Æsispennandi kosningaslagur framundan

  Töluverðrar taugaveiklunar er farið að gæta í herbúðum sumra þeirra sem tilkynnt hafa framboð sitt til embættis forseta Íslands.  Í dag er síðasti skiladagur á undirskriftum meðmælenda framboðsins.  Þegar hafa nokkrir tilkynnt að söfnun nægilega margra meðmælenda hafi reynst þeim ofviða.  Aðrir eru á ægilegu spretthlaupi í dag og eru að niðurlotum komnir eftir spretthlaup síðustu daga.  Í einhverjum tilfellum er allt unnið fyrir gíg.

  Þegar í ljós kemur hverjir eru með öll gögn í lagi og verða í framboði hefst kosningabaráttan loks fyrir alvöru.  Þá verður gripið til ýmissa ráða.  Samkvæmt skoðanakönnunum og í spjalli meðal fólks eru verulegar líkur á því að næstum því öll framboðin nái ekki þeim árangri sem að er stemmt.  Nánast allar líkur eru á því að einungis einn frambjóðandi fái nægilega mörg atkvæði til að verða kjörinn forseti.

  Í örvæntingu um að hífa upp fylgi verður víða gripið til óvæntra útspila.  Hvað gengur í skrílinn?  Eitt kosningaloforð sem er í skoðun er að læsa bæði svefnherbergi og eldhúsi Bessastaða.  Verði viðkomandi kosinn forseti muni hann gista heima hjá sér og taka með sér nestisbox og kaffibrúsa í vinnuna upp á hvern virkan dag.  Í allra verstu veðrum hefur hann svefnpoka með meðferðis og sefur þá á gólfinu á Bessastöðum.

  Ef útlenda gesti ber að garði verður þeim einungis boðið upp á brjóstsykur.  Einn moli á mann.  Nema um höfðingja sé að ræða.  Með þá verður farið í matstofu Samhjálpar.  Þar verða þeir fóðraðir á heitri súpu og brauðsneið.

  Þetta er sparnaður sem nemur gríðarháum upphæðum.  Mestur sparnaður verður í launakostnaði.  Fjölda manns verður sagt upp.  Það kemur sér vel fyrir atvinnulífið.  Nú er mikill skortur á vinnandi höndum í byggingariðnaðinum.  

  Fyrir sparnaðinn verða ný tæki keypt á Landspítalann við Hringbraut í stað úreltra og bilaðra tækja.  

  Það á eftir að útfæra tillöguna betur.  Ef hún reynist ekki afla nægilegri fylgisaukningu þá verður bætt í hana loforði um að forsetabíllinn verði seldur og andvirðinu skipt á milli öryrkja, aldraðra,  einstæðra mæðra og fátæklinga.

  Félagar í BDSM ganga óbundnir til kosninga.

Guðni á pari við Davíð

Athugasemdir

[Jón (IP-tala skráð) 20.5.2016 kl. 19:16]

Ég vona að þú hafir rétt fyrir þér með að einn frambjóðandi fái flest atkvæði.  Ég hef nokkrar áhyggjur af því að þeir fái allir jafn mörg atkvæði.  Það gæti valdið ófremdarástandi á Íslandi með ófyrirsjáanlegum afleiðingum.  En það er margt gott að ske, og hver veit nema forsetaembættið í framtíðinni verði ólaunuð sjáfboðavinna.  Það samræmist ótrúlega vel náttúrulegu inntaki þessa embættis.  Það mætti jafnvel hugsa sér að sé forsetinn efnaður geti hann borgað með sér og þannig verið tekjulind fyrir þjóðina.  Spennandi tímar.

[Anna Sigríður Guðmundsdóttir, 20.5.2016 kl. 19:20]

Var að hlusta á Davíð á Útvarpi Sögu, og persónan Davíð er ekki óskynsamur einstaklingur. Húmorinn er svo sérstakur kapítuli út af fyrir sig, sem ekki skyldi vanmeta. Dagur án hláturs er ekki jákvæður dagur. Á jákvæðninni byggist gleðin og kærleikurinn. Eða er það ekki trúlegt?

