Bestu synir Belfast

  Frægustu synir Belfast eru tónlistarmaðurinn Van Morrison,  fótboltakall sem hét George Best og skip sem hét Titanic.  Í fyrra var Van aðlaður af Karli bretaprinsi,  sleginn til riddara fyrir að vera (eitt) helsta aðdráttarafl ferðamanna til Belfast.  Æskuheimili hans er rækilega merkt honum.  Það er ekki til sýnis innandyra.  Íbúar þess og nágrannar láta sér vel líka stöðugan straum ferðamanna að húsinu.  Þykir gaman að svara spurningum þeirra og aðstoða við ljósmyndatökur.  

  Einnig er boðið upp á 2ja tíma göngutúr um æskuslóðir Vans.  Leiðin spannar hálfan fjórða kílómetra.  Með því að skanna með snjallsíma uppgefna kóda á tilteknum stöðum má heyra Van syngja um áfangastaðina.  

  Fyrir utan að bera Sir-titilinn er Van heiðursdoktor við Belfast háskólann - og reyndar líka heiðursdoktor við Ulster háskólann.

  Á æskuárum mínum var George Best vinsæll boltakall.  Ég hef 0% áhuga á boltaleikjum.  Hann var hinsvegar fyrirferðamikill í slúðurfréttum þess tíma.  Aðalega vegna drykkju að mig minnir, svo og hnittinna tilsvara.  Gamall og blankur sagðist hann hafa sóað auðæfum sínum í áfengi og vændiskonur.  Afgangurinn hafi farið í vitleysu.  

  Í Belfast heitir borgarflugvöllurinn George Best Belfast City Airport.  

  Frægasta safnið í Belfast er Titanic.  Einkennilegt í aðra röndina að Belfast-búar hæli sér af því að hafa smíðað þetta meingallaða skip sem sökk eins og steinn í jómfrúarferðinni.  Með réttu ættu þeir að skammast sín fyrir hrákasmíðina.  Ekki síst eftir að gerð var kvikmynd um ósköpin.  Hræðilega ömurlega væmin og drepleiðinleg mynd með viðbjóðslegri músík.  

  Af ferðabæklingum að ráða virðist Belfast ekki eiga neina fræga dóttir.  Ekki einu sinni tengdadóttir.        

Athugasemdir

[Sigurður I B Guðmundsson, 25.4.2017 kl. 20:14]

Nú þykir mér týra!!!

[Halldór Egill Guðnason, 26.4.2017 kl. 02:44]

Góður, Jens. Enn þann dag í dag er Belfast frekar "rafmögnuð". Þar hafa stríðsaxirnar enn ekki verið grafnar og verða það sennilega ekki í bráð. Nægir þar að nefna útlitið á lögreglubílunum, sem eru sko klárir í allt, svo ekki sé fastar að orði kveðið.

 Góðar stundir, með kveðju að sunnan.

[Hörður Þór Karlsson (IP-tala skráð) 26.4.2017 kl. 15:33]

Ja hérna Jens, yfirsýn þín á tilveruna bregst aldrei

Ég man vel eftir fyllibyttusögum af George Best en ekki boltasögum, enda eins og þú, núll prósent áhuga á boltasparki. Van Morrison, af nafninu til en kannast ekki við einn einasta tón frá kallinum. Það er þín deild.

Ég er samt bljúgur og rómantískur í mér og fannst Títanikk ræman voða rómó. ........Fyrir utan að drukkna að sjálfsögðu.

Jamm, ég er sammála varðandi Títanikk safnið, þú lýsir því best með -Með réttu ættu þeir að skammast sín fyrir hrákasmíðina- 

Takk fyrir að halda áfram að deila með okkur hugrenningum þínum

Kveðja sunnan úr svörtustu álfum, Hörður

[Jens Guð, 27.4.2017 kl. 10:37]

Sigurður I B,  mér líka.

[Jens Guð, 27.4.2017 kl. 10:41]

Halldór Egill,  mér var bent á að sennilega væri þetta ástand sem þú lýsir ástæðan fyrir því að á pöbbum í Belfast blanda menn ekki geði við ókunnuga, öfugt við það sem tíðkast í Dublin.  

[Jens Guð, 27.4.2017 kl. 10:42]

HGörður Þór,  takk fyrir hlý orð.