Nýr flötur á okri í ferðaþjónustu

4.7.2017 | 08:13

Nýr flötur á okri í ferðaþjónustu

Íslensk ferðaþjónusta er á miklu flugi um þessar mundir. Enda háannatími ársins. Hver sem betur getur reynir að toppa sig í okri á öllum sviðum. Einn ómerkilegur Lipton tepoki er seldur á 400 kall á hóteli á Egilsstöðum. Bara pokinn einn og sér. Ekki með vatni eða í bolla. Samskonar poki kostar um 20 kall út úr búð.

Á Húsavík er rúnstykki með skinku og osti selt á 1200 kall. Erlendir ferðamenn eru í öngum sínum yfir íslenska okrinu. Viðbrögðin eru fálmkennd. Þeir reyna að sniðganga veitingahús sem frekast er unnt. Kaupa þess í stað brauð og álegg í matvöruverslunum. Út um holt og hæðir má sjá erlenda ferðamenn smyrja sér samlokur á milli þess sem þeir ganga örna sinna úti í grænni náttúrunni. Það er gott fyrir gróðurinn.

Sjálfsbjargarviðleitnin fór á nýtt stig í gær þegar níu bandarískir ferðamenn eltu uppi lamb, stálu því og skáru á háls. Brotaviljinn var einbeittur, eins og sést á því að þeir voru vopnaðir stórum hnífi, sveðju, til verksins. Næsta víst er þetta hafi ekki verið fyrsta né síðasta lambið sem þeir stálu. Mánaðargamalt lamb er ekki kjötbiti sem mettar níu Bandaríkjamenn. Frekar að það æsi upp í þeim sultinn.

Refsing var ótrúlega mild. Þeir voru látnir borga markaðsverð fyrir lambið og væga sekt fyrir eignarspjöll og þjófnað. Þeir voru ekki kærðir fyrir dýraníð. Né heldur fyrir að brjóta gróflega lög um sláturleyfi, þar sem gerðar eru strangar kröfur um eitt og annað. Til að mynda hvernig lóga skuli dýrum og standa að hreinlæti. Þess í stað voru þeir kvaddir með óskum um góða ferð. Ekki fylgir sögunni hvort að þeir fengu að halda drápstólinu.

Þessi viðbrögð verður að endurskoða í snatri áður en allt fer úr böndum. Ferðamennirnir eru áreiðanlega búnir að hlæja sig máttlausa á samfélagsmiðlum yfir aulagangi íslensku lögreglunnar. Jafnframt því sem þeir gæta sín á því að ræna lömbum úr augsýn annarra. Þeir hafa verið orðnir kærulausir vegna þess hve auðvelt var að stela sér í matinn.

Hugsanlega ætti að senda erlenda sauðaþjófa rakleiðis úr landi og gera ökutæki þeirra upptæk. Að minnsta kosti sekta þá svo rækilega að þeir láti sér það að kenningu verða og skammist sín.

&nbsp;

	Á að vera refsað fyrir dýraníð
Ábyrgðarmaður færslu Tilkynna um óviðeigandi tengingu við frétt

Meginflokkur: Matur og drykkur | Aukaflokkar: Ferðalög, Löggæsla, Viðskipti og fjármál | Breytt s.d. kl. 09:38 | Facebook

Athugasemdir

Þetta á að vera dýrt ... enginn ástæða til að gera þetta svo ódýrt að allur heimurinn troði landið undir fæti, þangað til að þessi littla náttúru auðlegt breitist í drullusvað, sem allir hætta að koma til að sjá.

Peningana frá þessu, á síðan að nýta í að byggja eitthvað annað en Hótel.

Landið á ekki að endurtaka sama "gullæðið" og bankavitleysuna. Verja peningunum einhver staðar annars staðar, sem byggir framtið landsins.

Bjarne Örn Hansen (IP-tala skráð) 4.7.2017 kl. 08:36

Íslensk græðgi, skammtíma gróðasjónarmið, heimska, molbúaháttur og séríslenskt skipulagsleysi á eftir að kafkeyra ferðaþjónustuna hér og nú er þegar er búið að gera okkur íslendinga landflótta í fríum þar sem við höfum ekki efni á því að ferðast innanlands vegna okurs. Við förum í frí þangað sem við fáum að vera í friði fyrir græðgisslefandi löndum okkar og skiljum eftir víðáttuskítandi túrista, sem fara líklega meira að veiða sér sjálfir í matinn - Rándýr hótel tæmast, ferðaþjónustan vælir og græðgistár renna niður fölar kinnar.

