Forsetaframbjóðandi misstígur sig

  Ég hef aldrei nennt að fylgjast með vali republikana á frambjóðanda til embættis forseta Bandaríkja Norður-Ameríku.  Enda kemur mér það ekkert við.  Nú er öldin önnur er Sveinbjörn stökk á stöng.  Einn af frambjóðendunum er litríkur.  Það er góð skemmtun að fylgjast með Trump.  Það gustar af honum.  Sjálfur lýsir hann keppinautum sínum sem dusilmennum.  Gufum og görmum.  Sennilega er eitthvað til í því.  Án þess að ég hafi kynnt mér neitt um þá virðist mér sem þetta sé hópur snyrtilega klipptra og greiddra eldri hvítra karlmanna í grálitum jakkafötum.

  Trump er hálfskoskur.  Fyrir nokkrum árum var ég staddur í Skotlandi.  Þá vildi Trump kaupa Skotland og breyta því í golfvöll.  En nú vill hann verða forseti.

  Í upphafi kosningabaráttu sinnar gerði Trump út á baráttulag eftir Njál Unga,  "Rockin in The Free World".  Njáll brást hinn versti við.  Harðbannaði Trump að nota lagið.  Umboðsmaður Njáls var þó búinn að leyfa notkun lagsins og fá pening frá Trump fyrir.  Þetta varð Trump til töluverðrar háðungar.  Það styrkti mjög stöðu hans meðal reppanna. 

  Eftir miklar vangaveltur og vandræðagang kynnti Trump til leiks nýtt kosningalag. Það er "It´s The End Of The World As We Know It (And I Feel Fine)" með hljómsveitinni REM.  Nú hafa liðsmenn REM sameinast um að banna Trump að nota lagið.  Ekki nóg með það.  Þeir tala líka illa um hann og hans viðhorf.  Í yfirlýsingu hvetja þeir Trump til að hafa mök við sjálfan sig (fuck yourselves).  Þeir lýsa honum sem aumkunarverðu, athyglissjúku og valdagráðugu lítilmenni.

  Þetta mun tryggja Trump yfirburðasigur meðal reppa.  

  Trump lætur framleiða fyrir sig hálsbindi,  skyrtur og allskonar fyrir lítinn pening úti í Kína.  Eitt af baráttumálum hans er að ná allri framleiðslu á bandarískum vörum úr höndum Kínverja og láta Bandaríkjamenn sjálfa framleiða bandarískar vörur.  Þetta er honum svo mikið hjartans mál að hann á það til að hrópa orðið "China,  China,  China" upp úr svefni heilu og hálfu næturnar.

  Einnig hefur orðið vart við að þegar hann heldur sig vera í einrúmi þá tautar hann stöðugt "China,  China, China" fyrir munni sér.

  

  

Athugasemdir

[Stefán (IP-tala skráð) 10.9.2015 kl. 11:56]

Hver er okkar Trump ?  Í fljótu bragði virðist mér formaður Framsóknarflokksins líkjast honum einna mest. Bara mitt sjónarmið auðvitað. 

[Jens Guð, 10.9.2015 kl. 19:51]

Stefán,  það er margt til í því.

[Jóhann Kristinsson, 10.9.2015 kl. 20:20]

Ekki gleyma Jón Gunnari Kristinssyni, Trump er Gnarrinn okkar.

Kveðja frá Houston

[Jón Valur Jensson, 12.9.2015 kl. 19:39]

Það er oft upplýsandi að lesa pistla hjá, þér, Jens, en þú ert greinilega í engu jafnvægi hér, ekki frekar en myndbandið sem er greinilega samsett af andstæðingum Trumps.

Reyndu næst að fræða um þessi mál, háðið eitt nægir ekki -- ég er engu nær og var svo sem ekkert hrifinn af þessum frambjóðanda.

[Jón Valur Jensson, 12.9.2015 kl. 19:43]

PS. Þetta er engu skárra en einelti Rúvara og 365-ara gagnvart George Bush yngra strax í kosningabaráttu hans -- hann átti að vera svo skelfilega illa máli farinn, fáfróður og alltaf að mismæla sig. Þetta reyndist stórlega orðum aukið, og ekki er Obama neitt skárri með sín mismæli!

[Jón Valur Jensson, 12.9.2015 kl. 19:44]

Íslenzkir fjölmiðlar eru einfaldlega með fordóma gegn Repúblikönum.

[Jens Guð, 12.9.2015 kl. 23:44]

Jóhann, takk fyrir áminninguna.

[Jens Guð, 13.9.2015 kl. 00:05]

  Jón Valur,  sem músíkdellukarl á hæsta stigi er ég með færslunni fyrst og fremst að leggja út af samskiptum Trumps við fræga tónlistarmenn.  Njáll Ungi og REM eru stórveldi í tónlistarsögunni.  Þeirra stormasömu samskipti við Trump eru fréttnæm.  Fréttir af þessu hafa náð langt út fyrir músíkbransann og inn í heimspressuna.  Öll nöfn sem koma við sögu eru stór.  Mér er ljúft að leyfa Íslendingum að fylgjast með.

  Ef ég væri með kosningarétt í Bandaríkjunum myndi ég styðja Trump.  Hann er töffari og litríkur karakter.  Líka eldsnöggur að skipta um skoðun eftir því hvern hann ávarpar hverju sinni. Það er kostur.  

 Eitt af því skemmtilega við Trump er að hann lætur allt vaða.  Hann talar í mótsögnum inn á milli.  Stundum er hann andvígur fóstureyðingum.  Stundum er hann fylgjandi þeim.  Það fer eftir því hverjir eru áheyrendur.  Stundum er hann hálfur Skoti.  Stundum er hann afkomandi Þjóðverja.  Stundum fordæmir hann hjónaskilnað sem synd.  Sjálfur er hann þrígiftur.   

  Ég er aðdáandi Trumps  Þökk sé honum að ég hef í fyrsta skipti á ævinni áhuga á vali reppa á frambjóðanda til forseta.