Íslendingar færa Færeyingum listaverk að gjöf

  Í vikunni var listaverkið "Tveir vitar" afhjúpað við hátíðlega athöfn í höfuðborg Færeyja,  Þórshöfn.  Annika Olsen, borgarstjóri, og Högni Hoydal, þingmaður á færeyska lögþinginu og danska þinginu, fluttu ávörp og Hafnar-lúðrasveitin lék við hvurn sinn fingur.  

  "Tveir vitar" er gjöf Vestfirðinga til Færeyinga;  þakklætisvottur fyrir höfðinglegar peningagjafir færeyskra systra okkar og bræðra til endurreisnar Flateyrar og Súðavíkur í kjölfar mannskæðra snjóflóða 1995.

  Bæjarstjóri Ísafjarðar,  Gísli Halldór Halldórsson, afhenti listaverkið formlega.

  Það er virkilega fagurt og glæsilegt, samsett úr blágrýti og stáli.  Höfundurinn er myndlistamaðurinn Jón Sigurpálsson.  Hann er einnig kunnur sem bassaleikari djasshljómsveitarinnar Diabolus in Musica.

  Á klöppuðum uppreistum steini fyrir framan "Tvo vita" stendur:

TVEIR VITAR

"Þökk sé færeysku þjóðinni fyrir samhug og vinarþel í kjölfar snjóflóðanna í Súðavík og á Flareyri 1995.  Frá vinum ykkar á Vestfjörðum." 

  Færeyingum þykir afskaplega vænt um þessa táknrænu þakkargjöf.  

 

Athugasemdir

[Stefán (IP-tala skráð) 11.5.2017 kl. 21:40]

Flott framlag hjá Vestfirðingum. Færeyingar eru svo sannarlega okkar bestu vinir, stundum jafnvel okkar einu vinir og við getum lært svo margt af þeim. 

[Sigurður Bjarklind (IP-tala skráð) 12.5.2017 kl. 12:25]

Mér hlýnar um hjartarætur hvenær sem minnst er á Færeyinga.

Tek undir það að af þeim mættum við margt læra.

Sigurður.

[Sigurður I B Guðmundsson, 12.5.2017 kl. 16:01]

Færeyingar flottastir!!

[Jens Guð, 13.5.2017 kl. 13:47]

Stefán  svo sannarlega!

[Jens Guð, 13.5.2017 kl. 13:47]

Sigurður,  ég líka.

[Jens Guð, 13.5.2017 kl. 13:48]

Sigurður I B,  alltaf!

[Sæmundur G. Halldórsson , 9.6.2017 kl. 21:00]

Falleg kveðja. En er hún virkilega frá "Flareyri"?