Stefán (IP-tala skráð) 4.7.2017 kl. 09:38

Þetta voru Afganir búsettir í USA. Það gerir þá ekki að

Bandaríkjamönnum þó svo þeir búi þar.

Venjulegur Bandaríkjamaður myndi aldrei gera svona.

En þeir voru bara greyin að ná sér í hal-al steik.

Þess vegna er tekið svo létt á þessu svo lögreglan

yrði ekki stimpluð rasistar og hvað eina.

Allir aðrir hefðu verið teknir ærlega a beinið.

Sigurður Kristján Hjaltested, 4.7.2017 kl. 09:49

"Kill and cook your own meal, in the wild" eða "Take a shit, where ever you like, in town or in the wild". Eitthvað í þessum dúr gætu verið slagorð í næstu auglýsingaherferð til að kynna landið. Ótrúlegt að sleppa þessu fólki með smá sekt og klappi á bakið. Í bland við græðgi, virðist ótrúlegur roluháttur einkenna hérlendan ferðamannaiðnað og löggæslu.

Góðar stundir, með kveðju að sunnan.

Halldór Egill Guðnason, 4.7.2017 kl. 10:06

Bjarne Örn, þetta er línudans. Erlendir ferðamenn skilja eftir sig hátt í 600 þúsund milljónir króna í ár. Ekki veitir af. Íslenski ríkissjóðurinn er að borga 3,2 milljarða kr. í stofnun kínversks skattaskjólsbanka og Landsbankinn er búinn að gefa gæöingum Borgun sem skilar ekki lengur arði í ríkissjóð heldur í vasa útvalinna.

Jens Guð, 4.7.2017 kl. 18:22

Stefán, þetta er góð greining á stöðunni.

Jens Guð, 4.7.2017 kl. 18:23

Sigurður Kristján, það er spurning og teygjanlegt hugtak hvaða þjóð menn tilheyra. Mennirnir framvísuðu lögreglu skilríkjum sem sýndu bandaríska ríkisborgara. Bandaríkjamenn teljast vera 325.412.631. Þó að sauðaþjófarnir séu innflytjendur frá Afganistan þá eru þeir inni í þessari tölu sem Bandaríkjamenn. Einn ku að vísu vera frá Kazakhstan.

Bandaríska þjóðin væri mun fámennari ef einungis eru taldir til hennar þeir sem eru fæddir og uppaldir á bandarískri grund. Hvernig á að flokka þá sem bandarísk móðir fæðir barn utan Bandaríkjanna en býr samt í Bandaríkjunum? Þess eru dæmi að barnið hafi fæðst á Íslandi. Enginn skilgreinir það sem Íslending.

Ég er fæddur og uppalinn til unglingsaldurs í útjaðri Hóla í Hjaltadal í Skagafirði. Með lögheimili í Reykjavík, búsettur í Reykjavík og með fjölskyldu og heimili í Reykjavík er eðlilegra að skilgreina mig sem Reykvíking en Skagfirðing. Eða hvað?

Nákvæmast væri að skilgreina sauðaþjófana sem bandaríska nýbúa frá Afganistan og nágrenni. Kannski skiptir máli hve lengi þeir hafa búið í Bandaríkjunum.

Þú segir að venjulegur Bandaríkjamaður myndi aldrei gera svona. Er til venjulegur Bandaríkjamaður í merkingunni dæmigerður meðal-Bandaríkjamaður? Klárlega drepur venjulegur Bandaríkjamaður ekki lamb úti í móa. Margir Bandaríkjamenn drepa aftur á móti fólk. Sumir gera það heimafyrir. Aðrir í herklæðum utanlends. Eru það venjulegir Bandaríkjamenn?

Jens Guð, 4.7.2017 kl. 19:02

Halldór Egill, ég kvitta undir hvert þitt orð.