En jafnvel þótt hann Davíð hafi í upphafi aldrei viljað gera neinum neitt illt, þá eru ávalt til baktjaldaöfl og múgæstar launaðar fylkingar sem settar eru til höfuðs vel meinandi hæfileikafólki.

Aldrei getur réttlætið og mannúðin siðmenntaða orðið að veruleika ef sumir láta alltaf blekkjast af opinberlega reknum hálfsannleiksfjölmiðla-stjórnun og launagreiðslum fyrir svik og óheiðarleika af ýmsu tagi. Það þarf nú auðvitað ekki mig til að benda á þessa auðskiljanlegu staðreynd, því þetta er bara lögmál og karma margvíddanna-lífsljóssins.

Davíð er í grunninn alls ekki illa innrættur einstaklingur, frekar en allir aðrir. (allir eru gallaðir). Og að mínu mati er hann vel gerður einstaklingur, en illa svikinn einstaklingur, á mörgum sviðum pólitíska sviðsins upp í gegnum árin.

Illa innrættir einstaklingar/heimsöfl geta á löngum tíma gert besta fólk, (t.d. Davíð), að blórabögglum alls sem afvega hefur farið, og fengið óheiðarlegar launagreiðslur fyrir siðlausan óheiðarlegan niðurlægingaráróðurinn.

Heiminum er stjórnað á þennan óheiðarlega hátt í dag, og einungis heiðarleg ó-illgjörn umræða getur breytt og bætt þessa brengluðu heimsstjórnun bankafalsandi kúgunarstjórnenda.

Ég var búin að ákveða að kjósa Sturla Jónsson, vegna þess að hann er heill baráttumaður í því sem hann segir og gerir, og skilur baráttu svikins almennings gagnvart ofurvaldi fjármálakerfisins embættis/dómsstólastýrða. Ég verð að viðurkenna að ég varð dálítið pirruð þegar Davíð bauð sig fram, því þá þurfti ég að endurskoða mitt val milli þessara tveggja vanmetnu baráttumanna. Ég er ekki ennþá búin að endurskoða mitt val nógu vel. En ég kýs nú bara fyrir minn sálar-samningsskilning hér í jarðlífskólavistinni.

Aðrir verða að hlusta á sitt eigið sálarsamnings-skilningshjarta, þegar þeir kjósa. Annars verður atkvæðið ekki ekta raunverulegt lýðræðisatkvæði einstaklingsins.

M.b.kv. 

[Jens Guð, 20.5.2016 kl. 19:39]

Jón,  ég er vanastur því að hafa rétt fyrir mér.  Hugmynd þín um að forsetar framtíðarinnar borgi með sér í embætti er bráðsnjöll.  Ég er næstum því (= 87%) viss um að einhver frambjóðandinn taki þig á orðinu.  

[Jens Guð, 20.5.2016 kl. 19:41]

Anna Sigríður,  þú þarft ekkert að gera upp á milli þeirra.  Kjóstu þá báða.  Þeir eiga það skilið.

[Anna Sigríður Guðmundsdóttir, 20.5.2016 kl. 20:18]

Jens. Ég kýs þá báða hér á blogginu þínu:) (reyndar ógild kosning). Þá hef ég ekki gert upp á milli þeirra. Ég stend alla vega með minni skilnings-sannfæringu hjartans nú orðið, þótt ég hafi verið óttalega ringluð og villuráfandi á mínum yngri árum.

Mér er alveg sama þótt fólk hati mig fyrir að hata ekki Davíð. Ég trúi á kærleikann en ekki hatrið. Er það ekki kallað að trúa á Guðsorkuna, að trúa á kærleikann? Það held ég.

M.b.kv.

[Jens Guð, 22.5.2016 kl. 17:59]

Kærleikurinn er ofar öllu.

[L. (IP-tala skráð) 26.5.2016 kl. 01:45]

Það stafar mikil birta af Guðna, engu líkara að hann sé Jesús kristur endurborinn.

Meira að segja málgagn LÍÚ birtir Jesú myndir af Guðna.

Hvað er Davíð yfir höfuð að gera í framboði?

[Jens Guð, 27.5.2016 kl. 17:08]

L.,  er það ekki tilfellið að Guðni sé Kristur endurborinn?