Ringulreið á Íslandi

  Það er óreiða í íslenska matvöru- og veitingahúsageiranum.  Koma Kaupfélags Garðahrepps inn á markaðinn í sumarbyrjun hefur sýnt og sannað að verðlagning á ýmsum vörum - þar á meðal matvöru - getur verið lægri en hún var fyrir þau tímamót.  

  Það dugir skammt að vísa til þess að Kaupfélagið starfi í mörgum löndum og geti gert magninnkaup.  Jú, vissulega er það rétt að hluta.  Á móti vegur að verulegur hluti af matvörum og drykk í búðinni er framleiddur hérlendis, einungis fyrir íslenskan markað.  Hún er með flata 14% álagningu.  Lífeyrissjóðir krefjast mun hærri álagningar hjá sínum stórmarkaðskeðjum.  Stjórnarmenn þurfa há laun og góða bónusa. 

  Á sama tíma og Íslendingar eru að kynnast áður óþekktu lágu verði í Kaupfélagi Garðahrepps berast skemmtilegar fréttir af hátt verðlögðum veitingum úti á landi.  Ómerkileg smá hveitibrauðsbolla er seld á 500 kall.  Stakur tepoki er seldur á 400 kall (án vatns og án þjónustu).  Rúnstykki með skinkusneið og osti á 1200 kall.  Ræfilsleg kleina á 980.  Hamborgari á 3000.  Plokkfiskur á 4500 kall.  Kjötsúpa á 4500 kall.

  Ferðaþjónustuokrarar undrast að útlendir túrhestar hiksti yfir verðlagningunni.  Þeir stytta ferðir og eru teknir upp á því að smyrja sér nesti.  Viðbrögðin eru að bæta við skál við hliðina á peningakassanum.  Skálin er kyrfilega merkt "TIPS".  Forsendur eru þær að uppistaðan af útlendum túrhestum í lausagöngu á Íslandi er vanur að borga þjórfé heimafyrir.  Þeir vita ekki að það er ekki vani á Íslandi.  Samt.  Það er reisn yfir því að ná þjórfé af túrhestunum ofan á 500 króna hveitibollu.    

                  

   

  

     

Athugasemdir

[Sigurður I B Guðmundsson, 20.7.2017 kl. 08:02]

Auðþekktur er asninn á eyrunum!!

[Stefán (IP-tala skráð) 20.7.2017 kl. 10:32]

Íslensku græðgina er hægt að finna í hnotskurn í öllum verslunum 10-11.

[Jóhann Kristinsson, 20.7.2017 kl. 16:03]

Góðar ábendingar Jens Guð, enda verzla ég nær eingöngu í Kaupfélagi Houston eða Kaupfélagi Las Vegas, meira að segja síðasti bíll var keyptur í gegnum Kaupfélag Houston.

Sá það líka í Kaupfélagi Torrense í Kaliforníu að þessi kaupfélög voru með mikið úrval á líkkistum á góðu verði, engin spurning hvaðan minn kassi kemur, þegar ég þarf á honum að halda.

Kveðja frá Seltjarnarnesi 

[Stefán (IP-tala skráð) 21.7.2017 kl. 14:10]

En því og miður ekki bara 10-11 búðirnar sem okra endalaust á sauðsvörtum almúganum. Var að sjá mynd á netinu af okurreikningi frá Café Milano, Faxafeni. Veit fyrir víst að margir okrandi veitingastaðir eru með undirlaunað erlent starfsfólk.

[Jens Guð, 21.7.2017 kl. 15:13]

Sigurður I B,  meira að segja úr mikilli fjarlægð!

[Jens Guð, 21.7.2017 kl. 15:18]

Stefán,  það er mesta furða að nokkur geri sín innkaup í 10-11.  Reyndar skilst mér að í Austurstræti og á Hverfisgötu séu einkum erlendir ferðamenn að versla í þessum búðum - væntanlega áður en þeir uppgötva að vöruverð þar sé þetta mikið hærra en í öðrum búðum.

[Jens Guð, 21.7.2017 kl. 15:21]

Jóhann, ég sá einmitt á íslensku Costco-síðunni á Facebook að einhver spurði hvort að líkkisturnar væru komnar í Garðahrepp.  Svo reyndist ekki vera.  En það vantar ódýrar kistur.

[Jens Guð, 21.7.2017 kl. 15:27]

Stefán (#4), ég sá þennan strimil úr Faxafeni.  Ég hef einstaka sinnum álpast þarna inn.  Aðallega til að fylgjast með málverkasýningum þar.  Fæ mér þá te eða kakó í leiðinni.  Dáldið dýrt.  Ég hef einungis orðið var við rammíslenskar afgreiðsludömur þarna. 

[Jens Guð, 27.7.2017 kl. 03:58]

Ég rakst á matseðil Bautans.  Þar er plokkfiskurinn á 4230 kr.  Ræugbrauðssneið fylgir.

[Jens Guð, 27.7.2017 kl. 03:58]

Á Sjávargrillinu kostar tebollinn 600 kall!

[Jóhann Kristinsson, 29.7.2017 kl. 12:03]

Golfklúbbur Nes er með teabollan á kr.350.

Kveðja frá Seltjarnarnesi

[Jens Guð, 30.7.2017 kl. 18:35]

Jóhann,  það er gangverðið.