Óhugnanlegar hryllingssögur

 

  Ég var að lesa bókina "Martröð með myglusvepp".  Rosaleg lesning.  Höfundur er Skagfirðingurinn Steinn Kárason umhverfisfræðingur, rekstrarhagfræðingur, garðyrkjufræðingur, tónlistarmaður, rithöfundur og sitthvað fleira.

  Fyrri hluti bókarinnar inniheldur átta reynslusögur fórnarlamba myglusvepps.  Þær eru svo átakanlegar og sláandi að lesandinn er í "sjokki".  Myglusveppurinn er lúmskur.  Hann veldur hægt og bítandi miklum skaða á líkama og sál.  Jafnvel til frambúðar.  Hann slátrar fjárhag fórnarlambsins.  Það þarf að farga húsgögnum, fatnaði og öðru sem sveppagró hafa borist í.  

  Eðlilega er lengsta og ítarlegasta reynslusagan saga höfundar.  Hinar sögurnar eru styttri endurómar.  En staðfesta og bæta við lýsingu Steins á hryllingnum.

  Í seinni hluti bókarinnar er skaðvaldurinn skilgreindur betur.  Góð ráð gefin ásamt margvíslegum fróðleik.  

  Ég hvet alla sem hafa minnsta grun um myglusvepp á heimilinu til að lesa bókina "Martröð um myglusvepp".  Líka hvern sem er.  Þetta er hryllingssögubók á pari við glæpasögur Arnalds Indriðasonar og Yrsu. Margt kemur á óvart og vekur til umhugsunar.  Til að mynda að rafsegulbylgjur þráðlausra tækja hafi eflt og stökkbreytt sveppnum.

 

    

  

Athugasemdir

[Stefán (IP-tala skráð) 30.9.2017 kl. 19:42]

Mér datt fyrst í hug að Steinn væri þarna kominn úr djúpinu til að skrifa um sveitunga sinn Gunnar Braga, en svona er að lesa bara kápuna. Gott samt að bókin virðist vera merkilegri en mygluleg tónlistin sem Steinn sendi frá sér um árið.

[Sigurður I B Guðmundsson, 30.9.2017 kl. 22:19]

Ætla bara að halda mig við "litlu gulu hænuna"!!!

[Jens Guð, 2.10.2017 kl. 09:22]

Stefán,  ég mæli með bókinni.

[Jens Guð, 2.10.2017 kl. 09:24]

Sigurður I B, þó að ég hafi ekki lesið hana í hálfa öld þá man ég eftir því að mér þótti hún töluvert spennandi.  Sérstaklega í seinna skiptið sem ég las hana.