Af hverju allur þessi saltaustur?

  Í gær var sprengjudagur.  Þá var sprengt sem aldrei fyrr í Vaðlaheiðargöngum.  Landsmenn fögnuðu með því að sötra hnausþykka baunasúpu ásamt því að japla á saltkjöti, kartöflum og rófum eða gulrótum.  Í útvarpsauglýsingum hljómaði:  "Saltskert saltkjöt, sama bragð!" og "Helmingi minna salt, óbreytt bragð!"

  Getur þetta staðist?  Eru aðrir kjötsalar - aðrir en þeir sem auglýstu - að bruðla með salt algjörlega að óþörfu?  Þarf aðeins helming af því saltmagni sem áður var notað til að ná fram nákvæmlega sama bragði?  Er það af því að margir eru hættir að nota götusalt (iðnaðarsalt) í matinn?

  Hver sem skýringin er þá grunar mig að margir geti tekið undir óvæntan fróðleiksmola næringarfræðings Landlæknisembættisins:  "Saltkjöt er í eðli sínu mjög saltrík vara."

 

  

Athugasemdir

[Sigurður I B Guðmundsson, 1.3.2017 kl. 08:43]

Held ég salti þessa umræðu!!

[Dúndri (IP-tala skráð) 1.3.2017 kl. 10:17]

Og urðu miklar skemmdir í Héðinsfjarðargöngunum við allar þessar sprengingar?  Hvort skyldu nú frekar Ólafsfirðingar eða Siglfirðingar vera grunaðir um að vilja loka á milli?  :-)

[Jens Guð, 1.3.2017 kl. 14:52]

Sigurður I B, þú kemst af með helmingi minna salt í það.

[Jens Guð, 1.3.2017 kl. 14:54]

Dúndri,  takk fyrir athugasemdina.  Nöfnum gangnanna sló saman.  Mér var svo ringlaður út af saltskerta kjötinu.  

[Ásgrímur Hartmannsson, 1.3.2017 kl. 20:23]

Þetta er til þess að það myndist ekki hálka í meltingarveginum.  Maður vill síður að hlutir fari þar útaf.

[Jens Guð, 1.3.2017 kl. 21:33]

Ásgrímur,  hlaut að vera eitthvað svona hollustudæmi.