Jens Guð, 4.7.2017 kl. 19:04

Sæll Jens

Það er svo furðulegt að ef Íslendingur finnur leið til að rækta peninga, þá er þar komnir hundruð manna að rækta við hliðina á viðkomandi áður en árið er úti og svo frv. Oft eru þetta svaka byltingar, Decode, bankarnir -2008, nýju lénsherrar húsnæðismarkaðar Gammar og fl. og svo ferðamennirnir.

Það merkilega við þetta allt að ekkert af þessu gengur upp í raun og veru, hver vegna ekki? Maður mundi halda að þarna hafi verið margar góðar hugmyndir sem hefðu getað ávaxtað sig vel til framtíðar. Hinsvegar er niðurstaðan sú að keyrt var/er á græðginni í öllum þessum tilfellum og vegna þess borðar byltingin börnin sín.

Viðskipafólk á Íslandi býr í allt of venduðu umhverfi þ.e. lög og reglur er með slíku móti að viðskiptamenn geta hannað fyrirtækjamódel sitt með þeim hætti að ekki þurfi jafnvel að borga opinber gjöld, byrgjum sínum og geta þannig grætt enn meira á óheiðarleika sínum. Þessa hugmyndafræði verndar ríkið með skort á viðeigandi lagasetningum. Ef að götuglöpamenn brjóta gegn rekstri sem skilar arði, þá er valdstjórnin ekki lengi á staðinn.

Sigþór Hrafnsson (IP-tala skráð) 4.7.2017 kl. 19:53

Jens. Enginn bóndi hefur tæplega nokkurn tíma fengið jafn vel greitt fyrir eitt lamb á Íslandi, eins og þessi bóndi þarna fyrir austan núna nýlega. Upphæð sem okkur er sagt að hafi verið c.a. 20.000 fyrir eitt lamb beint í vasa bóndans? Án milliliðagráðugra stjóra innan samtaka verslunar og þjónustu?

Ekki er þó með sæmilega rökstuddu og réttlætanlegu móti hægt að mæla með svona veiðimanna-aðferðar-villimennsku með dýr sem ekki eru veidd sem villt dýr.

M.b.kv.

Anna Sigríður Guðmundsdóttir, 4.7.2017 kl. 23:13

Sigþór, mæl þú manna heilastur.

Jens Guð, 5.7.2017 kl. 06:51

Anna Sigríður, vissulega var vel borgað fyrir pundið í þessum litla munnbita. Á hitt ber að líta að kannski var um vel ættaða gimbur að ræða sem hefði getað alið af sér fjölda lamba á næstu árum. Kannski var þetta hrútur sem veturgamall hefði getað orðið fast að 100 kíló. Ég tek undir það með þér að ekki sé hægt að mæla með svona villimennsku.

Jens Guð, 5.7.2017 kl. 07:00

Jens. Þetta með gimbur og hrút gildir líka þegar bændur eru skyldaðir án nokkurs málefnanlegs rökstuðnings, til að senda gimbrar og hrúta í heildsölumilliliðanna gráðugu sláturleyfishafa-sláturhúsin?

Ég verð að viðurkenna, að ég skil ekki stjórnsýslukerfið sem okkur er sagt að sé óhjákvæmilegt. Sem er óskiljanlegt, óréttlátt og skaðlegt fyrir alla aðila viðskiptanna, þegar til lengri tíma er litið.

Ég er víst bara svona vitsmunalega treg í heilanum, að skilja ekki hagfræði viðskipta-heimsveldis-spillingarbankanna. En ég er þó almættinu virkilega mikið þakklát fyrir að ég skuli ekki skilja margslungna verslunar-villimennsku-viðskipta-venjur heimsveldisglæponanna hvítflibbuðu.

M.b.kv.

Anna Sigríður Guðmundsdóttir (IP-tala skráð) 5.7.2017 kl. 19:52

Anna Sigríður, milliliðirnir - skagfirska efnahagssvæðið (Kaupfélag Skgfirðinga) - þarf sitt. Þrátt fyrir nafnið (skagfirska) teygir milliliðurinn sig þvers og kruss um landið. Fáir hafa þekkingu á umsvifum skagfirska efnahagssvæðisins. Það er á Hvolsvelli, Hellu og bara út um allt. Mjólkursamsalan og Sparisjóð á Siglufirði og út um allt.

Jens Guð, 5.7.2017 kl. 20:11