Gríðarleg eiturlyfjaneysla í kirkjum

  Það er ekkert leyndarmál að í Alþingishúsinu og í kirkjum er almenn og töluvert mikil neysla á eiturlyfjum.  Einkum kókaíni og amfetamíni.  Líka hassreykingar og misnotkun þunglyndislyfja,  áfengis og munntóbaks.  Þetta vita allir sem vilja vita.  

  Þetta hefur verið sannreynt í breskum kirkjum.  Tekin voru sýni á klósettsetum 25 kirkja.  Af þeim reyndist næstum helmingur (11) vera löðrandi í kókaíni.  Undrun vakti að hlutfallið væri ekki hærra.  Á móti vegur að kókaín er svo sem ekkert vinsælasta eiturlyf í kirkjum.  E-pillur, hass,  LSD,  englaryk,  áfengi og sitthvað fleira er alveg eins vinsælt.  Ekki síst hérlendis.

 

Athugasemdir

[Kristin stjórnmálasamtök, 16.1.2016 kl. 21:13]

Þetta getur, sem betur fer, naumast átt við um kirkjulíf á Íslandi, Jens, enda eru kirkjurnar hér á landi oftar en ekki læstar og ekki allar með snyrtiaðstöðu, t.d. hafa gestir Dómkirkjunnar niðri í miðbæ ekki aðgang að neinu salerni þar. Öðru máli gegnir ugglaust um kirkjur í borgum Bretlands. -B.kv. -JVJ.

[FORNLEIFUR, 16.1.2016 kl. 21:57]

Guð hjálpi okkur. Nú er Jens snúin til trúariðkana með tilheyrandi meðölum. Ég leyfi mér að benda Kristnum stjórnmálasamtökum á að englaryk er ekkert nýtt í +islenskum kirkjum. Englar fara of víða um veröld og hvíla sig þá á grátum og bekkjum í kirkjum á helgidögum. Þeir halda mikið upp á Ísland og borða á kjúklingabúllum. Hins vegar get ég staðfest að ég heyrði af þessu vandamáli með klósettleysið í sjálfri Dómkirkjunni. Eitt sinn stóð presturinn þar og blessaði söfnuðinn með þessum orðum: "Í nafni Guðs föður, Sonarins og ég þarf að pissa." Afi minn heitinn taldi öruggt, að sóknarnefndin hefði fengið hana ömmu mín til að baka sínar landsþekktu pönnsur þeim að kostnaðarlausu. Þær voru lengi vel sterkasti vímugjafinn í Dómkirkjunni. Menn komust bókstaflega í trúarlega vímu á pönnukökunum hennar ömmu.

[FORNLEIFUR, 16.1.2016 kl. 21:57]

snúinn átti að standa þarna, Jón Valur...

[Loncexter, 16.1.2016 kl. 21:58]

Líklegasta skýring þykir mér sú, að fólk sem er fast í fíkninni leiti í kirkjurnar eftir lausn. Það verður að teljast afar ólíklegt að hinn týpíski kirkjugestur sé að nota eyturlyf.

[Wilhelm Emilsson, 16.1.2016 kl. 22:09]

Ég hélt fyrst að Jens væri að leika sér með hina frægu setningu Karls Marxs að trú sé ópíum fólksins :)

Lífið er erfitt og fólk þarf stundum ópíum, hvort sem það eru trúarbrögð, pólitísk hugmyndfræði, eins og hugmyndir Marx og Engels, bjór, ólöglegt dóp, eða sterk verkjalyf.

[Sigurður I B Guðmundsson, 17.1.2016 kl. 12:02]

Hvað er Hugleikur Dagsson að gera þarna??

[Stefán (IP-tala skráð) 18.1.2016 kl. 08:10]

Hafa svona prófanir verið gerðar á salernum á skrifstofum Framsóknarflokksins ?

[Jens Guð, 18.1.2016 kl. 08:54]

Jón Valur,  ég þekki dæmi þess að menn hafi sniffað inni á klósetti í Bústaðakirkju.  Ekki starfsmenn heldur gestir á messutíma.  Einnig veit ég dæmi þess að fólk hafi fengið sér í kirkju sem stendur utan þjóðkirkjunnar.  Eflaust er mun meira um þetta í Bretlandi.  Þar hafa fundist kók- og amfetaminleifar á hverjum einasta seðli sem er skoðaður.

[Jens Guð, 18.1.2016 kl. 08:55]

Fornleifur,  takk fyrir skemmtilega söguskýringu.

[Jens Guð, 18.1.2016 kl. 08:57]

Loncester,  ég get næstum því fullyrt að hinn almenni kirkjugestur brúki ekki eiturlyf inni í kirkjum.  Né heldur starfsmenn.

[Jens Guð, 18.1.2016 kl. 08:58]

Wilhelm,  það er alveg rétt að sumir þurfa sterk verkjalyf.  

[Jens Guð, 18.1.2016 kl. 08:59]

Sigurður I B,  er hann ekki að viðra vasaklút þarna?

[Jens Guð, 18.1.2016 kl. 09:00]

Stefán,  það treystir sér enginn til að koma nálægt þeim salernum.