Yoko Ono bannar svaladrykk

 

  John Lennon var myrtur á götu úti í New York 1980.  Síðan hefur ekkja hans,  Yoko Ono,  unnið ötult starf við að vernda minningu hans.  Reyndar gott betur.  Hún hefur náð að fegra ímynd hans svo mjög að líkist heilagri helgimynd.  Gott og blessað.

  Nú hefur henni tekist að stöðva sölu á pólskum svaladrykk.  Sá heitir John Lemon.  Fyrstu viðbrögð framleiðanda drykkjarins voru að þræta fyrir að gert væri út á nafn Johns Lennons.  Lemon sé annað nafn en Lennon.

  Yoko blés á það.  Vísaði til þess að í auglýsingum um drykkinn sé gert út á fleira en nafn Johns.  Til að mynda séu þær skreyttar með ömmugleraugum samskonar þeim sem eru stór hluti af ímynd hans.  Þar hjá stendur setningin "let it be".  Sem kunnugt er heitir síðasta plata Bítlanna "Let it Be".  

  Til viðbótar notaði írska útibúið,  John Lemon Ireland,  mynd af John Lennon í pósti á Fésbók.

  Lögmannastofa Yokoar stillti framleiðandanum upp við vegg:  Hótaði 5000 evra (655.000 ísl kr.) dagsektum og krafðist 500 evra fyrir hverja selda flösku.  Fyrirtækið hefur lúffað.  Nafninu verður breytt í On Lemon.  Breski dreifingaraðilinn segir að lítið fyrirtæki sem sé ennþá að fóta sig á markaðnum hafi ekki bolmagn til að takast á við milljarðamæring.  

 

Athugasemdir

[Stefán (IP-tala skráð) 22.9.2017 kl. 08:31]

Rétt er það Jens, að Yoko Ono hefur svo sannarlega tekist að búa til einskonar heilaga helgimynd af hinum hortuga og ruddalega manni sem ,, friðarsinninn " John Lennon var í raun. Alveg burt séð frá því auðvitað hversu mikill listamaður og meistara hann var í tónlistarsköpun sinni og The Beatles. 

[Sigurður I B Guðmundsson, 22.9.2017 kl. 10:51]

"All she need is love"!!!

[Jens Guð, 22.9.2017 kl. 17:50]

  Stefán,  John Lennon glímdi lengst af við ótal sálræn vandamál.  Hann þekkti ekki pabba sinn fyrr en eftir að Bítlarnir slógu í gegn (og kallinn tók upp á því að sníkja af syninum pening).  Mamma hans var léttgeggjuð.  Hann kynntist henni ekki fyrr en kominn á unglingsár.  Vissi ekki að hún bjó í næstu götu við hann.  Barnlaus frænka hans varð hans óformlega fósturmóðir.  Afar snobbuð, alvörugefin (bitur) og ströng.  Hann kallaði hana aldrei annað en Mimi frænku. Ósjaldan sló í harða brýnu á milli þeirra og strákurinn afar kjaftfor.  Kallinn hennar var léttari í lund.  Þeir áttu betur skap saman.  En kallinn dó þegar strákurinn var um fermingaraldur, viðkvæmustu unglingsárum.  Um svipað leyti fann hann mömmu sína.  Þau náðu vel saman.  En þá var hún keyrð niður af fullum lögreglumanni og dó.  

  Fyrir daga áfallahjálpar var svona pakki bein ávísun á ítrekaða, risastóra og viðvarandi áfallastreituröskun.  Unglingurinn John Lennon varð tifandi tímasprengja:  Uppfullur af reiði sem hann kunni engin skil á.  Hann reif stólpakjaft við allt og alla.  Hellti í sig áfengi.  Slóst með hnefum og hnúum eins og enginn væri morgundagurinn.  Hans nánustu vinir á unglingsárum fengu kjaftshögg.  Meira að segja Paul McCartney skömmu eftir að þeir kynntust.

  John Lennon þroskaðist í nokkrum áföngum með skrefum aftur á bak og áfram.  Bráðgáfaður og hæfileikareíkur en um leið ringlaður.  Gríðarleg eiturlyfjaneysla um tíma.  Vegna þeirra var hann hálfur út úr heimi á síðustu plötum Bítlanna.  Skilaði samt frábærri tónlist.  Líka eftir að hann leysti upp Bítlana.  Eftir eitt besta - glæsilegt - upphaf sólóferils datt hann í rosa fyllerí.  Dóp í bland en fyrst og fremst fyllerí.  Allt í rugli, slagsmál á skemmtistað og allskonar vesen.  3 plötur blindfullur.  Þær bera þess merki.  

  Svo virðist sem kauði hafi róast eftir að þau Yoko tóku saman aftur og sonur þeirra Sean Lennonb fæddist.  John tók sér langt hlé frá tónlist til að sinna syninum.  Er hann snéri aftur til leiks 1980 var hann breyttur maður.  Búinn að ná sátt við tilveruna.  Ljúfur og hamingjusamur.  Hættur dópi og drykkju.  Músíkin mild og afslöppuð.  Góð lög, góðir textar.  Fyrir minn smekk of mjúk áferð.  

[Jens Guð, 22.9.2017 kl. 17:50]

Sigurður I B,  beint í mark!

[Stefán (IP-tala skráð) 22.9.2017 kl. 20:17]

Sennilegast er að Paul hafi verið valinn ( líklega af umboðsmanninum Brian Epstein ) sem aðal talsmaður Bítlanna á hljómleikum og víðar vegna þess að John var svo kjaftfor og ruddalegur í framkomu. Paul tók svo öll völd í Bítlunum eftir að Brian Epstein lést árið 1967, enda John þá raunar í svo mikilli eyturlyfjaneyslu að ótrúlegt er hvernig honum tókst að koma frá sér allri þessari frábæru tónlist. En það má svo sem líka benda á það hvað Keith Richards samdi mikið af frábærri tónlist drukkinn og uppdópaður. Yoko henti svo blessuðum karlinum honum John út úr íbúð þeirra í New York árið 1973 og hann flutti til L.A. í eitt og hálft ár ,, The Lost weekend ". John var svo sniðugur að hafa með sér ritara Yoko, hina kínversku May Pang. Þær stöllur sáust svo ekki aftur fyrr en á veitingastað í Reykjavík áratugum síðar. Það má segja að Elton John hafi komið þeim John og Yoko saman aftur þegar John kom fram sem gestasöngvari á Thanksgiving konserti Eltons í New York í Nóvember 1974. Elton John hafði boðið Yoko á hljómleikana og sá til þess að þeu John hittust svo baksviðs. Miðað við baneytrað líferni Johns í L.A. má jafnvel hugsa að hann hefði látist nokkru fyrr en árið 1980, ef hann hefði ekki flutt aftur heim til Yoko og læst að sér ( eða að Yoko læsti ) í tæp fimm ár. 

[Jens Guð, 24.9.2017 kl. 17:06]

Stefán,  það er dálítið merkilegt að þeir sem voru á "lost weekend" fylleríinu féllu frá hver á fætur öðrum:  Keith Moon, Lennon og Harry Nilson.  Af drykkjufélögunum er aðeins Ringo á lífi.