Þegar Birgitta snéri mig niður

  Nú standa öll spjót úti.  Þau beinast að rithöfundinum og tónlistarkonunni Birgittu Haukdal.  Hún hefur skrifað barnabækur um Láru.  Hún leggur sig fram um að breyta eða leiðrétta staðalímynd telpna.  Sem er gott mál. Ég ætla að gefa mínum barnabörnum þessar bækur. Nema hvað að í nýjustu bókinni kemur fyrir úrelt orð, hjúkrunarkona.  Um það snýst fjaðrafokið.  Hjúkrunarfræðingum þykir gróflega að sér vegið.  Þeir eru miður sín.

  Birgittu er eðlilega brugðið við hin hörðu viðbrögð.  Hún harmar mistökin og lofar að þetta verði lagað í næstu prentun. 

  Ég þekki ekki Birgittu.  Hef aldrei talað við hana né hitt hana.  Hinsvegar varð mér á að blogga um hana skömmu fyrir jólin 2007, fyrir 11 árum.  Hún kom fram í sjónvarpsþætti.  Með vanþroskuðum galgopahætti reyndi ég að vera fyndinn á hennar kostnað;  bullaði eitthvað um sjálfbrúnkukrem hennar. 

  Tveimur dögum síðar barst mér í hendur jólakort frá henni.  Þar afvopnaði hún mig til lífstíðar.  Steinrotaði mig með óvæntum viðbrögðum.  Síðan hef ég ekki og mun aldrei segja né skrifa neitt neikvætt um hana.  Það er mikið varið í manneskju sem tæklar ókurteisi í sinn garð svona glæsilega.  Í kortinu stóð: 

  "Elsku Jens Guð (teikning af hjarta). Ég óska þér gleðilegra jóla og vona að þú hafir það yndislegt. Þín Birgitta H.  P.s. Töfrakremið heitir Beautiful 4 ever (brosmerki)."

 

 

 

Athugasemdir

[Sigurður Bjarklind (IP-tala skráð) 20.11.2018 kl. 08:48]

Lærdómsrík og falleg saga Jens. Ég geri ráð fyrir að síðan hafir þú notað þetta krem.

[Jens Guð, 20.11.2018 kl. 17:52]

Sigurður Bjarklind,  ég hef aldrei komist upp á lag með að nota krem.  Ég nenni því ekki.  Hinsvegar þykir mér sjálfsagt að fólk - sem nennir - brúki krem.  Mörg krem næra húðina og gera henni gott.

[Sigurður I B Guðmundsson, 20.11.2018 kl. 21:10]

Þetta krem hefur greinilega virkað vel á hana í orðsins fyllstu merkingu!!!

[Jens Guð, 20.11.2018 kl. 23:04]

Sigurður I B,  algjörlega!