Grænlendingum fækkar

  Íslendingum fjölgar sem aldrei fyrr.  Veitir ekki af.  Einhverjir þurfa að standa undir klaufalegum fjárfestingum lífeyrissjóða.  Líka ofurlaunum stjórnarmanna lífeyrissjóða og fyrirtækja sem þeir fjárfesta í.  Tröllvaxinn ferðamannaiðnaður kallar á vinnandi hendur.  Rótgrónir Íslendingar vilja ekki vinna í fiski, við þrif eða við ummönnun.  Þá koma útlendingar til góða sem gerast íslenskir ríkisborgarar.

  Á síðasta áratug - 2007-2017 - fjölgaði Íslendingum svo um munar.  Ekki vegna frjósemi heldur vegna innflytjenda.  2007 voru Íslendingar 307 þús.  Í dag erum við nálægt 350 þús.     

  Færeyingar eru frjósamastir norrænna þjóða.  Þeir eru iðnir við kolann.  Enda fegurstir og kynþokkafyllstir.  2007 voru þeir 48 þús.  Í dag eru þeir yfir 50 þús.

  Norðmönnum fjölgaði um 12,3%.  Þökk sé innflytjendum.  Meðal annars Íslendingum í þúsundatali.  Flestir með meirapróf.  Íbúar Noregs, Finnlands og Danmörku eru hver um sig vel á sjöttu milljón.  Svíar eru 10 milljónir.  Samanlagt erum við norrænu þjóðirnar um 30 milljónir.  Fjölgar árlega.

  Verra er að Grænlendingum fækkar.  Undanfarin ár hafa þeir ýmist staðið í stað eða fækkað.  2007 voru þeir næstum 57 þúsund.  Í fyrra voru þeir innan við 56 þúsund.  Ekki gott.  Á móti vegur að íslenskt fyrirtæki hefur tryggt sér rétt til gullgrafar á Grænlandi.  

 

    

 

Athugasemdir

[Sigurður I B Guðmundsson, 21.2.2018 kl. 17:40]

Það er annað en áður var þegar þessi saga varð til: Erlendir ferðamenn voru að labba í fjörunni á Grænlandi þegar þeir sáu unga grænlenska konu með nýfætt barn í fanginu og spurðu hver væri faðirinn? Þeir eru þarna sagði unga konan og benti á dönsku strandgæsluna sem var þarna fyrir utan!!!!

[Stefán (IP-tala skráð) 21.2.2018 kl. 21:09]

Einn grænlenskur aumingi og ræfill setti svartan blett á landa sína með hegðun sinni á Íslandi. Ég viðurkenni alveg að innra með mér fór ég að finna fyrir ákveðnum fordómum gagnvart þessari annars ágætu nágrannaþjóð okkar við þetta voðaverk. Ég vona að fólk hafi svo séð að sér eins og ég og metið það réttilega að þarna var bara um einn stakan glæpamann að ræða. Ég skil vel að englendingar, hollendingar og fleiri sem lentu illa í viðskiptum sínum við íslenska bankaglæpona, hafi dæmt alla þjóðina á tímabili.

[Jens Guð, 23.2.2018 kl. 19:26]

Sigurður I B,  grænlensk menning er frábrugðing okkar um margt.  Siðir eru okkur framandi.  Ég hef þrívegis farið til Grænlands og eignast marga góða grænlenska vini.  Menningarmunurinn er krúttlegur í aðra röndina.  Dapurlegur í hina röndina. 

[Jens Guð, 23.2.2018 kl. 19:36]

Stefán,  Grænlendingar voru í áfalli og miður sín yfir því að samlandi þeirra væri þessi óþokki sem hann er.  Grænlendingar bera mikinn hlýhug til Íslendinga. Þeir eru jafnframt áhugasamir um allt íslenskt.  Áhugasamir um íslenskan landbúnað til að mynda.  Spila grimmt íslensk lög í grænlenska útvarpinu;  allt frá íslenskri kóramúsík til islensks pönkrokks.  Grænlenskir fjölmiðlar eru duglegir við að birta fréttir frá Íslandi.  Öfugt við íslenska fjölmiðla sem skipta sér ekkert af Grænlandi og Grænlendingum.