Haugalygi um Færeyjar

  Breska dagblaðið The Guardian sló á dögunum upp frétt af því að Færeyjar yrðu lokaðar erlendum ferðamönnum síðustu helgina í apríl.  Þetta er ekki alveg rétt.  Töluvert ýkt.  Hvorki leggst flug niður né að hótel loki.  Hinsvegar verða helstu ferðamannastaðir lokaðir túristum þessa helgi.  Ástæðan er sú að tímabært er að taka þá í gegn;  bæta merkingar,  laga gönguleiðir,  laga til eftir of mikinn átroðning og hreinsa eyjarnar af rusli,  svo sem plasti sem rekið hefur í land. 

  Fjöldi fjölmiðla endurbirti frétt The Guardian.  Þar á meðal Rúv og fjölmiðlar 365.  100 erlendum ferðamönnum er boðið að taka þátt í tiltektarátakinu.  Þeir fá frítt fæði og húsnæði en sjá sjálfir um ferðir til og frá eyjunum.  Þegar hafa 3500 manns sótt um þátttöku. 

  Í frétt The Guardian segir að 60 þúsund erlendir ferðamenn heimsæki Færeyjar árlega.  Bæði íslensku fjölmiðlarnir og þeir útlensku éta þetta upp eftir The Guardian.  Fréttin er haugalygi.  Í fyrra, 2018,  sóttu 120.000 erlendir ferðamenn Færeyjar.  Það er að segja tvöfalt fleiri en sagt er frá í fréttum.      

  Fjöldinn skiptir miklu máli fyrir eyþjóð sem telur 51 þúsund manns.  Mig grunar að The Guardian hafi sótt sína tölu í fjölda erlendra gesta á skemmtiferðaskipum.  Gleymst hafi að kanna hvað margir heimsækja Færeyjar í flugi.  

  Íslensku fjölmiðlarnir hefðu gert rétt í því að hringja í mig til að fá réttar upplýsingar.  En klúðruðu því.  Fyrir bragðið birtu þeir kolrangar upplýsingar.  

     

Athugasemdir

[Egill Þorfinnsson (IP-tala skráð) 3.3.2019 kl. 09:17]

Síðan hvenær telja Færeyingar 21. þúsund manns?

Íslenskir fjölmiðlar hefðu kannski gert rétt að hringja í einhvern annan en þig ?

[Stefán (IP-tala skráð) 3.3.2019 kl. 11:14]

Ég vona bara svo sannarlega færeyinga vegna, að Margrét Friðriks flytji ekki þangað, en hún er allavega á förum segir hún. 

[Jens Guð, 3.3.2019 kl. 12:40]

Egill,  takk fyrir ábendinguna.  Þetta var klaufaleg innsláttarvilla hjá mér.  Tölustafurinn 2 er næsti takki fyrir neðan 5 á lyklaborðinu.  Stundum treystir maður um of á að kunna utanað á það.

[Jens Guð, 3.3.2019 kl. 12:45]

Stefán,  ég sé á Fésbók að fólk er að spyrja hana að þessu.  Hún leiðir það hjá sér. 

[Alfreð K, 3.3.2019 kl. 15:53]

Af hverju er . á eftir 51 (51. þúsund manns)?  Sama stafsetning í fyrstu athugasemd (21. þúsund manns).

Er þetta sama nýja stafsetning og Elko kynnir gangandi og akandi vegfarendum þessa dagana á strætóskýli:  21. árs afmæli?

En alla vega Færeyingar telja þá sumsé fimmtugasta og fyrsta þúsund manns.  👀

[Stefán (IP-tala skráð) 3.3.2019 kl. 19:23]

Hef áreiðanlegar heimildir fyrir því að Mrgrét horfi ekki til Færeyja hvað fyrirhugaðan flutning varðar. Svo mikið er víst að ef hún flytur til Ísrael eins og ku standa til, að þar verður vel tekið á móti henni og jafnvel líka ef eitthvað er til í því að Jón Valur verði með í för ? 

[Jens Guð, 4.3.2019 kl. 21:19]

Alfred,  takk fyrir prófarkalesturinn.  Ég veit ekki hvernig þessi raðtala slysaðist inn hjá mér.  Maður er alltaf að gera einhver svona kærulaus smákluður.  Eins og gengur.

[Jens Guð, 4.3.2019 kl. 21:20]

Stefán,  einhversstaðar sá ég að Hatari hafi boðið henni embætti kynningarfulltrúa hljómsveitarinnar.  

[Alfreð K, 5.3.2019 kl. 00:36]

Jens, takk fyrir að bregðast við ábendingu minni.  Prófarkalestur er mér í blóð borinn.  Það er annars ekkert annað sem ég rek augun í í textanum, nema að the Gardian er ritað The Guardian á ensku.

[Jens Guð, 5.3.2019 kl. 21:34]

Alfreð,  greinir (ákveðinn eða óákveðinn) er yfirleitt skrifaður með litlum staf í ensku.  Þó er stundum gerð undantekning þegar um vörumerki er að ræða.  Minn lestur á ensku er aðallega um músík.  Hljómsveitanöfnin sem byrja á the eru jafnan með litlum staf í the.  Spurning þegar vitnað er í enskt dagblað (eða hljómsveit) hvort að heppilegra sé að skrifa stórt eða lítið t í the. 

Svo segir um the Guardian á wikipediu:  "The Scott Trust was created in 1936 "to secure the financial and editorial independence of the Guardian in perpetuity and to safeguard the journalistic freedom and liberal values of the Guardian free from commercial or political interference".

[Alfreð K, 7.3.2019 kl. 20:46]

Takk fyrir útskýringarnar, Jens.  Já, það er rétt að í enskum texta er yfirleitt ritað bara lítið t í the.  Í þessu tilfelli þó, þar sem vitnað er í enskt heiti úr öðru máli, einkum íslensku þar sem ákveðni greinirinn er ekki til nema áfastur nafnorðinu, finnst mér sjálfum a.m.k. skýrara að vísa til The Guardian með stórum staf.  Annars þyrfti líklega að slá gæsalappir utan um „the Guardian”.

Í öðrum tungumálum er þetta auðveldara, að fella erlend sérheiti inn í málið, í þýsku segja menn bara der Guardian, í frönsku le Guardian o.s.frv.

Á Wikipedia á hinum Norðurlandamálunum má svo sjá sama rithátt á ákveðna greininum The og ég hallast að á íslensku, t.d. hér á sænsku:

https://sv.m.wikipedia.org/wiki/The_Guardian

„1959 bytte tidningen namn till The Guardian och flyttade år 1964 till London.^[2] Därefter fick The Guardian ekonomiska problem.“