Minningarorð um Kristínu Guðmundsdóttur

  Í dag er til moldar borin ástkær skólasystir,  Kristín Guðmundsdóttir í Grindavík.  Við vorum samferða í Héraðsskólanum á Laugarvatni á fyrri hluta áttunda áratugarins.

  Allir strákarnir í skólanum nema einn voru skotnir í Stínu.  Ekki aðeins vegna þess að hún var gullfalleg.  Líka vegna hennar geislandi persónuleika.  Hún var glaðvær,  jákvæð, hlý og afskaplega skemmtileg.

  Nemendum á Laugarvatni var mismunað gróflega eftir kynjum.  Drengjaheimavistir og stúlknaheimavistir.  Stranglega var bannað að flakka þar á milli.  Slík ósvífni kostaði brottrekstur úr skólanum.

  Stína bjó á heimavist sem hét Hlíð.  Nauðsyn braut lög.  Reglur viku fyrir ljúfum eftirmiðdögum um helgar.  Fátt var skemmtilegra en að heimsækja Stínu og vinkonur hennar síðdegis um helgar.  Bara að spjalla saman,  vel að merkja.  Ekkert annað.   Það var góð skemmtun.  Þarna varð til sterk lífstíðarvinátta.

  Fyrir nokkrum árum tókum við skólasystkini frá Laugarvatni upp á því að hittast af og til.  Meiriháttar gaman.  Skugga bar á síðasta endurfund er Stína var fjarri vegna baráttu við krabbamein.  Hennar er nú sárt saknað.  Ein skemmtilegasta og indælasta manneskja sem ég hef kynnst.  Ég er þakklátur fyrir frábær kynni.

 

Athugasemdir

[Helga Kristjánsdóttir, 18.8.2018 kl. 04:26]

 Það hlýtur að hafa verið einstaklega vel rekinn skóli.Var ekki Kristinn skólameistari þá,en frú Rannveig hitti ég mánaðarlega ásamt skólasystur okkar úr Húsmæðraskólanum við Sólvalagötu.

[Jens Guð, 18.8.2018 kl. 18:15]

  Helga,  Kristinn var skólastjóri Menntaskóla Laugarvatns.  Hann var farsæll skólastjóri.  Naut vinsælda og virðingar meðal nemenda. 

  Ég var hinsvegar í Héraðsskóla Laugarvatns.  Skólastjórinn þótti harður í horn að taka.  Þess vegna voru vandræðagemlingar hvaðanæva af landinu sendir í skólann.  Kallinn staupaði sig stundum á kvöldin.  En umbar ekki að nemendur gerðu slíkt hið sama.  Hann rak mig úr skólanum um miðjan vetur.  Einmitt vegna þess að ég tók hann til fyrirmyndar.  Til lengri tíma reyndist það til happs.  Ég fékk vel launaða vinnu við að keyra traktor í álverinu í Straumsvík.  Gat á skömmum tíma safnað mér peningum fyrir myndlistanámi.