kvenna er 83 ár og karla 78 ár.  

  Færeyingar umgangast hvalkjötið af varfærni.  Það er mikil umræða í Færeyjum um hættuna.  Barnshafandi konur láta það ekki inn fyrir sínar varir né heldur ókynþroska stúlkubörn.  Aðrir borða hvalinn ekki oftar en tvisvar í mánuði.  Yngra fólk einu sinni í mánuði.  Aldraðir leyfa sér að hafa hann oftar á borðum  Lifur og nýrum er fargað.

  Færeyingar veiða ekki meira af hval en þörf krefur.  Að öllu jöfnu.  Hafi vöðu verið slátrað í einum firði og önnur vaða birtist í sama firði sama sumar þá er seinni vöðunni vísað á haf út aftur.  

  Fyrir daga frystikistunnar er næsta víst að eitthvað hvalkjöt hafi skemmst og verið fargað.  En ekki í dag.      

[Jens Guð, 12.9.2015 kl. 18:02]

Ásthildur Cesil,  góður punktur!

[Ásthildur Cesil Þórðardóttir, 12.9.2015 kl. 18:18]

Kona spyr sig 

[Valdimar Samúelsson, 12.9.2015 kl. 22:26]

Það sem ég dáist við Færeyinga er skapið þeir láta ekki SS brjóta sig niður og halda sinni þjóð sem þjóð. Engir vælukjóar né auðnuleysingjar á styrkjakerfinu. Hér vælum og grátum við,við öllu og hjálpum terroristum sem bleyjubörnum, hýsum erlend glæpagengi ekki eitt heldur mörg allt samkvæmt lögum eða kannski eru það ólög.

[Valdimar Samúelsson, 12.9.2015 kl. 22:29]

Já ætlaði að byrja á. Góð grein hjá þér Jens en myndinn er !#%/" .af þér.... 

[Jens Guð, 13.9.2015 kl. 18:11]

Valdimar,  það er ekki auðvelt að leysa þetta með myndina.  Ég á ekki myndavél.  Þetta er eina myndin sem ég á frá þessari öld.