Fólskuleg árás

 

 

 

 

 

 

 

 

  Sólin skein samviskusamlega upp á hvern dag í Alicante.  Það var hlýtt og notalegt. Það var ljúft að sitja úti á gangstétt með einn til tvo kalda á kantinum.  Njóta sólarinnar og hugsa til Íslands.  Sjá fyrir sér íslenska snjóskafla,  hrímaðar bílrúður og frostbarða Íslendinga.  

  Ég sat aldrei á sjálfri gangstéttinni heldur á stól.  Síðdegis þrengdust kostir.  Verslunum og veitingastöðum var lokað hverjum á fætur öðrum í tvo til þrjá klukkutíma í senn.  Sumum klukkan eitt.  Öðrum klukkan tvö.  Þá voru Spánverjar að taka sinn reglubundna síðdegislúr.  Svokallaðan "síesta".  Mér varð að orði:

  Spánverjar spígspora um götur

og spjalla um allt það besta

sem á dagana hefur drifið

og dorma svo í síesta.  

  Rannsóknir hafa sýnt að síðdegislúrinn sé hollur.  Í honum hleður líkaminn batteríin svo munar um minna. Þetta vissu íslenskir bændur fyrr á tíð.

  Fyrstu nóttina í Alicante varð ég fyrir fólskulegri árás.  Ég varð þó ekki var við neitt fyrr en að morgni.  Þá sá ég að moskítóflugur höfðu bitið mig.  Fyrst voru bitsárin varla sýnileg.  En þeim fylgdi kláði.  Á næstu dögum urðu þau sýnilegri:  Dökknuðu, stækkuðu, urðu dökkrauð og upphleypt.  Kláðinn jókst og bitsárum fjölgaði á hverri nóttu.  

 Moskítóflugan er lúmsk.  Hún felur sig.  Bíður eftir ljósaskiptum og því að fórnarlambið sofni.  Þá fer hún á stjá.  Í svefnrofanum má heyra lágvært suð frá henni á flugi.  Hún notar deyfiefni til að fórnarlambið verði einskis vart er hún sýgur úr því blóð.  

  Til að alhæfa ekki í óhófi þá er rétt að taka fram að karlflugan áreitir enga.  Einungis kvenflugan.

  Á heimleið var ég alsettur bitförum.  Húðin líktist yfirborði pizzu.  Það neyðarlega er að ég rek litla heildsölu og sel apótekum öfluga bitvörn í nettu úðaspreyi,  Aloe Up Insect Repellent.  Ég hafði enga rænu á að grípa hana með mér til Spánar.  Í apótekum í Alicante fann ég "roll on" sem átti að gera sama gagn.  Það gerði ekkert gagn.  Nema síður sé.  Sólvarnarkrem í þarlendum apótekum eru sömuleiðis algjört drasl.

  Ég ráðlegg væntanlegum Alicante-förum að grípa með sér frá Íslandi góðar sólarvörur og bitvörn.  Ekkert endilega Aloe Up,  Banana Boat eða Fruit of the Earth.  Eða jú.    

         

Athugasemdir

[Sigurður I B Guðmundsson, 8.1.2016 kl. 22:35]

Þá er bara eitt að gera: Flytja inn moskítóflugur eða flytja út Aloe Up Insect Repellent til Spánar!! 

[Jósef Smári Ásmundsson, 9.1.2016 kl. 08:20]

ja, menn halda að hún noti deyfiefni en í raun svæfir hún fólk með klóroformi. Þessvegna sofna spánverjarnir alltaf í hádeginu sem er matartími moskítófluganna.

[Ásthildur Cesil Þórðardóttir, 9.1.2016 kl. 14:27]

Takk fyrir ábendinguna Jens.  Þarf að muna eftir bitvörn. 

[Jens Guð, 10.1.2016 kl. 17:28]

Sigurður I B,  moskítóflugur hafa margoft borist til Íslands með vöruflutningum.  Hér eru hinsvegar ekki réttu skilyrði fyrir þær til langdvalar,  öfugt við til að mynda á Grænlandi (og smávegis í Færeyjum).  Það er þess vegna ekki um annað að ræða en taka hinn kostinn:  FLytja Aloe Up Insect Repellent til Spánar.

[Jens Guð, 10.1.2016 kl. 17:29]

Jósef Smári,  takk fyrir fróðleiksmolann 

[Jens Guð, 10.1.2016 kl. 17:30]

Ásthildur Cesil,  endilega.